Balblair

Balblair is en Whisky-Brenneree in Edderton, Ross-shire, Schottland. De Darr vun de Brenneree is in de schottischen Denkmollisten in de Kategorie B insorteert.

Balblair
De Brenneree Balblair (Foto: Anne Burgess)
Land	Schottland
Region	Highlands
Tyyp	Malt
Status	aktiv
Besitter	Inver House Distillers Ltd.
Grünnt	1790
Grünner	John Ross
Waterborn	Ault Dearg Burn
Washstill(s)	1 x 19.093 l
Spiritstill(s)	1 x 11.044 l
Produkschoonsvolumen	1.330.000 l
Websteed	www.balblair.com

Historie

Balblair is 1790 vun John Ross grünnt worrn. Dormit is dat de tweetöllste Destille, de noch jümmer in Bedrief is. De hüütige Anlaag stammt ut dat Johr 1872 un is vun Alexander Ross boet worrn. De Brenneree weer 1894 an Alexander Cowan verköfft. Twüschen 1915 un 1947 weer de Anlaag stillleggt. De ne’e Besitter Robert Cumming, de laterhen ok de Brenneree Pulteney in sien Besitt harr, hett de Destille utboen laten. 1970 hett he ehr an Hiram Walker verköfft, de later in’t Ünnernehmen Allied Distillers oder Allied Domecq opgahn is. 1996 is de Brenneree wedder dicht maakt worrn un denn vun Inver House Distillers Ltd. (Pulteney, Speyburn, Knockdhu un Balmenach) övernahmen worrn. Siet Mai 1997 warrt dor nu wedder Whisky brennt.

Produkschoon

De Destille Balblair höört to dat schottische Whiskyrebeet Highlands. Ehr Water för de PRosukschoon stammt ut den Ault Dearg Burn, dat Molt warrt ut de Molteree vun Glen Ord anköfft. In de Destille gifft dat een Meeschfatt (mash tun) vun 4,6 t ut Eddelstahl un söss Gäärfatten (wash backs) to 22.000 l ut Douglasienholt. Brennt warrt in en wash still vun 19.093 l un en spirit still vun 11.044 l, de mit Damp hitt maakt warrt.

Kiek ok

• List vun de schottischen Brennereen

Literatur

• Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
• Walter Schobert: Das Whiskylexikon. Fischer Taschenbuch Verlag, Frankfort an’n Main, 2003, ISBN 978-3-596-15868-3.

Weblenken

Balblair. Mehr Biller, Videos oder Audiodateien to’t Thema gifft dat bi Wikimedia Commons.