Point Break (1991)
Point Break (op platt so veel as „Steed vun’t Breken“; dt. Titel: Gefährliche Brandung) is de Titel vun en US-amerikaanschen Actionfilm ut dat Johr 1991 mit Patrick Swayze un Keanu Reeves in de Hööftrullen. Speelbaassche weer Kathryn Bigelow. Point Break is in’n Jargon vun de Surfers de Oort vun en in de See rinragen Landtung, woneem sik de Bülgen breken doot.
| Filmdaten | |
|---|---|
| Plattdüütsch Titel: | — |
| Originaltitel: | Point Break |
| Düütsch Titel: | Gefährliche Brandung |
| Produkschoonsland: | Vereenigte Staten un Japan |
| Johr vun’t Rutkamen: | 1991 |
| Läng: | 117 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Kathryn Bigelow |
| Dreihbook: | W. Peter Iliff |
| Produkschoon: | Peter Abrams Robert L. Levy |
| Musik: | Mark Isham |
| Kamera: | Donald Peterman |
| Snitt: | Howard E. Smith |
| Szenenbild: | Peter Jamison |
| Dorstellers | |
| |
Inholt
ännernBodhi is de Anföhrer vun en poor Surfers, de jemehr Leven mit Surfen un Fallschirmspringen tobringen doot. Dat Geld dorför halt se sik dör Banköverfäll. In de verleden dree Johren hebbt se ruchweg dörtig mol toslahn, wobi se jümmer gau un akkerat vörgaht un na hööchsten s90 Sekunnen wedder ut de Bank rut sünd. Besehrt weer dorbi nümms. Bi jemehr Överfäll betekent se sik sülvst as de Ex-Präsidenten, vunwegen dat se Masken vun fröhere US-Präsidenten drägen doot.
De Behöörden weet nich wieter, vunwegen dat de Rovers keen Sporen torüchlaten doot. Man, de tostännige FBI-Agent Angelo Pappas hett de Theorie, dat de Rovers ut de Surfszeen kamt vunwegen jemehr Koordinatschoon un annere Henwiesen. Em warrt de Neetogang John Utah an de Siet stellt, womit he eerst gor nich recht kloor kummt. Man mit Utah sien Energie kummt ne’en Swung in de Saak. as verdeckt Nakieker fangt Utah an dat Surfen to lehren, üm sik in de Szene inslieken to künnen. He maakt sik an de Surfersche Tyler ran, de em dat Surfen bibringen schall. Se is de ehmolige Bruut vun Bodhi. Över ehr kriggt Utah Kuntakt to Bodhi un sien Lüüd, de he as fründliche Minschen kennenlehrt, de blots dat Surfen un de Freid an’t Leven in’n Kopp hebbt. Man, en annere Grupp vun Surfers, de tallrieke Vörstrafen hebbt un as Nazis gellt teht Utha sien Verdacht op sik. As se jem hoochnehmt stellt sik aver rut, dat se nix mit de Överfäll to doon hebbt.
Mit de Tiet frünnt sik Utah jümmer mehr mit de Leevoort vun Bodhi sien Lüüd an un finnt sik dorin ok sülvst wedder, sik den Ruusch vun Adrenalin hentogeven un den Alldag to vergeten. Bito kummt he Tyler neger un de beiden warrt en Poor. He vertellt aver, dat he Afkaat is. Vun sien Opdrag as FBI-Agent seggt he nix. Sien Verdacht fallt inwtüschen op Bodhi un sien Mackers. Mit sien Kolleeg Pappas överrascht he jem bi en Bankroov un verfolgt Bodhi, de as Reagan tarnt is. He fallt dorbi hen op sien besehrt Knee. He foddert Bodhi op, de noch in Scheetwiet is, stahn to blieven, wat de aver nich maakt. Op em to scheten bringt Utah aver nich fardig, so dat Bodhi utneihn kann.
Den Dag dorop warrt Utah to’n Fallschirmspringen afhalt. Bodhi seggt em, dat se Tyler an en gehemen Oort as Börgsche fasthollen doot, un dat Utah an den letzten Roov vun de Saison deelnehmen mutt. Wenn nich, warrt Tyler ümbröcht. In’n Gegensatz to de annern mutt Utah ahn Maske in de Bank un dor de Kunnen in Schach hollen. Man, ditmol duert de Överfall länger as 90 Sekunnen, vunwegen dat Bodhi ditmol nich blots de Kass, man ok den Tresor utroven will. En Kunn, de sik as Polizist to kennen gifft, grippt sik en Pistool un schütt een vun de Rovers doot, vördem he vun Bodhi afschaten warrt. Utah warrt daalslahn un in de Bank torüch laten.
Mit en Privatfleger will de Bande na Mexiko utbüxen. An’n Flaaghaven fangt Utah un Pappas jem af, wo dat to en Scheeteree kummt. Pappas un een vun de Rovers kamt dorbi üm. Utah warrt vun Bodhi dwungen mit em un den besehrten Roach to flegen. De annern beiden springt ünnerwegens mit de eenzigen Fallschirmen af, man Utah stört sik in’n fre’en Fall achteran un klammert sik an Bodhi. As Bodhi dat nich sülvst deit, tütt he in letzte Sekunn den Fallschirm. Roach is inwtüschen an sien Sehr dootbleven. Rosie kummt an’n Bodden mit Tyler dorto, de op Bodhi sien Anwiesen freekummt. Utah kann nix doon, as Bodhi wedder dorvun kummt.
En Tiet later warrt Bodhi wiest, de alleen in en Storm an’n Strand vun Bells Beach in Australien steiht, woneem he sik de hogen Bülgen ankiekt. All annern Surfers hebbt den Strand verlaten, vunwegen dat en Hurrikan optehn deit. Bodhi harr Utah inst dorvun vertellt, dat he övertüügt is, dat he dor de Superbül finnen wull, wenn en Storm optehn deit, de blots all föfftig Johren kummt. As de Polizisten neger kamt, seggt Utah em to, dat he en letzt mol op de resenhaften Bülg rieden dröff – wat teemlich seker Bodhi sien Doot ahnen lett. Utah smitt sien Deenstmarke in’n Sand un geiht weg.
Kritik
ännern- Blickpunkt:Film schreev vun en ästhetischen Actionrieter, in den Swayzee in de Rull vun en Surf-Guru övertügen deit.
- Dat Heyne Filmlexikon betekent Point Break as schieren Actionfilm mit en mystischen Inslag.
- Op Filmstarts.de meen Martin Soyka, dat Point Break en spannenden un goot fotografeerten Popcorn-Film weer, de ünnerhollen de un ok na föffteihn Johren noch goot to kieken weer[1].
- Kino.de oordeel, dat Bigelow Reeves un Swayze vun een to’n annern Hööchdpunkt drieven un, as de Surfgang ut’n Film, na jümmer ne’e Adrenalinstööt söken de. Dat schien, as wenn de ’n beten huckelige Geschicht gor nich intresseren de. Opletzte harr se dormit wedder mol en prächtig dörkumponeerte Oper ut Gewalt un Geföhlen henkregen[2].
Utteken
ännernDe Film weer 1992 in dreemol bi de MTV Movie Awards vörslahn. Wunnen hett he een dorvun, neemlich in de Kategorie Most Desirable Male för Keanu Reeves.
Anners wat
ännern
De Film is kumplett in de USA dreiht worrn, neemlich in de Bundsstaaten Kalifornien, Oregon, Utah un Hawaii. De Fallschirm-Szenen weern över’n Lake Powell dreiht. De Dreiharbeiten hebbt an’n 9. Juli 1990 anfungen un bit to’n 24. Oktober 1990 anduert. De Kosten vun de Produkschoon warrt op ruchweg 24 Millionen US-Dollar schätzt. Inspeelt hett Point Break in de Kinos üm un bi 83 Millionen US-Dollar, dorvun 43 Millionen in de USA. De Premiere vun Point Break weer an’n 12. Juli 1991 in de USA, in Düütschland weer de Film af den 19. September 1991 to sehn.
De Naam vun Swayze sien Figur betütt sik op den Buddhismus (kiek bi Bodhi un Bodhisattva).
Bi jemehr Överfäll drägt de Rovers Masken vun de US-Präsidenten Ronald Reagan, Lyndon B. Johnson, Jimmy Carter un Richard Nixon. Eenmol seegt de Rover mit de Nixon-Maske „I’m not a crook“ (so veel as „ik bün keen Schubbjack“), wat Präsident Nixon wöörtlich in’n Tosamenhang mit den Watergate-Schandaal seggt hett[3]. Ofschoonst in de Szeen dat Gesicht vun den Schauspeler wegen de Maske nich to sehn is un dat dorüm gor nich nödig weer, en Synchronisatschoon to söken, de to de Lippenbewegen passt, warrt in de düütschen Faten „Ich segne euch, meine Kinder“ seggt. Wohrschienlich harr de Synchroonregie de Meenung, de de Tokiekers in’n düütschspraakigen Ruum dat Woortspeel in’t engelsche Original nich verstahn künnen.
Borns
ännern- ↑ Kritik op Filmstarts.de, afropen an’n 4. September 2011
- ↑ Kritik op kino.de, afropen an’n 4. September 2011
- ↑ Carroll Kilpatrick: Nixon Tells Editors, ‘I’m Not a Crook’ In: Washington Post, 18. November 1973.
Weblenken
ännern- Point Break (1991) in de Internet Movie Database (engelsch)
- Filmkritik to’n Film op Rotten Tomatoes
- Vergliek vun de Snittfaten FSK 12 TV — FSK 16 op Schnittberichte.com