Christian Eberhard (Oostfreesland)

Fürst Christian Eberhard vun Oostfreesland (* 1. Oktober 1665 in Esens; † 30. Juni 1708 in Auerk) ut dat Huus Cirksena weer siet Gebort Fürst vun Oostfreesland, bleev aber bit 1690 ünner de Vörmundschap vun sien Moder Christine Charlotte.

Christian Eberhard

Leven

Christian Eberhard wurr eerst nah den Dood vun sien Vader, Fürst Georg Christian boren. He is tonächst an den Hoff in Auerk upwussen. In dat Öller vun teihn Johr hett sien Moder hüm to’n Optrecken in’t Utland schickt. Nah Uphollen in de Nedderlannen, Piemont un Frankriek weer he nah 1681 in Italien un Öösterriek. Bi disse Reisen hett he den Vesuv besteegen, hett in Rom de Königin Christina vun Schweden besöcht un is in Paris up den Sünnenkönig Ludwig XIV. drapen.

He hett ganz langsam de Regeerensverantwortung övernommen. Eerst 1690 hett he de Nahfolge vun sien Moder antreeden, ofschons de mit hör in stännig Utnannersetten verbunnen Stände dat all lang fordert harrn. Sien Herrschapstiet weer dorgegen vun Utglieksbemöhen präägt. So hett he 1693 in Hannober un 1698 in Auerk eenig Verglieken mit de Landstände slooten un hett dormit den binneren Freeden festigt. Dat keem bi de Bevölkerung goot an. He kreeg den Binaam „de Freedsame“ un wurr as een vun de wenig oostfreesch Landsherren früendlich in Emden upnommen, as he de Stadt 1699 besöcht hett.

Christian Eberhard gull as ümsichtig, tolerant un pietistisch. As ok all sien Moder hett he den Reformeerten wiedere Rechte togestahn, ofschons he sülvst lutherisch weer. In de Regeerenstiet vun Christian Eberhard fallt ok de Anwartschap vun Brannenborg up Oostfresland, de sück Friedrich III. bi den Kaiser sekern dee un dormit den Grundsteen för de preußische Okkupatschoon vun Oostfreesland nah dat Utstarven vun de Cirksena in dat Johr 1744 legg. Christian Eberhard hett versöcht, dem en Arvverbrödern mit den Hartog Ernst August to Brunswiek un Lümburg entgegentosetten. Dat Haus Cirksena sull dornah in den Fall vun dat Utstarven vun de Nahkommen vun den Welfenhartog Ernst Augusts de arvlich Nahfolge in de Grafschapen Hoya un Deepholt antreeden. De Verdrag is aber wegen de nich inhaalt Tostimmung vun den Kaiser nich in Kraft treeden.

Christian Eberhard, de siet fröheste Kindheit all immer kränklich weer un dorum up sien Reisen immer vun sien Lievdokter Eberhard Bacmeister begleit wurr, is 1708 as völ anner Cirksena ok all in jung Johren storven. Hüm is denn sien tweet Söhn Georg Albrecht nachfolgt.

Familie

Fürst Christian Eberhard weer mit Eberhardine Sophie zu Oettingen-Oettingen (* 16. August 1666, † 30. Oktober 1700), Dochter vun Fürst Albrecht Ernst I. un Süster vun Christine Luise von Oettingen-Oettingen, verheiraadt. Dat Paar harr folgen Kinner: :

• Leopold Ignaz (* 10./20. Februar 1687, † 11./21. Juni 1687)
• Christina Sophia, (* 16. März 1688 in Bayreuth; † 31. März 1750 Rudolstadt); ∞ in Rudolstadt 31. Dezember 1728 Fürst Friedrich Anton I. von Schwarzburg-Rudolstadt (* 14. August 1692; † 1. September 1744)
• Marie Charlotte, (* 10. April 1689, † 9. Dezember 1761) ∞ am 10. April 1709 hör Cousin Friedrich Ulrich vun Oostfreesland (* 31. Dezember 1667; † 13. März 1710), Söhn vun Edzard Ferdinand.
• Georg Albrecht, Fürst vun Oostfreesland (1690–34), siet 1722 Ridder vun den Olifanten-Orden

∞ Idstein 24. September 1709 Gräfin Christiane Luise von Nassau-Wiesbaden-Idstein (* 31. März 1691; † 13. April 1723), Dochter von Georg August Samuel von Nassau-Wiesbaden-Idstein (1665–1721) un Henriette Dorothea von Oettingen, ∞ in Berum an’ 8. Dezember 1723 Sophie Karoline von Brandenburg-Kulmbach (* 1705 † 7. Juni 1764), Dochter vun Christian Heinrich von Brandenburg-Kulmbach

• Ulrich Friedrich (* 18. Juli 1691; † 21. September 1691)
• Karl Enno (* 25. Dezember 1692; † 3. August 1709)
• Friederike Wilhelmine (* 4. Oktober 1695; † 29. Juli 1750, Auerk) Kanonistin in Herford
• Enno August (* 13. Februar 1697; † 3. August 1725)
• Juliana Luise (* 13. Juni 1698 in Auerk; † 6. Februar 1740 in Harzgerode); ∞ an’ 17. Februar 1721 in Brunswiek Joachim Friedrich von Schleswig-Holstein-Plön (* 1668; † 25. Januar 1722)
• Christine Charlotte, (* 17. September 1699; † 23. August 1733)

Nah den Dood vun sien eerst Fru hett he 1701 to linke Hand Anna Juliana von Kleinau (1674–1727) heiraadt, de den Titel Frau von Sandhorst kreeg. Anna Juliane weer Hofffräulein vun de Fürstin ween, hör Öllern weer de Böverförstersöhn ut Mecklenburg-Güstrow Heinrich von Kleinau un de sien Ehefru Sophia Klara von der Osten, Dochter vun den Ollnborger Landdrosten vun’ Demost Hieronymus Georg von der Osten (* 2. Mai 1612; † 28. Mai 1659). De dree Kinner vun den Fürsten Christian Eberhard vun Oostfreesland ut de morganatisch Ehe mit Juliane Kleinau hemm de Naam von Sandhorst führt, dorünner:

• Sophie Antoinette Juliane von Sandhorst, (* 4. Januar 1707; † 14. Januar 1725), (storven an de Pocken, begraven in dat Cirksena-Mausoleum in Auerk)

De starvlich Överresten vun den Fürsten liggen in en Sammelsarg in dat Cirksena-Mausoleum in Auerk.

Literatur

• Martin Tielke (Hrsg.): Biographisches Lexikon für Ostfriesland. 3 Bände. Ostfriesische Landschaftliche Verlags- und Vertriebsgesellschaft, Auerk 1993–1997, ISBN 3-925365-75-3 (Bd. 1), ISBN 3-932206-00-2 (Bd. 2), ISBN 3-932206-22-3 (Bd. 3).
• Ernst Esselborn: Das Geschlecht Cirksena. Die Häuptlinge, Grafen und Fürsten von Ostfriesland. s. n., Berlin-Pankow 1945.

Weblenken

• http://genealogy.euweb.cz/frisia/cirksena2.html#CE1