Cutaway (Film)
Cutaway (op plattdüütsch so veel as „wegsneden“; dt. Titel: Cutaway – Jede Sekunde zählt!) is en US-amerikaanschen Actionfilm ut dat Johr 2000. Bi de Feernsehprodukschoon weer Guy Manos Speelbaas, de tosamen mit Greg Manos dat Dreihbook schreven hett.
| Filmdaten | |
|---|---|
| Plattdüütsch Titel: | — |
| Originaltitel: | Cutaway |
| Düütsch Titel: | Cutaway – Jede Sekunde zählt! |
| Produkschoonsland: | USA |
| Johr vun’t Rutkamen: | 2000 |
| Läng: | 94 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Guy Manos |
| Dreihbook: | Greg Manos Guy Manos |
| Produkschoon: | David Glasser Greg Manos Adam M. Stone |
| Musik: | Larry Brown |
| Kamera: | Norman Kent Gerry Lively |
| Snitt: | Martin Hunter |
| Szenenbild: | Bob Butcher |
| Kledaasch: | Katherine Swartz |
| Dorstellers | |
| |
Inholt
ännernVictor Cooper is en Agent vun’n U.S. Customs Service, de al fakener mit Spood verdeckte Ünnersöken maakt hett. He kriggt den Opdrag, in Miami verdeckt en Fall vun Drogensmuggel optokloren, man as de Fleger vun den Smuggler hoochnahmen warrn schall, geiht allns scheef. Dat will Victor nich op sik sitten laten. He hett en verdacht, un besöcht en öörtliche School för Fallschirmspringen. Dor finnt he wohrhaftig en Spoor: Dat Foto vun en Flegersche, de he al länger in Verdacht harr. Üm mehr över de Fro ruttofinnen, slüüst he sik in de Grupp in un lett sik to’n Fallschirmspringer (Skydiver) utbilln. He weet, dat he dat Vertroen vun den Baas vun de Grupp, Red Line, kriegen mutt, wenn he wat rutfinnen will un dat he dorto sien Talent bewiesen mutt. Also lett he sik vörher vun en Spezialisten vun de U.S. Army in’n Windkanal fitmaken.
Mit sien heemlich antraineert Künnen kann he wohrhaftig Indruck schinnen un maakt den Anschien, al to Anfang vun sien Utbilln wiet över dat Niveau vun normale Springers to liggen. As Cooper sien Utbiiln afslaten hett, lett he sik dorop in, to doon, wat all annern vör em ok maakt hebbt: He „navelt sik af“, dat heet, he lett all Dwäng vun de kapitalistischen Sellschop achter sik. So warrt he vun Red Line in sien Formatschoon opnahmen. Se verfolgt dat Teel, sik bi’t Formatschoonspringen in de Phaas vun’n fre’en Fall mööglichst gau tosamentosluten (Speed Star).
Cooper föhlt sik na en Tiet hen un her reten: Dat fre’e Leven op’n Flaagplatz, dat Tosamenhollen vun de Grupp un dat Geföhl vun Freeheit ahn Grenzen, un nich toletzt ok sien Geföhlen för Star nehmt em för dat ne’e Leven in, wat op de annern Siet ok sien Baas Lt. Margate spitz kriegen deit.
Gau stiggt Cooper in de Hierarchie vun de Skydivers op un arbeit sik op jümmer sworere Positschonen (Line Up) binnen de Formatschooon hooch. As he kort dorför steiht, den Platz vun Red Line sien drangsten Vertroeten Turbo intonehmen, speelt sik de anwassen Aggressivität twüschen Turbo un Vic jümmer mehr hooch un ennt mit den Dood vun Turbo, as de ahn to bremsen in de Formatschoon flüggt. Vun dor an is Vic de ne’e Viez vun Red Line, de nu ok op en ne’en tweeten Mann bi sien Drogensmuggelee anwiest is. He snackt Vic dorop an, de dorop ingeiht.
Na en poor spoodrieke Övergaven warrt Red Line besehrt un warrt meist fastnahmen. Dorbi drauht ok Vic sien Identität optoflegen. Man, Vic kann mit Red Line utneihn. In’n Gegentog verspricjt he sien Baas Lt. Margate, dat he Red Line sülvst fastnehmen will. Gegenöver Star un Red Line will he sien Identität noch nich verraden, diskuteert aver mit jem un beslutt an en Wettstriet vun de Formatschoonsspringer deeltonehmen. De Winners hebbt de Mööglichkeit hoge Sponserverdrääg to kriegen. För de Grupp de dat bedüden, dat se jemehr Höbby nie mehr mit illegale Smuggeltransporten finanzeren mööt.
Bi dat Duell twüschen de Miami-Grupp üm Red Line un Victor un de Grupp vun de U.S. Army üm Utbiller Delmira – de ok Victor sien Grundweten bibröcht hett – geiht dat hooch her. En Weltrekord na den annern fallt, un de eenzige Chance för Victor sien Grupp is, en utermatige Tiet to ünnerbeden. Wohrhaftig bleift ünn 10 Sekunnen – wat nümms je för mööglich hollen harr – un winnt dormit den Wettstriet. En Droom warrt wohr.
An’n Fallschirm gifft sik Victor gegenöver Red Line to kennen. De aver will nich in’t Gefängnis un tütt Sülvstmoord vör: He maakt sien Schirm af. As Victor an’n Bodden blangen de Liek vun Red Line sitt, mutt he en letzt mol twüschen en Leven as Polizist oder as Skydiver wählen. He besinnt sik, dat he sik al „afnavelt“ hett un beslutt, bi dat Team to blieven.
Kritik
ännern- Dat Lexikon vun’n internatschonalen Film schreev, dat de Film vun en Spezialist för’t Fallschirmspringen anricht worrn weer, man mit teemlich wenig Spannung röver keem. De Figuren weern as klischeehaft un ahn Deepgang beschreven. Kortfirstig Intresse an den Film keem blots vun de Sprungszenen, de den Aten roven deen.[1]
- Ryan Cracknell hett in’n Apollo Movie Guide kund doon, dat de Film to 90% ut Action bestünn, to 7% ut Geschicht un to 3% ut Vör- un Afspann. Dat Problem vun Cutaway weer, dat de Film twee Geschichten vertell, wo een recken de. De Produzenten harrn en Film över’t Fallschirmspringen maken wulln; de Geschicht över de verdeckte Ünnersöken weer afsluut nich nödig. Rodman weer in sien Rull as legen Kerl as „unvermodens plausibel“ betekent.[2]
- Dat Filmmagazin Cinema beteken den Film as Point Break för arme Lüüd un faat de Kritik tosamen mit: „spektakuläre Stunts, zaitlich Dreihbook“.[3]
Achtergrund
ännernDe Feernsehfilm is in Fort Bragg (North Carolina) un in Miami dreiht worrn.[4] De Kosten för de Produkschoon legen bi ruchweg 9 Millionen US-Dollar.[5] För den Speelbaas weer dat de eerste Film, he hett vörher al de Fallschirmstunts in den Film Eraser koordineert. Bi wietere Filmen as Cliffhanger, Last Action Hero oder Virus hett he sülvst as Stuntman mitarbeit.[6][7]
Borns
ännern- ↑ Filmkritik in’t Lexikon vun’n internatschonalen Film afropen an’n 20. September 2007
- ↑ Filmkritik vun Ryan Cracknell afropen an’n 20. September 2007
- ↑ Cinema.de: Filmkritik in Cinema afropen an’n 11. Januar 2013
- ↑ Dreihöörd för Cutaway afropen an’n 20. September 2007
- ↑ Box office / Produkschoonsinformatschonen to Cutaway afropen an’n 20. September 2007]
- ↑ uk.rottentomatoes.com afropen an’n 20. September 2007]
- ↑ german.imdb.com afropen an’n 20. September 2007]