Borg Vöör

De Borg Vöör weer en Borg in Bremervöör, de later von de Bischööp von Bremen as Residenz bruukt un as Slott Bremervöör utboot worrn is. De Anlaag is 1682 afreten worrn. Dat Kanzliehuus, dat to dat Vörwark von de Borg tellt un nableven is, warrt vondaag von dat Bachmann-Museum bruukt.

Plaan von de Borg 1653 (von Matthäus Merian)

Historie

De eerste Borg hett de Hertog Lothar twischen 1112 un 1122 boon laten. De Oost harr an de Steed en natürliche Föör un de Oort weer dorüm wichtig för den Hannel, de von Hamborg un ut’n Noordoosten na Bremen na’n Süüdwesten lopen deed (to’n Bispeel över den Ossenpadd).

De Borg hett in de nakamen Tied ünner annern de Greven von Stood, Hinnerk de Lööw un von 1219 af an denn dat Arzbisdom Bremen tohöört. De Borg leeg anners as Bremen temlich tomerrn in’t Stift von dat Bisdom un weer dorüm strategisch wichtig. Dat weer ok de Sitt von de Amtsväägt von’n Bischop. Deelwies hebbt sogor de Bischööp sülvst op de Borg seten un ehr bilütten to en Slott utboot. Dat Bomateriaal keem von dat 19. Johrhunnert af an vör allen ut de Tegelee in Bevern.

As de Dörtigjohrige Krieg anfüng, bestünn de Anlaag ut en Insel in de Oost, de mit Bastionen schuult weer. Op de Insel stünn en Renaissance-Slott, in’n Süden un Oosten hett dat Goorns geven. De Haven von Bremervöör weer in’n Noorden.

In’n Krieg is Bremervöör 1627 un 1646 belagert worrn un de Borg hett sworen Schaden afkregen. Mit dat Bisdom Bremen weer dat na’n Krieg 1648 toenn un de Sweden hebbt dat Hertogdom Bremen-Veern un dat Slott övernahmen. Nochmaal wedder is de Stadt denn 1657 in’n Däänsch-Sweedschen Krieg belagert worrn, ditmaal von de Dänen. In de Tied, as de Sweden dat Regeer harrn, hebbt se denn den Seet von de Regeren von Bremervöör na Stood un dat Slott Gothenborg leggt. 1682 hebbt se dat Slott un de Bastionen to’n groten Deel afreten.

Von dat Slott is vondaag nix mehr nableven un von de ole Festung is ok nich veel nableven. Blots von dat ole Vörwark is dat Kanzliehuus un en Stall nableven. Dat Kanzliehuus is vondaag dat öllste Gebüüd in Bremervöör. De Kanzlie is lang as Seet von dat Amt Bremervöör un as Kreishuus von’n Kreis Bremervöör bruukt worrn. In de Johren 1960 hebbt se in de Neegd en neet Kreishuus boot, wat üm un bi an de Steed steiht, an de fröher dat Slott wesen is. In de Kanzlie is vondaag dat Bachmann-Museum in.

Dat Bachmann-Museum wiest vör allen Saken to de Archäologie, Geologie un Geschicht von de Ümgegend. Dat Museum geiht trügg op August Bachmann, de von 1906 af an anfungen harr, privaat Saken to sammeln. 1960 hett de Kreis Bremervöör em denn Platz in’t Kreishuus geven, dat he sien Sammlung ünnerbringen kunn, de midderwielen to groot weer för sien egen Museumshuus. Ut de private Sammlung is denn en Museum worrn, dat de Kreis dragen hett un von 1985 af an hett dat Museum den Naam Bachmann-Museum dragen.