Carl Nörtemann

Carl August Nörtemann (* 15. November 1891 in Eberstadt; † 1974) weer en düütschen Politiker von de NSDAP un de CDU.

Nörtemann is 1891 as Söhn von’n Dischermeester Heinrich Nörtemann in Eberstadt boren un weer von 1903 bet 1909 op de Realschool in Haspe. Denn güng he bet 1912 na de Oberrealschool in Hagen un hett dor dat Abitur maakt. He hett denn an de Universität Berlin Weertschopswetenschoppen un Juristeree studeert un tweeunhalv Johr en praktische Utbillung bi Siemens & Halske in Berlin maakt, de för sien Weertschopsstudium empfohlen weer. Von 1914 bet 1918 weer he Soldat in’n Eersten Weltkrieg. He is dor verwunnt worrn un weer för dree Maand in’t Lazarett. Na de Tied in’t Lazarett hett he Urlaub kregen un hett in disse Tied in’n Juli 1918 in Griepswoold sien Dokter in Juristeree maakt.

Von April 1919 bet März 1925 weer he Baas von dat Statistische Amt in Hagen. Blangenbi hett he noch Studien in Staatswetenschoppen an de Universitäten Köln un Mönster bedreven. In’n März 1925 is he Börgermeester von Dannenbarg worrn un dat bet 1938 bleven. Blangenbi hett he 1932 bet 1935 as Gasthörer an de Universität Hamborg studeert un 1936 sien tweten Dokter maakt.

Denn weer Nörtemann von 1938 bet 1943 as Nafolger von Hans Arthur Meyer Börgermeester von de Stadt Stood. Nadem he 1943 in’n Tweten Weltkrieg na de Wehrmacht inropen worrn is, hett för en Tied Eduard Kühl vertredungswies dat Amt as Börgermeester övernahmen.

Na’n Krieg is he in de CDU ringahn un weer von 1955 bet 1958 Bezirksvörsitter von’n CDU-Bezirk Stood.

Warken

• Besteht gegenüber den Reichsgesetzen das Erfordernis der Sanktion? Dokterarbeid, 1919
• Das deutsche Sparkassenwesen unter dem Einflusse der Sparkassengesetzgebung des Reichs. Dokterarbeid, Berlin 1936