Austin Powers in Goldmember
Austin Powers in Goldmember (op platt so veel as „Austin Powers in Goldliddmaat“; dt. Titel: Austin Powers in Goldmember) is de drüdde Kinofilm ut de Kummedie-Reeg üm den britischen Agenten Austin Powers, de as Parodie op de James-Bond-Filmen dreiht worrn sünd. De Film is 2002 rutkamen.
| Filmdaten | |
|---|---|
| Plattdüütsch Titel: | — |
| Originaltitel: | Austin Powers in Goldmember |
| Düütsch Titel: | Austin Powers in Goldständer |
| Produkschoonsland: | USA |
| Johr vun’t Rutkamen: | 2002 |
| Läng: | 94 Minuten |
| Originalspraak: | Engelsch Japaansch |
| Öllersfreegaav in Düütschland: | FSK 12 |
| Filmkru | |
| Speelbaas: | Jay Roach |
| Dreihbook: | Mike Myers |
| Produkschoon: | Demi Moore Mike Myers Suzanne Todd Jennifer Todd John S. Lyons Eric McLeod |
| Musik: | George S. Clinton Quincy Jones |
| Kamera: | Peter Deming |
| Snitt: | Greg Hayden Jon Poll |
| Szenenbild: | Rusty Smith |
| Kledaasch: | Deena Appel |
| Dorstellers | |
| |
Inholt
ännernDe Geheemagent Austin Powers is intwüschen so bropen worrn dör sien Spood gegen dat Verbreken, dat en Film över em dreiht warrt. För sien Verdeensten warrt he vun de Queen sogor to’n Ridder slahn. Doröver freit he sik düchtig, vunwegen dat ok sien Vörbild un Vadder, Nigel Powers, bi den Ridderslag dorbi wesen schall. Man, as dat sowiet is, is de Vadder nich dor.
Dat sett em bannig to, man Basil Exposition vertellt em kort dorop, dat Nigel vun den bösen Goldmember roovt worrn is. Austin hett also nu de Opgaav, sien Vadder ut de Hannen vun den verrückten Nedderlänner Goldmember to redden. Raat halt he sik dorto vun sien Arzfeend Dr. Evil, de dör Austin sien Ingriepen intwüschen in’t Gefängnis sitt. Dr. Evil vertellt em, dat he Goldmember in de verleden 1970er Johren finnen kann. Mit sien Tietmaschien-Auto reist he gau dorhen torüch. Help kriggt he dor vun sien olle Bruut Foxxy Cleopatra.
Wat Dr. Evil em aver nich vertellt hett is, dat he mit Goldmember tohopen arbeit. De schall för em neemlich en Traktorstrahl utklamüstern (nöömt warrt de „Preperation H“ – en Middel gegen Hämorrhoiden, dat dör’n Oors inföhrt warrt; in de düütschen Faten warrt Luke 2 dorto seggt), mit den he en goldenen Komeet to’n Tosamenstöten mit de Eer bringen will. Tohopen mit sien Vadder Nigel, den he befre’en kann, un Foxxy versöcht Austin dat to hinnern. Dorto kummt noch Mini Me, Dr. Evil sien Klon, de överlopen deit, as Dr. Evil opletzt doch sien Söhn Scott lever hett un em mehr oder minner verstöten deit. Scott hett sik bi sien Vadder afteken, woans een böös wesen kann, ümdat he sien Acht kriggt.
Mini Me wesselt sien Utsehn un Verhollen un gifft sik nu as’n lütten Austin. Gemeensom sliekt se sik an Boord vun Dr Evil sien U-Boot, mit dat he överleven will, wenn de Komeet dat Ies an’n Pool to’n Smölten bringen deit. Toletzt stellt sik Nigel aver twüschen Dr. Evil un Austin und vertellt jem, dat se in Wohrheit beide Bröder sünd. Man, Dr. Evil weer aslütt Kind bi en Unfall verschütt gahn un weer orna vun en Belgier so optagen worrn, dat he so böös worrn is. So verdräägt se sik an’t Enn, un allns is wedder goot.
Kritik
ännernDe Kritiken stört sik bi en Film an den smuddeligen Humor, de sik vör allen üm Sex dreiht un tomeist ünner de Gördellien togang is[1]. Ok dat Magazin Cinema beteken den Humor as Klamauk un schreev, dat de Vadder-Söhn-Geschicht twüschen all de smucken Fronslüüd frömd wirken deit, un dat de Smuddelhumor in de Person vun Fat Bastard nich nödig doon harr.
Utteken
ännernOfschoonst de Kritik tomeist nich so goot weer, harr de Film doch veel Spood bi de FIlmpriesen. He weer alltohopen för dreeuntwintig Utteken vörslahn un hett dorvun fief wunnen:
- 2003: den Blimp Award in de Kategorie Leevst Speelfilm
- 2003: den MTV Movie Award in de Kategorie Best Kummedie-Dorstellen för Mike Myers
- 2003: den BMI Film & TV Awards/BMI Film Music Award för George S. Clinton
- 2003: den Canadian Comedy Award in de Kategorie Film – lustig Dorsteller för Mike Myers
- 2003: den Canadian Comedy Award in de Kategorie Film – lustig Dreihbook för Mke Myers
Achtergrund
ännernDe Rull vun Austin sien Vadder Nigel weer toeerst Sean Connery andragen worrn, man he wull de Rull nich, as dat ok vermodt weer. Also hett Sir Michael Caine de Rull kregen, de in de 1960er Johren dör sien Dorstellen vun den langwielten Agenten „Harry Palmer“ weltbekannt worrn is. En Grund weer, dat de kortsichtige Schauspeler de Rull mit en dicken Kassenbrill speelt hett. Dat weer för Geheemagenten in de Tiet vun James Bond afsluut neecun hett Acht op sik tagen. Jüst in Anspelen op disse Rull hett Myers ok Austin Powers mit so en Kassenbrill rümlopen laten. Dormit is he opletzt wohrhaftig so wat as de Söhn vun „Harry Palmer“.
Jüst so as in den tweeten Deel al, weern in ok in dissen Film wedder vele Prominente to sehn, de in lütte Nevenrullen optreden doot. Dorto höört ünner annern Tom Cruise, Gwyneth Paltrow, Kevin Spacey, Danny DeVito, John Travolta, Steven Spielberg, Britney Spears, Ozzy Osbourne un Familie, Quincy Jones un Burt Bacharach