Briganten (lat.:Brigantes) is de Naam för en Grupp vun Stämm oder Volksgruppen mank de Kelten, de in dat noordööstliche Britannien leevt hefft. All to dull tohopenslaten sünd düsse Gruppen avers nich ween. Se siedeln bi Eboracum, wat dat hüdige York is, in de Gemarken twuschen de Ströme Humber un Tyne. Nadem de Römers dat Land innahmen harrn, is dat vun de Stadt Isurium Brigantum ut regeert wurrn. Dat is dat hüdige Aldborough. De Briganten schöllt en Spraak snackt hebben, de mit de Waliesche Spraak verwandt is. Vun de keltischen Völker wieter na Süden to hefft se sik verscheelt dör en buernhaftige Kultuur, de en beten wat butt weer.

In düsse Kuntreien hefft de Briganten siedelt
Annere Karten, mit Navers

Allens, wat över de Briganten seggt warrt un wat sik nich torüchföhren lett up Funnen vun de Archäologie, is man mit Vörsicht to geneten. Meist allens kümmt ut de Schriften vun röömsche Historikers, sunnerlich vun Tacitus un de harr dat gor nich dor up afsehn, de Wohrheit över de Völker to vertellen, vun de he schrieven dö, man he woll siene Berichte as Propaganda bruken. Wat Tacitus schrifft, vertellt mehr över de Tostänne un de Ideologien in Rom um dat Johr 100 rüm, as över de Historie. Dat is ok gor nich kloor, of de Briganten sik sülms so oder ähnlich nömmt harrn, vunwegen datt de Römers allens, wat se nich kennen döen, geern en latienschen Stempel updrückt hefft. Spraakforschers wüllt nu rutfunnen hebben, datt Brica oder Briga slichtweg Wohnstäe an't Water heten schall. Mit en Froen-Gottheit Brigantia schall de Naam na neeste Kennis nix to kriegen hebben. Över en Schriftkultuur is bi de Briganten nix bekannt.

Anner Bedüden ännern

In de romaanschen Spraken is Briganten, ahn, datt dat wat mit de Kelten to doon harr, en anner Woort för Prachers, Stackerts un Beddellüde (frz. brigants).

Weblinks ännern

  Briganten. Mehr Biller, Videos oder Audiodateien to’t Thema gifft dat bi Wikimedia Commons.