Hauptmenü öffnen

Claus Johannßen

düütsch Politiker
Johannßen 2008

Claus Johannßen (* 20. Dezember 1953 in Oterndörp) is en düütschen Politiker von de SPD.

Johannßen is 1953 in Oterndörp boren un hett na de School en Lehr as Goorner maakt. He güng denn na de Fachoberschool Ossenbrügge un hett an de Fachhoogschool Ossenbrügge Landpleeg studeert. Von 1975 bet 1979 weer he Goorner in Cuxhoben. Na de Meesterschool in Kiel hett he 1980 sien Meester maakt. 1982 hett he as sülvstännigen Goornermeester in Oterndörp anfungen.

1973 is Johannßen in de SPD gahn un weer von 1976 bet 1979 in’n Gemeenraad von Oterndörp un von de Samtgemeen Hadeln. 1981 is he wedder in den Raad von de Samtgemeen un 1991 in’n Raad von de Gemeen wählt worrn. 1986 is he denn noch in’n Kreisdag von’n Landkreis Cuxhoben kamen. 2001 is he Vörsitter von de SPD-Frakschoon in’n Kreisdag worrn.

2003 is he över de Landslist för de SPD in’n Neddersassischen Landdag rinkamen. Bi de Landdagswahl 2008 kunn he aver nich wedder in’n Landdag intehn. Op de Landslist weer he nich wied noog vörn un as Direktkannedaat in’n Landdagswahlkreis Hadeln/Wersermünn hett he sik gegen David McAllister (CDU) nich dörsetten kunnt (Johannßen hett 32 % von de Eerststimmen kregen).

För de Bundsdagswahl 2009 hett he sik as Nafolger von Annette Faße beworven, kunn sik aver SPD-intern nich dörsetten. Bi de Kommunalwahl an’n 12. September 2011 weer he Kannedaat för dat Börgermeesteramt in Oterndörp un hett sik gegen sien Vörgänger Hermann Gerken dörsett.

Johannßen is verheiraadt un hett dree Kinner.

WeblenkenÄnnern