Boutros Boutros-Ghali

Boutros Boutros-Ghali (* 14. November 1922 in Kairo, Ägypten; † 16. Februar 2016 ok dor), (araab.: بطرس بطرس غالي), is vun ’n 1. Januar 1992 bit 31. Dezember 1996 de sösste Generalsekretär vun de Vereenten Natschonen ween.

Boutros Boutros-Ghali in Davos (1995)

Familie un Beroop ännern

Boutros Ghali stamm ut en Familie af, de to de Koptische Karken in Ägypten tohöörn deit. Sien Grootvadder is de ägyptsche Ministerpräsident Boutros Ghali (1846-1910) ween.

Boutros Ghali studeer an de Universität in Kairo un hett dor 1946 sien „Bachelor“ in Rechtswetenschoppen maakt. Denn studeer he Internatschonal Recht in Paris un maakde dor 1949 sien Dokter in. Vun 1949 bit 1977 hett he as Perfesser an de Universität vun Kairo Unnerricht geven. He hett mehr as 100 Artikels rutgeven un en Reeg vun Böker schreven. Utteknungen hett he dor in mehr as 24 Länner för kregen.

Sien Weg in de Politik ännern

Opentliche Ämter in Ägypten ännern

1977 is Boutros-Ghali Staatsminister in Anwar as-Sadat sien Butenministerium wurrn. In datsülvige Johr hett he mitmaakt bi Sadat siene histoorsche Reis na Israel. He hett sik dor för insett, datt Ägypten un Israel sik wedder verdregen döen un warrt as en leifigen Diplomaten ankeken. Dat warrt ok seggt, he weer en vun de Architekten vun dat Afkamen vun Camp David vun 1979. Boutros Ghali hett dor to bidragen, datt en ganze Reeg vun Strietfälle in Afrika bileggt weern konnen. Ok bi dat Freelaten vun Nelson Mandela 1990 hett he siene Finger in’t Speel harrt.

In’n Mai 1991 is he stellvertredend Butenminister vun Ägypten wurrn.

De UN ehr Generalsekretär ännern

Boutros-Ghali is an’n 3. Dezember 1991 vun de UN-Vullversammeln wählt wurrn.[1] In siene Amtstied hett de UN Last mit de Finanzen harrt. In de doren Johre hett se en nee Struktur kregen un de Tahl vun Mitarbeiders is bannig tohopenstreken wurrn.

1992 hett he sik för en Insatz vun UN-Truppen in Somalia utspraken. Allerhand Saken sünd em vörsmeten wurrn in’n Tosamenhang mit Fehlers vun de UNO bi den Völkermord in Ruanda 1994.

As de Tweete Golfkrieg losgüng, hett de Sekerheitsraat vun de Vereenten Natschonen en Embargo gegen den Irak towege bröcht. Dat dröff nich mehr mit dat Land hannelt weern un ok Geld scholl dor nich mehr henbröcht weern. Unner düt Embargo hefft sunnerlich grote Deele vun de Inwahners lieden mösst. Boutros Ghali hett sik dormols insett för dat Programm „Ööl för Levensmiddel“. Dat scholl hölpen, datt de Inwahners vun den Irak mehr to eten kregen un datt dat beter um ehre Gesundheit stunn.

In Ghali siene Amtstied geev dat, neven dat Theater um den Irak, ok noch duchtigen Striet um de Tostänne in dat vörmolige Jugoslawien. Dor streven dormols allerhand Volksgruppen na Unafhängigkeit. Dor is denn faken in’n Sekerheitsraat un in de Vullversammeln över spraken wurrn un dor sünd ok allerhand UN-Resolutschonen över rutbröcht wurrn. Boutros Ghali meen, de UNO harr to minne Möglichkeiten, so’n Krisen to wuppen.

Boutros Ghali is de eerste UN-Generalsekretäär ween, de keen tweete Amtstied kregen hett. Sunnerlich de USA sünd dor stracks gegen ween.

Wat he later maakt hett ännern

Vun 1997 bit 2002 is he Generalsekretäär vun de “Internatschonale Organisatschoon vun de Frankophonie” ween. Dat is en Organsisatschoon vun Länner, wo Franzöösch in snackt warrt. In’n Momang is he unner annern Präsident vun dat Kuratorium vun de Haagsche Akademie för dat Völkerrecht in Den Haag. Boutros Ghali höört to de eersten, de mit ehre Unnerschrift foddert hefft, nu scholl en Parlament bi de Vereenten Natschonen inricht’ weern.[2] Dat schall en eersten Schritt na en Weltparlament hen ween. Vun März 2009 af an maakt he ok mit bi dat nee grünnte Russel-Tribunal to Palästina.

Literatur ännern

  • Boutros Boutros-Ghali: Hinter den Kulissen der Weltpolitik. Discorsi, Hamburg Oktober 2000 ISBN 3-9807330-0-9
  • Boutros Boutros-Ghali: Wider die Tyrannei der Dringlichkeit. Discorsi, Hamburg Januar 2001 ISBN 3-9807330-1-7

Belege ännern

  1. Deutsche Gesellschaft für die Vereinten Nationen: Chronik, affraagt an’n 20. November 2009]
  2. [1]

Weblenken ännern