Twüschenahner Meer
In Hoochdüütsch is mit „Meer“ dat apene Meer meent, aver in Holland, England un Noordwestdüütschland weert ok lütte Binnenseen as „Meer“ betekent. Dat Twüschenahner Meer is en von disse Binnenseen.
| Twüschenahner Meer | |
|---|---|
| Land/Länner | Neddersassen |
| Toströöm | Auebach, Halfsteder Bäke, Elmendorfer Bäke |
| Afströöm | Aue, Speckener Bäke |
| Öörd bi’t Meer | Twüschenahn |
| Geograafsche Laag | Koordinaten:53° 12′ N, 8° 1′ O53° 12′ N, 8° 1′ O |
| Hööchd | 5 m över NN |
| Fläch | 5,5 km² |
| Längd | 2,8 km |
| Breed | 2 km |
| Överlängd | 11 km |
| Maximal Deepd | 6 m |
| Dörsn. Deepd | 3,3 m |
| Eilannen in’t Meer | keen |
 | |
Dat Meer is vör 12.000 Jahren entstahn, un dat keem so: Dat Grundwater harr enen Soltstock uplööst un de Eerdschicht daröver brook in.
De Saag vertellt dat anners: De Düvel greep sik enen groden Eerdklumpen ut enen Busch un wull em in siene Raasch up de eerste Kark smieten, de de Ollnborgers boot harrn. He woor aver unnerwegens stöört, wiel en Hahn kreihde, un so muss he eerst enen lütten Kluten un denn den groden Rest fallen laten. Disse Klutens sünd de lütte un de grode Wildenloh, de Sandpuckels mit ehre Büschen, de midden in't Moor vör de Dore von Ollnborg liggt. Wor de Düvel den Busch ut de Eerd reten hett, is dat Twüschenahner Meer entstahn.
Dat Meer is von enen Schilfgördel umrahmt. Dat Reith kummt an'n mehrsten vör. In'n Winter, wenn dat Ies fast is, warrt dat afmeiht un as Materiaal to'n Dackdecken verkofft. De Rohrkolben mit de brunen, samtweken „Lampenputzers“ maakt sik goot as Smuck för de Wahnung. De Rüschen (Seebinsen) weern fröher dat Flechtmateriaal för de Stohlflechters, de besunners in't Ammerland faken antodrapen weern.
Annere Planten, de an dat Seeöver vörkaamt, sünd de scharpe Segge, dat Dullkruut (Waterschierling), de widde un de gäle Seeroos. De Schilfgördel bütt vele Watervagels Gelägenheit to'n Nesten. Dar is toeerst de Düker (Haubentaucher) to nömen, denn dat Blesshohn, de Reithpieper (Rohrsänger), de Rohrammer un de Wildaanten. Verenkelt kummt ok de Iesvagel vör. Dat Twüschenahner Meer is Dörgangsstatschoon för vele Watervagels ut'n Noorden, darunner ok vele Swaans.
Wat siet ole Tieden röhmt warrt, is de Riekdoom an Fisch. De See bargt Heek, Zander, Karpen, Boors, Brassen un Rootogen. Vör allen droff man den Aal nicht vergeten. He finnt in den Fuulslamm gode Levensbedingen. As Twüschenahner Smuutaal is he bi Leckertungen begehrt. De Nafraag is aver so groot, dat de See nich noog hergifft. De Aal weert darum ut Däänmark, Holland un Portugal inföhrt un in Twüschenahn na besunnere Rezepten rökert.
Weblenks
ännern
Twüschenahner Meer. Mehr Biller, Videos oder Audiodateien to’t Thema gifft dat bi Wikimedia Commons.