Blumenfeld-Gambit

Die Grundstellung vun dat Blumenfeld-Gambit nah 4. … b7–b5

Bi dat Blumenfeld-Gambit hannelt sück dat um en Schachanspeel. Dat wurr nah den russischen Schachmeester Benjamin Markowitsch Blumenfeld nöömt. Dat Blumenfeld-Gambit tellt to de Slooten Spelen un is in den ECO-Codes ünner den Slötel E10 inorndt. Dat geiht ut de Indisch Verteidigung hervör.

Jede vun sien Hööftvarianten fangt mit disse Tüüg an:

1. d2–d4 Sg8–f6 2. c2–c4 e7–e6 3. Sg1–f3 c7–c5 4. d4–d5 b7–b5

Historie

Dat Blumenfeld-Gambit wurr 1922 vun den lateren Schachweltmeester Alexander Aljechin, de dat vun den russischen Meesterspeler Blumenfeld övernommen un wieder utgestalt harr, in de internatschonale Turnierpraxis inführt. In dat Meesterturnier to Piešťany (dormals Bad Pistyan) hett he mit dit Gambit den düütschen Meesterspeler Siegbert Tarrasch in en Partie besiegt, de mit den Schönheitspries uttekent wurr. Dat Anspeel wurr doruphen ok vun anner Meesterspelern as Savielly Tartakower, Rudolf Spielmann un Efim Bogoljubow anwennd.

In de tweet Hälft vun dat 20. Johrhunnert weer dat Blumenfeld-Gambit up Weltklasseniveau so goot as nich mehr antodrapen. Aljechin sülvst schreev in sien Kommentaren to de Partie gegen Tarrasch, dat „die Annahme des Gambits […] Schwarz eine glänzende Stellung im Zentrum [gibt]“. Aljechin meen wieder, dat 5. Lc1–g5 de richtige Toog weer. In de letzt Jahren is dat Blumenfeld-Gambit weer wat mehr anseggt wurrn un Witt grippt intüschen weer fakener to 5. cxb5, wiel nah 5. Lg5 exd5 en Benoniaardige Stellung ahn groot Probleme för Swaart entsteiht.

Anspeelideen

De Inschätzung vun Aljechin betreckt sück up de sück dorut ergevende Stellung, falls Witt mit 5. dxe6 fxe6 6. cxb5 wiederspelen sull. Nah d7–d5 kontrolleert Swaart de Midden vun dat Brett un hett free Figurenspeel. Witt versöcht denn meest fröher oder later mit e2–e4, to’n Deel ünner Rückgaav vun den Buur, dit Zentrum weer to sprengen.

Literatur

• Jerzy Konikowski, Jan Przewoznik: Blumenfeld-Gambit. Ed. Mädler im Rau-Verl., Düsseldörp 1991. 98 S., ISBN 3-7919-0328-4.
• Max Euwe: Theorie der Schach-Eröffnungen. Engelhardt, Berlin-Frohnau 1965, 139 S. Teil: 6. Budapester Gambit, Blumenfeld-Gambit, Verschiedene Indische Systeme, Katalanisch, Die Benoni-Verteidigung, Holländisch, Königs-Fianchetto, sonstige halbgeschlossene Spiele.