Generalsekretär vun de Vereenten Natschonen

De Generalsekretär vun de Vereenten Natschonen is dat Hööft vun dat Sekretariat vun de Vereenten Natschonen (UNO). Dat is een vun de wichtigsten Organe vun de UNO un so warrt de Generalsekretär as Hööft vun de Vereenten Natschonen överhoop ankeken.

Ban Ki-moon, Generalsekretär vun 2007 af an

Normolerwiese warrt he för fiev Johre anstellt, man meist warrt düsse Tied verlängert up 10 Johre. He oder se warrt wählt vun de Vullversammeln vun de Vereenten Natschonen up Vörslag vun den Sekerheitsraat. De meisten Sekretäre hefft en Achtergrund ohn Placken un kaamt ut middelgrote Länner. Bloß man um den Öösterrieker Kurt Waldheim hett dat allerhand Theater geven vunwegen sien Verleden in'n 2. Weltkrieg. Wenn en nee generalsekretär funnen weern mutt, denn weert alltied ok grote Naams nömmt, man nie nich weert se denn wählt.

De Posten vun den Generalsekretär warrt na dat Prinzip vun de Rotatschoon över de Kontinente hen vergeven. Vun 2007 af an weer Asien an'e Reeg. De Sekerheitsraat hett an'n 9. Oktober 2006 den süüdkoreaanschen Butenminister Ban Ki-moon offiziell as Kannedaten vörslahn. Vörweg hatt dat verscheden Runnen geven, wo afstimmt wurrn is. Dor hefft sik denn annere Kannedaten ut Asien bi torüchtrocken. An'n 13. Oktober is Ban dör de Vullversammeln denn to'n Nafolger vun Kofi Annan wählt wurrn.

In dat Internatschonale Protokoll warrt de Generalsekretär as en Staatshööft behannelt. Man de Vörsitter vun de Vullversammeln steiht in'n Rang noch höger.. He warrt ok gellen laten as en fons honorum (up Platt „Ehrenborn“) un draff Ordens verlehnen, dormank en Masse vun Medaillen för de UN-Fredensmisschonen.

Generalsekretäre bither to

De Personen, de hier achter folgt, sünd Generalsekretär (ween):

1. 1945-1946: Gladwyn Jebb (VK) (kommisaarsch)
2. 1946-1952: Trygve Lie (Norwegen)
3. 1953-1961: Dag Hammarskjöld (Sweden)
4. 1961-1971: U Thant (Birma)
5. 1972-1981: Kurt Waldheim (Öösterriek)
6. 1982-1991: Javier Pérez de Cuéllar (Peru)
7. 1992-1996: Boutros Boutros-Ghali (Ägypten)
8. 1997-2006: Kofi Annan (Ghana)
9. 2007-2011: Ban Ki-moon (Süüd-Korea)

Weblenken

• Offizielle Webstäe vun den Generalsekretär (Engelsch)
• "Wer schall de neegste Generalsekretär vun de Vereenten Natschonen ween?" (Engelsch)