Corozal United Front

De Corozal United Front (CUF, Vereenigte Front von Corozal) weer en polietsche Partei in Belize. De Partei weer blots in’n Distrikt Corozal aktiv.

De Partei hett sik an’t Enn von dat Johr 1973 grünnt, nadem sik Santiago Ricalde in’n November 1973 von de People’s United Party (PUP) loosseggt hett. Ricalde hett meent, dat de PUP nich de Intressen von de Lüüd in’n Distrikt Corozal vertreden dee. De eerste Vörsitter weer Omar Vellos. Annere Politikers, de sik de Partei anslaten hebbt, weren Israel Alpuche, Andres Campos, Edmond Longsworth un Maria Reyes.

An’n 8. Februar 1974 hett dat in’n Stadtraad von Corozal en Nawahl geven, üm den Seet wedder to besetten, den Ricalde freemaakt harr. Düsse Wahl hett Andres Campos för de CUF wunnen.

Bi de Parlamentswahl in Belize an’n 30. Oktober 1974 harr de CUF en Wahlbündnis mit de United Democratic Party (UDP). De CUF is in’n Distrikt Corozal antreden un de UDP in’n Rest von dat Land. In’n Wahlkreis Corozal Süüd hett Santiago Gongora 26,1 % von de Stimmen haalt un in’n Wahlkreis Corozal Noord Edwardo Tillett 44,0 %. Dormit kunn keen Kannedaat in dat Repräsentantenhuus intehn.

An’n 23. Dezember 1975 hett de CUF all söven Seten in’n Stadtraad von Corozal wunnen. Dat weer de letzte Wahl, bi de de Partei aktiv weer. Na de Wahl is de Partei ingahn un de Maten hebbt sik to’n groten Deel de UDP anslaten.