Cyril Davis

Cyril George Henry Witfield Davis (* 1. September 1935 in Belize-Stadt; † 1993 oder 1994) weer en Gewerkschafter un Politiker (UDP) ut Belize.

Davis is 1935 as Söhn von Ethel (Elorine) un John Henry Davis in Belize-Stadt (to de Tied Brietsch-Honduras) boren.[1] He weer siet 1954 Funkschonär bi de Christian Workers Union (CWU), de he aver 1967 mit en Grupp Anhängers verlaten hett, von wegen dat de CWU em to eng mit de Regeren tohooparbeiden dee. Davis un siene Anhängers hebbt denn de Democratic Independent Union (DIU) grünnt. En Tied lang weer Davis ok Präsident von’n National Trades Union Congress of Belize (NTUCB).

1984 is he för Artikels över Said Musa, de he an’n 30. Dezember 1984 in sien Wekenbladd The Labour Beacon rutbröcht harr, in Haft kamen.

Davis weer twüschen 1984 un 1989 för de Regerungspartei UDP Maat von’n Senaat von Belize.

Bi de Wahl to’n Stadtraad von Belize-Stadt an’n 10. Dezember 1986 weer he Kannedaat för de UDP un is mit 6655 Stimmen wählt worrn.[2] Bi de Wahl an’n 6. Dezember 1989 weer he ok wedder Kannedaat, is aver mit 5982 Stimmen nich wählt worrn.[2] Dormit weer he von 1986 bet 1989 Maat von’n Stadtraad un weer in düsse Tied ok kort Börgermeester von Belize-Stadt.

Bi de Parlamentswahl in Belize 1989 weer he Kannedaat för de UDP in’n Wahlkreis Pickstock. He hett 38,6 % von de Stimmen kregen un kunn sik dormit nich gegen George Cadle Price von de PUP dörsetten.

Na de Wahl is Davis ut de UDP uttreden. He wull en egen Partei grünnen, is denn aver Maat von de PUP worrn.

Davis hett an’n 22. Januar 1955 Elsiemae Thompson freet.[1] De beiden harrn söven Kinner.[1]

FootnotenÄnnern

  1. a b c Who’s who in the World. Marquis Who’s Who, Inc., 1982, Sied 265
  2. a b Myrtle Palacio: Belize City Council Election Results 1962 to 2003