Der grüne Bogenschütze
| Filmdaten | |
|---|---|
| Plattdüütsch Titel: | — |
| Originaltitel: | Der grüne Bogenschütze |
| Düütsch Titel: | Der grüne Bogenschütze |
| Produkschoonsland: | Düütschland |
| Johr vun’t Rutkamen: | 1961 |
| Läng: | 89 Minuten |
| Originalspraak: | Düütsch |
| Öllersfreegaav in Düütschland: | FSK 12 |
| Filmkru | |
| Speelbaas: | Jürgen Roland |
| Dreihbook: | Wolfgang Schnitzler Wolfgang Menge |
| Produkschoon: | Preben Philipsen |
| Musik: | Heinz Funk |
| Kamera: | Heinz Hölscher |
| Snitt: | Herbert Taschner |
| Szenenbild: | Mathias Matthies Ellen Schmidt |
| Dorstellers | |
| |
Der grüne Bogenschütze (op plattdüütsch so veel as: „De gröne Bagenschütt“) is de Titel vun en düütschen Krimialfilm ut dat Johr 1961. Speelbaas weer Jürgen Roland. Bi den Film hannelt sik dat üm den föfften Krimi ut de Edgar-Wallace-Reeg vun de Nakriegstiet, de op den Roman The Green Archer vun Edgar Wallace baseert un vun Rialto Film produzeert weer. Dreiht worrn is de Film in Hamborg un Sleswig-Holsteen. Sien Premiere harr de Film an’n 2. Februar 1961.
Inholt ännern
Julius Savini is de Sekretär vun den US-amerikaanschen Millionär Abel Bellamy un föhrt Touristen dör den sien Slott Garre Castle, wenn Bellamy nich in’t Land is. Över dat Slott vertellt man sik, dat hier de Geist vun den so nöömten gröne Bagenschütt ümgeiht. As een vun de Touristen mit en grönen Piel doodschaten warrt, forscht de Polizei na. Ruchweg to glieken Tiet warrt dat Navergrundstück Ladys Manor vun en Mr. Howett köfft, de dor mit sien Patendochter Valerie intehn deit. Valerie sülvst söcht al eenige Tiet na ehr Mudder Elaine, de verswunnen is.
As Bellamy torüch in London is, warrt he an’n Flaaghaven vun Reporters befraagt. Bito kummt dat to en unfründlich Op’nannerdrapen mit den fröheren Gefängnisoppasser Creager. As Creager kort dorop Scotland Yard gegenöver wat över Bellamy publiek maken will, warrt he ümbröcht – ok wedder mit en grönen Piel. Scotland Yard finnt gau rut, dat Creager mit Bellamy to doon harr un regelmatig Geld vun em kregen hett. De Ünnersöken warrt leidt vun Inspektor Featherstone, de bald mit en Reeg vun düstere Gestalten to doon kriggt, as den Nachtclubbesitter Coldharbour, de all mit Bellamy sien verleden düster’t Leben to doon hebbt.
Sien Patendochter Valerie stellt ehr egen Naforschung an. Se is dorvun övertüügt, dat ehr Mudder in Bellamy sien Slott fangen hollen warrt. Dat vertellt se em ok un bringt sik so sülvst in grote Gefohr. Se warrt vun Coldharbour op Anwiesen vun Bellamy hen roovt un op’n Schipp fasthollen. Man, ok Coldharbour warrt mit en Piel doodschaten ahn dat wies warrt, wokeen de gröne Bagenschütt is.
Opletzt stellt sik rut, dat Valerie recht harr un ehr mudder vun Bellamy fasthollen warrt. De neemlich hett sik al vör lange tiet in ehr verkeken hatt. Heiraat harr se aver sien Broder, den he later in’t Gefängnis bröcht hett. Bellamy sparrt Valerie in sien geheemen Keller in, woneem he ehr tosamen mit Featherstone, Savini un annere afsupen laten will. To’n Sluss warrt Garre Castle vun de Polizei angrepen, de ok de Fangenen noch rechttietig befre’en künnt. Bellamy warrt aver vörher al vun den grönen Bagenschütt doodschaten, achter den Bellamy sien Neffen steken deit, de ok wegen em in’t Gefängnis seten hett.
Kritik ännern
- De Frankfurter Rundschau vun’n 20.Mai 1961 schreev, dat dat in den Film noog Lieken geev, man mit de Gööd weer dat nich so.
- Der Spiegel, 3/86, snackt dorgegen vun en vergnööglich Edgar-Wallace-Verfilmen.
- Dat grote TV-Spielfilm Filmlexikon (CD-ROM-Utgaav vun 2006) wies dorop hen, dat dat de tweete un togliek tetzte Edgar-Wallace-Film weer, den Jürgen Roland dreiht harr. He harr dat eenfach nich henkregen, to den tyypschen Stil vun de Reeg to finnen, as em Alfred Vohrer un Harald Reinl präägt harrn. De Film weer dorüm man blots Dörsnitt.
- Dat Lexikon vun’n internatschonalen Film beteken den Film as schuurig-lustige Edgar-Wallace-Verfilmen, de mit tyypsche Elementen ut dat Genre vullstoppt weer un vergnööglich ünnerhollen de.[1]
- Frank Ehrlacher schreev bi moviemaster.de, dat de Film al vun de Besetten her een vun de hoochkaratigsten Wallace-Filmen weer. Gert Fröbe övertüüg afsluut as snaakschen Slottbesitter. Dorto keem, dat de Krimi-Fackmann Jürgen Roland frischen Wind in de Filmreeg bröcht harr.[2]
Produkschoons-Achtergrund ännern
Waldfried Barthel, Gerhard F. Hummel (beid bi Constantin Film) un Preben Philipsen (Rialto Film, Prisma-Filmverleeh) harrn för de Kinosaison 1960/61 de Produkschoon vun veer Edgar-Wallace-Filmen, dorünner ok Der grüne Bogenschütze. Dat Dreihbook dorto schüll de Schriever Wolfgang Schnitzler schrieven. 1960 wessel de vörige Produkschoonsleider vun de düütschspraakigen Rialto-Filmen Helmut Beck na’n NDR. Sien Funkschoon hett Horst Wendlandt övernahmen, de vörher Produkschoonsleider bi Artur Brauner sien CCC-Film weer. Sien Naamis in’n Vörspann aver nich wiest worrn. As Speelbaas weer na Der rote Kreis to’n tweeten mol de junge Jürgen Roland ünner Verdrag nahmen. Dat Dreihbook is opletzt noch mol vun Wolfgang Menge överarbeit worrn.
För de enkelten Rullen weern toeerst annere Schauspelers vörsehn, so as Ulla Jacobsson ansteed vun Karin Dor, Dietmar Schönherr ansteed vun Heinz Weiss oder Fritz Rasp ansteed vun Hans Epskamp. Harry Wüstenhagen, de bit 1969 sössmol in de Filmreeg to sehn weer, stünn in dissen Film to’n eersten mol bi en Wallace-Film vör de Kamera.
De Butenopnahmen weern in Hamborg un Sleswig-Holsteen dreiht, to’n Bispeel op de Binnenalster, an’t Slott Ahrensborg un an’n Flaaghaven Hamborg-Fuhlsbüttel. För de Szenen vun London, de in’n Film wiest warrt, weern Archiv-Opnahmen bruukt. De Binnenopnahmen weern in’t Studio vun de Real-Film in Hamborg-Wandsbek dreiht. Ofschoonst de Film vun de Freewilligen Sülvstkontroll vun de Filmweertschop ahn Snittoplagen al af 12 Johren freegeven weer, is he för’t Feernsehn bannig kört worrn. Dat bedrööp vör allen de ironische Slussszeen, in de Eddie Arent mit de Tokiekers snackt. In de Twüschentiet is de Film aver wedder in de Originalfaten to sehn.
Literatur ännern
- Edgar Wallace: Der Frosch mit der Maske / Das Gasthaus an der Themse / Der grüne Bogenschütze. Dree Romanen in een Band. Düütsche Översetten. Goldmann Verlag, München 2006, ISBN 3-442-05538-5.
- Joachim Kramp, Jürgen Wehnert: Das Edgar Wallace Lexikon. Leben, Werk, Filme. Es ist unmöglich, von Edgar Wallace nicht gefesselt zu sein! Verlag Schwarzkopf & Schwarzkopf, Berlin 2004, ISBN 3-89602-508-2.
- Joachim Kramp: Hallo! Hier spricht Edgar Wallace. Die Geschichte der legendären deutschen Kriminalfilmserie von 1959–1972. 3. Oplaag. Verlag Schwarzkopf und Schwarzkopf, Berlin 2005, ISBN 3-89602-645-3.
Borns ännern
Weblenken ännern
- Der grüne Bogenschütze in de Internet Movie Database (engelsch)