Belize Electricity Limited
Belize Electricity Limited (BEL) is de Hauptenergieversorger von dat Land Belize. Dat Ünnernehmen sitt in Belize-Stadt.
Reguleert warrt dat Stroomnett von de Belize Public Utilities Commission.
Tallen ännern
Dat Ünnernehmen harr Stand 2017 316 Mitarbeiders, de 94.450 Verbrukers mit Energie versorgt hebbt.[1] De Verbruuk leeg bi 552,5 GWh (2016 541 GWh).[1] De maximale Verbruuk över dat Johr leeg bi 104 MW.[1]
De Ümsatz weer 207 Milljonen Belize-Dollar un de Gewinn 17,8 Milljonen Belize-Dollar.[1]
Rebeed ännern
BEL versorgt ganz Belize mit Stroom. Utnahmen is blots dat Eiland Caye Caulker, dat en egen Stroomnett hett.
De Öörd sünd mit en Stroomnett verbunnen, dat üm un bi 1900 Mielen (Stück wat över 3000 Kilometer) lang is. Stand 2017 sünd knapp 96 % von de Inwahners an dat Stroomnett anbunnen.[1]
Tosätzlich is dat Nett mit dat Stroomnett von Mexiko verbunnen.
Kraftwarken ännern
Dat Ünnernehmen kriggt den Stroom von Water-, Biomass-, Diesel- un Gaskraftwarken un Photovoltaikanlagen.
De Waterkraftkraftwarken (Chalillo-Staudamm, Mollejon-Staudamm un Vaca-Staudamm) sünd in Besitt von de Belize Electric Company Limited, wat en Dochterünnernehmen von Fortis Inc. is. De Biomasskraftwarken (vör allen Bagasse ut de Zuckerindustrie) warrt von de Belize Co-Generation Energy Limited bedreven.
Dat Gaskraftwark von BEL is vör allen dor, üm as Stand-by-Kraftwark de Versorgungssekerheit hertostellen. De Dieselkraftwarken bedrifft BEL sülvs.
Stand 2017 weren 58 % von de Produkschoon verne’erbore Energie, 5 % nich-verne’erbor un 37 % importeert (vör allen ut Mexiko von de Comisión Federal De Electricidad).
Historie ännern
Dat Ünnernehmen is 1950 in Brietsch-Honduras grünnt worrn un hett later Belize Electricity Board heten. An’n 5. Oktober 1992 hett dat Ünnernehmen sien hüdige Ünnernehmensform as Limited kregen.
Bet 1999 harr de Staat Belize noch en 51-%-Mehrheit an dat Ünnernehmen.[2]
In dat Johr 2011 harr dat kaanadsche Ünnernehmen Fortis Inc. en Andeel von 70 % an BEL. Dat Ünnernehmen harr aver Maleschen, de Energieversorgung in Belize oprecht to hollen. Dat hett dorto föhrt, dat de Regeren von Belize an’n 20. Juni 2011 dat Electricity (Amendment) Act No. 4 beslaten hett, mit dat de Staat de Kuntrull över BEL övernahmen hett. Gegen düsse Enteignung is Fortis vör Gericht gahn. 2015 hebbt sik Fortis un de Regeren dor op eenigt, dat Fortis en 33,3-%-Andeel an BEL behollen dröff un de Rest von de Andelen, de de Regeren behöllt, mit 46,2 Milljonen Kanaadsche Dollar utgleken warrt.[3]
Besitters ännern
De Staat Belize is direkten Besitter von 32,6 % von de Andelen an dat Ünnernehmen. 31,2 % von de Andelen höört de Soziaalversekerung von Belize to. De gröttste Andeel von 33,3 % höört Fortis Cayman Inc. to, wat en Dochtersellschop von Fortis Inc. is. De Rest von 2,9 % Streibesitt verdeelt sik op över 1500 Eegners.[1]
Footnoten ännern
- ↑ a b c d e f Annual Report 2017
- ↑ Annual Report 2000
- ↑ Ashley Fitzpatrick: Fortis reaches deal on Belize Electricity, The Telegram an’n 1. September 2015
Weblenken ännern
- Websteed von dat Ünnernehmen (engelsch)