Batwa
De Batwa sünd en Volk vun Pygmäen, dat in Zentralafrika leevt un dor to de öllsten Völker höört. To de Länner, in de se leevt, höört Ruanda, Burundi, Uganda un de Demokraatsche Republiek Kongo. Se warrt mehrst nich mehr as 1,5 Meter groot.
De Batwa snackt hüüt mehrstendeels de Bantuspraak Kinyarwanda.
De Tall vun Batwa is nich nipp un nau bekannt. Dat möögt üm un bi 80.000 Minschen wesen, villicht aver ok blots 50.000. 1931 bi den Zensus dör de belgische Kolonialverwalten hebbt se in Ruanda 15.000 Lüüd tellt. 1996 sünd in Uganda noch üm un bi 2000 Batwa tellt worrn.
As de Hutu, en Bantu-Volk, in de Gegend kemen, weren de Batwa noch de Herren över wiede Streken. Doch Hutu un siet dat 15. Johrhunnert ok Tutsi hebbt mehr un mehr dat Leid övernahmen un de Batwa trüchdrängt. De Batwa leven vun’n Woold, doch de Bantu hebbt em afhaut, denn se bruken dat Land för ehren Ackerbo.
De velen Höhlenmalereen bi Mbale warrt ok de Vörfohren vun de Batwa toschreven. De Batwa leven fröher halvnomaadsch un as Jägers un Sammlers. Wenn dat Eten roor worrn oder en Minsch doodbleven is, hebbt se en nee Lager opslaan.
In de 1930er Johren hebbt se de Rebeden Bwindi, Eginga un Mgahinga ünner Schutz stellt. Dat bedüüd dat eerste Maal Schutz för de Resten vun de Levensrüüm vun de Batwa, doch togliek weer de Woold nich mehr in Batwa-Besitt un se kunnen ok nich mehr ole överleverte Levenswies leven. As ut de Reservaten 1991 denn Natschonalparks worrn sünd, weer de Levenswies vun de Batwa sogor illegal.
De Batwa hebbt veel ünner Vöroordelen to lieden. Bi de Bantu-Navers warrt se faken as Volk vun Buttjers un Wille ansehn. Welke Lüüd seggt ok, dat se de roren Barggorillas jaagt un utrotten doot, un dat obschoonst se siet Johrdusenden den sülvigen Levensruum deelt un de Batwa en oolt Tabu hebbt, dat se gor keen Gorilla eten dröfft.
Hüüt sünd de Batwa ok in de Organisatschoon vun de Unrepräsenteerten Natschonen un Völker vertreden.