Knick
Dit Woort hett noch annere Bedüden: kiek dorför ünner Knick (Landkreis Horborg).
En Knick is en Form vun Hecken, de faken in Noorddüütschland vörkaamt. Dat sünd Hecken vun Bööm un Strüker op siede Wäll, de in’t 18. Johrhunnert bi dat Verkoppeln as „lebennige Tüün“ anleggt worrn sünd. Se denen as Grenzmarken vun’e Feller, levern Brennholt un hebbt den Bodden gegen Erosion dör den Wind sekert. Op de Wäll ut Steen un Eer sünd Hasselstrüker, Haagböken, Eschen un ok enkelte grote Böken oder Eken plant worrn. As Schutz gegen Veehbeet sünd faken ok Doornstrüker as Haagdoorn, Haffdoorn, Brommelberen un Slöhnbüsch plant worrn.
De Knicks billt en wichtigen Levensruum för vele Oorden vun Planten un Deerter. Alltohoop hebbt Biologen in Knicks so wat 7000 Oorden vun Deerter tellt.
De Naam Knick kaamt vun dat knicken, also dat afslaan vun de Büsch alle poor Johr. Na so teihn bet föffteihn Johren warrt de Knick jüst över de Eer knickt, dat he wedder nee utdrieven kann. In de Regel blievt dorbi de enkelten grötteren Bööm stahn. Dat Knicken weer jümmer veel Arbeid un hett nich veel inbrocht, den Busch kunn nüms bruken. Dat Knicken weer aver nödige Pleeg för de Knicks un siet den 30. August 1996 seggt ok de „Knickverordnung“ (§ 15 b vun dat Landsnaturschuulgesett vun Sleswig-Holsteen) vun dat Land Sleswig-Holsteen, dat dat maakt warrn mutt. Dat Teel vun’t Gesett is en Dicht vun 60 lopen Meters op’n Hektar in de Rebeden, de vun Bueree präägt sünd, bitobeholen.
De Knick präägt in Sleswig-Holsteen de Landschop. Hüüt gifft dat noch üm un bi 46.000 Kilometer Knicks. Na den Tweten Weltkrieg sünd dat woll noch mehr as 80.000 Kilometer Knicks wesen. Bi de Flurbereinigung güngen vele Knicks verloren. De Ackers weren nich groot noog. En good Bispeel is Mekelnborg-Vörpommern, wo mit de groten LPG-Bedreev de mehrsten Knicks verswunnen sünd.
En Weg de op beide Sieden Knicks hett, warrt Redder nöömt.
Literatur
ännern- Jürgen Eigner: Unsere Knicks im Natur- und Landschaftshaushalt, in: Schleswig-Holstein, Band X, 1975
- Jürgen Eigner: Ökologische Knickbewertung in Schleswig-Holstein, in: Die Heimat, Band 85, 1978
Weblenken
ännern- Kreis Plön: Knicks (hoochdüütsch)
- Stadt Kiel: Knickpleeg (PDF) (hoochdüütsch)