David McDowell Brown

David McDowell Brown (* 16. April 1956 in Arlington, Bundesstaat Virginia, USA; † 1. Februar 2003 över den Süüden vun de USA) weer en US-amerikaansch Astronaut. He is bi den Afstört vun de Ruumfähre Columbia in' Fröhjohr 2003 to Dood kommen.

NASA-Foto vun David Brown

Leven

Brown hett bit 1974 de Yorktown High School in Arlington besöcht un studeer ansluutend an dat College of William and Mary, wo he 1978 en Bachelor in Biologie kreeg. 1982 hett he sien Doktertitel in Medizin an de Eastern Virginia Medical School maakt.

Brown is nah en Praktikum an de Medical University of South Carolina de US-Marine bitreeden. Nah de Utbillen to'n Flegerdokter 1984 weer he Böverdokter an dat Marinehospital in Adak (Alaska). Dornah wurr he de Carrier Air Wing 15 an Bord vun de USS Carl Vinson todeelt, de in' Westpazifik Deenst maken dee. Af 1988 wurr he in Beeville (Texas) to'n Marinepiloten utbildt.Twee Johr later kreeg he sien Flegerlizens as Klassenbest. Ansluutend wurr he in Beeville för de A-6E Intruder utbildt. 1991 wurr he to dat Naval Strike Warfare Center in Fallon (Nevada) versett, wo he as Utbilder un Planungsoffizier insett wurr. Tosätzlich kreeg he noch en Utbillen up de F/A-18 Hornet un floog 1992 an Bord vun de USS Independence vör Japan de A-6E in dat Strike Fighter Squadron 115. 1995 wurr he as deren Flegerdokter an de United States Naval Test Pilot School versett. Dor floog he ok de T-38 Talon.

Astronautentätigkeit

Brown wurr in' Mai 1996 vun de NASA as Ruumfohreranwärter utwählt un wurr af August 1996 an dat Lyndon B. Johnson Space Center in Houston insett. He hett en tweejohrig Astronautentraining, dat hüm as Missionsspezialisten qualifizeeren dee. He wurr anfangs de Bruuklast-Entwicklung för de Internationale Raumstation todeelt. Later weer he Liddmaat vun Ünnerstüttensmannschapen för de Space-Shuttle-Flüüg.

STS-107

An' 16. Januar 2003 is Brown mit de Ruumfähre Columbia to de Mission STS-107 ünner dat Kommando vun Rick Douglas Husband start. Up disse 16 Daag düern Forschungsmission wurrn etwa 80 wetenschplich Experimente dörführt. Pilot bi disse Mission weer David Cameron McCool und de anner Missionsspezialisten weern Kalpana Chawla, Michael Philip Anderson, Laurel Clark. Dorto keem de israeelsch Bruuklastspezialist Ilan Ramon.

Bi den Start vun dat Space Shuttle harr sück allerdings en Schuumstoffdeel vun den Butentank lööst un den Backbordflögel vun den Orbiter drapen. De Schaden wull woll bemarkt, aber vun de NASA as nich kritisch instuuft. As dat Shuttle an' 1. Februar to de Eer torüchkehren dee, drungen dör en beschädigt Hittkachel heet Gase in den Flögel in un hemm de vun binnen schmülten laaten. Dat Shuttle keem dordör buten Kontrolle un is in de Atmosphäre utnanner braken. David Brown un de anner Crewliddmaaten keemen dorbi to Dood.

Ehrungen

David Brown wurr in' Juli 2004 postum de Congressional Space Medal of Honor verleeht. Buterdem wurr de Asteroid (51825) Davidbrown nah hüm nömmt.

Weblenken

David McDowell Brown. Mehr Biller, Videos oder Audiodateien to’t Thema gifft dat bi Wikimedia Commons.

• NASA-Biographie (engelsch)
• David Brown STS-107 Crew Memorial (engelsch)
• Spacefacts-Biographie