Carl Detlev Marschalck von Bachtenbrock
Carl Detlev Freiherr Marschalck von Bachtenbrock (* 9. Februar 1802 in Veern; † 11. Juni 1864 in Hannover) weer en hannöverschen Verwaltungsbeamten. He weer Arvherr op Aschhorn un Bokel.
Marschalck is 1802 in Veern as Söhn von Amalie, borene Schulte von der Lühe, un Karl Friedrich von Marschalck (16. März 1754–11. Dezember 1818) in de Familie Marschalck von Bachtenbrock rinboren. Sien Broder weer Otto Alexander Marschalck von Bachtenbrock, de ok de rode Marschalck nöömt worrn is. Carl Detlev sülvs weer de swarte Marschalck. An’n 3. Mai 1819 hett he sik as Student von de Juristeree an de Universität Göttingen inschreven un weer dor Maat von dat Corps Bremensia.[1] 1823 weer he Auditer bi de Ämter Heien, Neehuus un Stood. 1832 weer he al Regerungsraad bi de Regerung in Ossenbrügge. Dor harr he en Affäär mit en verheiraadt Fro, wat an’n 19. Februar 1833 to en Volksoploop von 1200 Lüüd in Ossenbrügge föhrt hett. He is dorüm in dat Johr ut dat Amt smeten worrn. 1835 is he na en Uttied von üm un bi een Johr Regerungsraad bi de Regerung in Hannover worrn. 1841 hett Marschalck na’n Dood von’n Landdrost von de Landdrostie Auerk, Anton Friedrich Christian von Wersebe, dat Amt as Landdrost övernahmen. Sien Insetten hett dor to föhrt, dat sik de Revolutschoon von 1848/1849 in Oostfreesland kuum utwarkt hett. 1857 is Marschalck von Wilhelm Friedrich Otto von Borries ut dat Amt drängt worrn. He is denn toeerst to sien öllern Broder Otto Alexander tagen, de Landdrost von de Landdrostien Ossenbrügge un Stood weer. Nadem sien Broder 1858 doodbleven is, hett Marschalck sien Levensmiddelpunkt na Veern leggt un den Sommer över op dat Good Bokel.
Marschalck hett an’n 1. Juli 1844 in Gödens Hildur von Wedel-Jarlsberg freet (14. April 1814–25. November 1901), de Dochter von Fredrik Wilhelm Wedel-Jarlsberg.[2] De beiden harrn de Döchter Ingeborg Margarethe Louise Ottilie Marschalck von Bachtenbrock (13. August 1845–11. August 1910). de Emil Ferdinand Victor von Hammerstein-Gesmold freet hett, un Hildur Amalie (17. August 1847–25. Januar 1922), de Kanonisse in Niewohl un Auerk weer.
Literatur
ännern- Walter Deeters, Martin Tielke: Carl Detlev Freiherr Marschalck von Bachtenbrock. In: Biographisches Lexikon der Stiftung Ostfriesische Landschaft. Band 4, Auerk 2007, Sieden 295–297