Ammerland

Landschop in Neddersassen

Dat Ammerland, de flache Geestlandschup nördlich un westlich von de Stadt Ollnborg, is dat Karnrebett von den olen Ammergau. Dat Land liggt bit to 15 m över den Meerspegel un flacht in'n Westen na grode Mooren un in'n Oosten na de Wersermasch af. Von den Geestpuckel flütt dat Water na Süüdwest bit in de Eems af. Bloots von de Raastäer Geest loppt dat na de Jaad to. De Haaren flütt in de Hunte in Ollnborg.

De högeren Lagen up de Geest hefft tomehrst dröge, sandige Boddens. Langs de Beken is de Grund fuchtig un moorig. De eersten Siedlers sochen sik den günstigsten Bodden för den Ackerbo ut, dat heet: he muss enigermaten fruchtbaar wesen. Dat weer natürlich up de Geestpuckels de Fall. Ok kunn dar dat Water licht affleten. De Siedlers roden dat Holt un de Büschen ut un kregen so den Esch, dat Ackerland för den Rogganbo. De Buren deelden den Esch in Striepen unner sik up. An’n Rand von’n Esch boden se ehre Hüüs. To dat Eschland kemen laterhen de Kämp, de nich so günstig för den Ackerbo weern. Dat Land, dat to grannig weer, höörde allen to. Dar in de Meenheit kunn jedereen sien Veeh weiden un Plaggen steken för dat Upmessen von dat Eschland. De Mooren sünd in dat 19. Johrhunnert un to Anfang von dat 20. Johrhunnert kultiveert un besiedelt woorn.

To dat Ammerland höört de Gemeenden Aap, Westerstäe, Wiefelstäe, Raastäe, Twüschenahn un Erwech. De Kreisverwaltung is in Westerstäe. 1977 woor de Oort mit de benaberten Buurschuppen von den neddersassischen Innenminister to’n Stadt verklaart.

De Stadt Ollnborg weer de ammersche Borg un se höörde eenlich ok to dat Ammerland, aver vandagen warrt se nich mehr as en Deel darvon rekent.

Vandagen is dat Ammerland ene moie Parklandschaft. Se wiest den angenehmen Wessel von Äcker und Kämp, Weiden un Wischen, Hagen un Knicks up, un överall sütt man de Boomscholen un bunten Rhododendronkulturen. Midden in dat Land liggt as ene Parl dat Twüschenahner Meer.