Bembe (Belize)

En Bembe is en Stereotyp ut de Sellschop von Belize, dat en swarte Fro beschrifft, de för sik insteiht un nich bang is, dat luut uttospreken. Dormit is dat dat Stereotyp verwandt mit de angry black woman ut de US-amerikaansche Sellschop. In de Garifuna-Spraak steiht de Begreep Suber för dat sülve Kunzept.[1]

De Begreep Bembe kummt ut de Spraak von de Belize-Kreolen un steiht för Kämpfer oder Striedsöker.[2] De Begreep is von de Grammatik her neetraal un kann ok för Mannslüüd bruukt warrn, aver dat Stereotyp betütt sik alleen op Froonslüüd.[2] In Belize-Stadt weer mit’n Begreep von fröher her dat Bild von swarte Froonslüüd verbunnen, de sik bi’t Waterhalen an’n Sood in’e Wull kriegt.[1] Aver de Begreep hett ok Konnotatschonen von slechte Moraal.[1][2] He steiht in Kuntrast to en Stereotyp von Froonslüüd, de still un föögsam ween schöölt. De Begreep is besünners in de Regionen von Belize begäng, in de Swarte (Kreolen un Garifuna) en groten Deel von de Inwahners stellt, also besünners de Rebeden von Belize-Stadt un Dangriga.[1]

Nadem sik 1950 mit de People’s United Party in Brietsch-Honduras de eerste Partei grünnt hett un de Unafhängigkeitsbewegung jümmer starker warrn dee, sünd ok en Reeg Froonslüüd in de Politik gahn un hebbt sik besünners för soziale Saken un de Rechten von Froonslüüd insett. Düsse starken Froon, de nich mit jemehr Verscheel achter’n Barg hollen deen, sünd denn ok as Bembes betekent worrn.[1] Bispelen för Froonslüüd in de Politik, de fakener as Bembe betekent worrn sünd, weren Elfreda Reyes, Elsa Vasquez un Tharine Rudon.[1] Dat Engaaschment von düsse Froonslüüd hett woll stark dorto bidragen, dat sik de Begreep von en minnachtigen Begreep wannelt hett to een, mit den sik Froonslüüd stolt sülvs beschrieven doot.

LiteraturBearbeiten

  • Yasser Musa, Katie Usher, Lito: Bembe Vision: Leadership Notes for The Belizean Classroom. 2018

FootnotenBearbeiten

  1. a b c d e f Anne S. Macpherson: From Colony to Nation: Women Activists and the Gendering of Politics in Belize, 1912-1982. University of Nebraska Press, 2007, Sied 205
  2. a b c Anne S. Macpherson: Viragoes, Victims and Volunteers: Creole Female Political Cultures and Gendered State Policy in 19th Century Belize. In: Michael D. Phillips: Belize: Selected Proceedings from the Second Interdisciplinary Conference. University Press of America, 1996, Sied 43