Coming to America
Coming to America (op Platt so veel as „Na Amerika kamen“; dt. Titel: Der Prinz aus Zamunda) is de Titel vun en US-amerikaansche Filmkummedie vun den Speelbaas John Landis ut dat Johr 1988. De Geschicht vun de Film is vun Eddie Murphy schreven worrn, de ok sülvst de Hööftrull speelt.
| Filmdaten | |
|---|---|
| Plattdüütsch Titel: | — |
| Originaltitel: | Coming to America |
| Düütsch Titel: | Der Prinz aus Zamunda |
| Produkschoonsland: | USA |
| Johr vun’t Rutkamen: | 1988 |
| Läng: | 116 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | John Landis |
| Dreihbook: | David Sheffield, Barry W. Blaustein |
| Produkschoon: | George Folsey Jr., Robert D. Wachs |
| Musik: | Nile Rodgers |
| Kamera: | Sol Negrin, Woody Omens |
| Snitt: | Malcolm Campbell |
| Kledaasch: | Deborah Nadoolman |
| Dorstellers | |
| |
Inholt
ännernAkeem is en Prinz. Es Söhn vun’n König is he de Throonfolger vun Zamunda, en fiktiven Staat in Afrika. He warrt in Luxus un Riekdom groot togen un vun morgens bit Avends vun de tallrieken Deenstlüüd betütert un ründüm versorgt – nich mol den Oors dröff he sik sülvst afwischen. Un an sien 21. Geboortsdag – so will dat en olle Traditschoon – schall he mit en standsmatige Fro verheiraadt warrn. Man, Akeem is mit sien Leven nich tofreden, vun wegen, dat he noch nienich wat sülvst maakt hett.
Üm de Dwangshochtiet to hinnern, beslutt he, mit sien königlichen Dener un besten Fründ Semmi na Amerika to reisen. Sien Vadder gifft em Verlööf, as he annimmt dat Akeem sik dor vörher noch ’n beten utjachtern müch, vördem he heiraden deit, man, in Wohrheit will he sik dor en Bruut söken, de em gefallt un de he leev hett. As dat Loos doröver befunnen hett, dat de Reis na New York City gahn schall, is dat blots logisch, dat Akeem sik den Stadtdeel Queens (eng.: „Königinnen“) utsöcht, üm dor sien Fro to finnen.
In New York geevt sik Akeem un Semmi as Studenten ut Afrika ut, de keen Geld hebbt, un teht in en afsluut rünnerkamen Bood in. Toeerst versöökt se dat in en Bar, en Fro na sien Smack to finnen, man dat haut nich rech hen. Denn aver dröppt Akeem en smucke Deern, in de he sik foorts verkieken deit: Lisa, de Dochter vun den Besitter vun McDowell’s Fast-Food-Restaurant. Üm ehr neger to kamen, laat sik Akkem un Semmi in dat Restaurant as Helspkräft instellen. So eenfach is dat aver man nich, vun wegen dat Lisa al en Fründ hett, den rieken un inbüllten Darryl.
Wiel Akeem vun sien nee Leven in Armoot un Eenfachheit gor nich noog kriegen kann, is Semmi dormit gor nich tofreden. He lett de rünnerkamen Wahnung in Queens in en luxuriös Appartment ümboen. Akeem is dormit nich inverstahn un nimmt em dorüm dat Geld, dat so un so nich Semmi tohöört, weg. Man, Semmi hollt dat nich länger mehr ut un schrifft dorophen en Breef an den König un beddelt dorin üm mehr Geld.
De König will sik nu sülvst en Bild dorvun maken, wat in New York passeert un reist mit sienen königlichen Staat na Queens, woneem he sik nu aver vun sien Söhn över’t Ohr hauen föhlt. Dör dat Opduken vun’n König kriegt nu aver Lisa un ehr Vadder spitz, wokeen de vörgeevlich arme Student in Wohrheit is. Twüschen Lisa un Akeem gifft dat den Striet, vun wegen dat he nich ehrlich weer – un vör allen, vun wegen dat sien Vadder ehr vertellt hett, dat Akeem sik blots to’n Spaaß mit ehr vergnöögt hett. Akeem gifft op un seggt to, de Fro to heiraden, de för em utsöcht worrn is. Vör den Troaltor steiht he denn sien versleierte Bruut gegenöver, de to Akeem grode Överraschen Lisa is, so dat he opletzt doch noch sien Fro kriggt.
Anners wat
ännern- Eddie Murphy speelt blangen de Hööftrull Akeem noch veer Nevenrullen (Clarence, Randy Watson, Saul un Sanyu), in de he aver vun wegen dat Make-up kuum wedder to kennen is.
- Ok Arsenio Hall hett blangen sien Rull as Semmi noch wietere dree Rullen (Morris, Paster Brown un de asige Deern in de Bar)
- In en korte Szeen speelt Don Ameche un Ralph Bellamy in de Rullen as Mortimer un Randolph Duke, twee vun de Hööftfiguren ut den Film Trading Places, de ok vun John Landis is. De beiden harrn dorin jemehr Vermögen wegen en Wett an Billy Ray Valentine, speelt vun Eddie Murphy, verloren. As Obdacklose warrt se in dissen Film vun Akeem funnen, de jem en mit Geld füllte Papeertüüt schenkt. Randolph reageert dorop mit den Satz: „Mortimer, wi sünd wedder dor!“ un speelt dormit op den fröheren Film an.
- De Filmproduzenten hebbt sik för den Bruuk vun den Naam McDowell’s vun de echte Restaurantkeed McDonald’s Verlööf hollt, vun wegen de apen Anspelen op den Konzern. Dreiht worrn is de Film ü.a. in een Wendy’s Restaurant in Queens.
- 1990 is de US-amerikaansche Satiriker Arthur Buchwald gegen Paramount Pictures vun wegen de Adaptschoon vun een vun sien Vertellen, worop de Film baseert, ahn Verlööf vör Gericht gahn. Buchwald hett den Prozess wunnen.
Kritiken
ännern- Lexikon vun’n internatschonalen Film: Ein afrikanischer Prinz begibt sich inkognito auf Brautschau nach New York, wird fündig, muß sich aber mit einer anderen Welt und seiner vermeintlichen Armut auseinandersetzen. Naives Filmmärchen mit einigen fröhlichen Seitenhieben, das Unterhaltung für die ganze Familie bieten will; auf Eddie Murphy abgestimmt, der Proben leiseren Komödiantentums zum besten geben kann.
- Scott Weinberg: John Landis’ letzte große Komödie ist ein wahres Eddie Murphy-Festival.[1]
Utteken
ännernDe Film weer in’t Johr 1989 in de beiden Kategorien Best Make-up un Best Kledaasch för’n Oscar nomineert. To’n Winnen hett dat nich reckt, man de Film is liekers mit fief Priesen uttekent worrn:
- 1988: mit de Goldenen Lienwand.
- 1989: mit den BMI Film Music Award för Nile Rodgers.
- 1989: mit den American Comedy Award in de Kategorie Best Nevendorsteller för Arsenio Hall.
- 1990: mit den Image Award in de Kategorie Rutragen Speelfilm.
- 1990: mit den Image Award in de Kategorie Rutragen Nevendorsteller för Arsenio Hall.
Borns
ännernWeblenken
ännern- Coming to America in de Internet Movie Database (engelsch)