Die Gentlemen bitten zur Kasse

Filmdaten
Plattdüütsch Titel:
Originaltitel: Die Gentlemen bitten zur Kasse
Düütsch Titel: Die Gentlemen bitten zur Kasse
Produkschoonsland: Düütschland
Johr vun’t Rutkamen: 1966
Läng: 235 Minuten
Originalspraak: Düütsch
Öllersfreegaav in Düütschland: FSK 12
Filmkru
Speelbaas: John Olden
Claus Peter Witt
Dreihbook: Henry Kolarz
Robert Muller
Produkschoon: Egon Monk
Musik: Heinz Funk
Kamera: Gerald Gibbs
Snitt: Oswald Hafenrichter
Gisela Quicker
Monika Tadsen-Erfurth
Szenenbild: Mathias Matthies
Kledaasch: Eva Sheppard
Dorstellers

Die Gentlemen bitten zur Kasse (op plattdüütsch so veel as „De feinen Kerls wüllt Geld hebben“) is en düütschen Feernsehfilm, de as Dreedeeler in’n Opdrag vun’n NDR entstahn is. Dreiht weer de Film af Anfang 1965, to’n eersten mol utstrahlt weer de Minireeg an’n 8., 10. und 13. Februar 1966. De Film behannelt den beropenen Posttogroov in Grootbritannien an’n 8. Augusut 1963, de utermatig professchonell palltn un dörföhrt weer un de Rovers en Büüt in Rekordhööch bröcht hett. De Geschicht in’n Film is na den Bericht vun Henry Kolarz vertellt, de in de Tietschrift Stern publizeert weer. De Dreedeeler lett sik in dat Genre Heist-Movie inorden un weer bi sien Eerstutstrahlen en wohren Stratenfeger.

Parallel to’n Film is bi’n Verlag Schmidt Spiele en Brettspeel mit den glieken Naam rutbröcht worrn, bi dat 2 bit 6 Spelers Geldsäck roven un in Sekerheit bringen mööt.

Inholt ännern

1. Deel: „Der Plan“ (De Plaan) ännern

Archibald Arrow, de Besitter vun en Putzpüdelladen un Gentlemanrover, kriggt den Henwies, dat mit en Posttog regelmatig gröttere Mengden bruukte Geldschiens vun Glasgow na London bröcht warrt, woneem se tonichten maakt warrn schüllt. „Archie“ gifft den Tipp wieter an den Antiquitätenhännler Michael Donegan un den sien Partner Geoffrey Black, de jüst so Gentlemanrover sünd. Tosamen mit annere jem bekannte Mackers (Harry McIntosh, Patrick Kinsey, Thomas Webster, Gerald Williams, George Slowfoot un annere) maakt se en Plaan för den Överfall. För verschedene Opgaven hüert se wietere Lüüd an, ünner annern de dree Fulham-Boys Walter Lloyd, Arthur Finegan (in Wohrheit Ronald Biggs) un Alfred Frost.

Üm de nödigen Saken vörtobereiden un to organiseren, warrt aver eerstmol Kapital bruukt. Dat halt sik de Lüüd bi en Överfall op’n London Heathrow Airport, woneem se mehr as 50.000 Pund in de Hannen kriegt. Vun dat Geld kööpt sik de Verbrekers en Landsitt, de dicht bi de Steed liggt, woneem de Roov afwickelt warrn schall. Vun dor ut warrt de Plaan in all Roh vörbereit. Vun den fröheren Lokfohrer Smiler Jackson laat se sik wiesen, woans en Lok to stüern un Waggons aftokoppeln gaht. Op’n letzten Ogenblick mutt de Plaan aver noch üm een Daag opschaven warrn, vunwegen dat de Waggon mit dat Geld nich vörn achter de Lok hangt. Eenige Rovers wiest dorophen Nerven, vunwegen dat de Alibis, de se sik torechtschostert hebbt, nu keen Sinn mehr hebbt.

2. Deel „Der Überfall“ (De Överfall) ännern

Een Dag later is unvermodens veel Geld in’n Posttog. De Överfall löpt meist ahn Twüschenfäll. Alleen, as de Lokfohrer Wedderstand leist, kriggt he vun Archie een mit de Stang över’n Kopp. De Lok un de Waggon mit dat Geld warrt afkoppelt un – as dat plaant weer – bit na de nächsten Brüch fohrt, woneem de Wagoon apenbroken warrt. Dat Personal warrt vun de Rovers in Schach hollen, wiel de Geldsäck de Brüch rünnersmeten un dor in Lastwagens verlaadt warrt. Dorna fohrt de Rovers wedder torüch na jemehr Farm.

Na den Roov blievt blots Donegan un de jümmer üm Roh un Utgliek bemöhte Patrick Kinsey (in Wohrheit Buster Edwards) kloor in’n Kopp. Na en Superee splitt sik de Grupp in dree Lagers: Donehan, Black un jemehr Lüüd, Arrow un sien Lüüd un de Fulham-Boys as drüdde Frakschoon. Kinsey, de an sik neutral is, slutt sik de Grupp üm Arrow an, man egentlich blots, üm jem in’t Oog to behollen. Dat tomindest seggt he to Donegan, as Arrow mit sien Mackers vun de Farm weggeiht. De Grupp um Donegan vergraavt dat Geld dorna op en Karkhoff, wiel de annern beiden Gruppen ahn Hinnern dör de Stratenkontrollen kamt.

3. Deel „Die Flucht“ (De Flucht) ännern

De Frakschoon üm Archie Arrow warrt vun de Fro vun den Afkaat Masterson an de Stratensparrn vörbi slüüst un kamt bi jem ünner. Man de Fro kriggt dat dorophen mit de Nerven. Twinky, de toeerst den Tipp geven harr un nu dat Farmhuus daalböten schall warrt bang un duukt ünner. He kriggt Druck vun Donegan, worophen he de Bande anonym bi Scotland Yard verraden deit.

Donegan un Kinsey maakt sik sülvst an de Arbeit de Farm antosteken, warrt kort vörher aver vun de Polizei opdeckt. Dör Fehlers warrt meist de hele Grupp hochnahmen. To’n Bispeel maakt de beidne Fulham-Boys Lloyd un Frost den Fehler, en Garaasch to’n dubbelten Pries as verlangt antomieten un dorbi mit lütte Geldschiens betahlen to wulln. Dennis McLeod, de Kriminalbeamte, de dat Seggen in dissen Fall hett, wiest sik överrascht, dat de beiden to de Däders höört, ofschoonst de Naams bi Twinky sien anonymen Anroop gor nich nöömt weern.

Wohrhaftig finnt de Polizei Fingerafdrück vun de meisten Bedeeligten op de Woodland-Farm. BUtendem wiest Archie sien Schoh Lacksporen vun de Farv op, mit de se de Lastwagens ümsprütt harrn. Wieter warrt in’n Woold en Reisetasch funnen mit 100.000 Pund dorbinnen, de in en Sietentasch de Adress vun de Mastersons hett. Alleen Patrick Kinsey, Ronald Cameron un Michael Donegan kamt dorvun af. Ok sien Swager un Gewarfspartner Geoffrey Black mutt freelaten warrn, vun wegen dat sien Fingerafdruck op en Speelbrett nich as Bewies utrecken deit. Na sien Freesprook entwickelt Black en ungewöhnliche Methood, üm Geld an de Familien vun de Fangenen as Ünnerstütten to betahlen. Vun de Gentlemenrovers warrt dat Geld as „Pension“ betekent, dat ut de Büüt betahlt warrt.

Mit Utnahm vun den Elektriker Lloyd, de sien Schuld togeven deit un dorüm „blots“ to twintig Johren Haft veroordeelt warrt, sünd de Strafen för de annern mit fiefuntwintig bit dörtig Johren drakoonsch hooch. Verkleedt as Justizbeamte künnt Donegan un Kinsey tomindst noch Thomas Webster befre’en. De wedderböstige Arthur Finegan drauht dorophen dormit, allns to vertellen, wenn he nich ok ruthalt warrt. Donegan un Kinsey hüert en Grupp an, mit de he ut dat Gefängnis befreet warrt.

Ofschoonst de Film mit de Oordeelsverkünnen an sik to Enn is un de Afspann al wiest warrt, warrt de glieks wedder fallen laten, üm op de Versöken intogahn, eenige Lüüd wedder ut dat Gefängnis ruttohalen. Dorna warrt wedder to Afspann anfohrt, aver noch mol wedder fallen laten, üm denn ok noch de restliche Geschicht üm den Baas Donegan to vertellen. Eerst dorna warrt de Afspann vullstännig wiest: Donegan is an’n 8. November 1968 in en Ferienoort an de Süüdküst vun England fastnahmen worrn. Kinsey hett sik sülvst bi de Polizei mellt. In en Revisionsverfohren sünd de Strafen för de Postrovers düütlich minnert worrn. Nadem ruchweg en Drüddel vun de Strafen afsetten weern, sünd de Rovers freelaten worrn. Vun de Büüt is blots en lütten Deel wedder opduukt.

Kritik ännern

  • Op kino.de weer de Film as en Hööchdpunkt vun de düütschen Feernsehhistorie betekent, de den Postroov in meist dokumentaarsche Wies ut de Sicht vun de Rovers beschrifft. Bekannte Feernsehstars as Horst Tappert un Günther Neutze harrn för exzellente Spannung sorgt, de nich faken wedder henkregen weer.[1]

Utteken ännern

De Dreedeeler is 1967 mit de Goldenen Kamera in de Kategorie Best düütsche Film för Claus Peter Witt un John Olden uttekent worrn.

Dreiharbeiten ännern

Bi de Dreiharbeiten weern noch ännerte Naams för de Rovers bruukt. Butendem weern meist all Szenen in Düütschland dreiht. In Grootbritannien geev dat tomeist keen Verlööf to’n Dreihn, so dat dor tomeist mit verstekene Kamera dreiht worrn is.

De Överfall op den Tog is an de Bahnstreck vun de Sollingbahn twüschen Allenbeiken un Nuurten in de Gemeen Stadt Mauringen dreiht worrn, in de Neeg vun Chöttingen dreiht worrn. De NDR hett vun de Bundsbahn en helen Tog för en helen Dag miet, de vun buten as Fohrtüüch vun de Royal Mail herricht weern. De Diesellok is mit den Schrifttog „British Rail“ versehn worrn. As Kulisse för de Woodland-Farm weer en Villa in Groothansdörp bruukt.

De Dreiharbeiten harrn mit eenige Lasten to doon. So hett dat in’n Sommer 1965 veel regent, man bito geev dat to Anfang vun’n Dreih al enige besehrte Kameralüüd, as en Tog op den Gödertog opföhrt is un dorbi en Toorn mit de Filmkru ümsmeten hett. Unvermodens bleev de Speelbaas John Olden – Ehmann vun de Schauspelersche Inge Meysel – na ruchweg Twee Drüddel vun de Dreiharbeiten dood. So müss Claus Peter Witt vun een op’n annern Dag de Regie wietermaken.

Literatur ännern

  • Drama um den Postraub-Film. In: Der Stern. Nr.39 1965, S. 171–172.
  • Durchs Knopfloch gefilmt. In: Der Stern. Nr.6 1966, S. 3–5.
  • Stefan Vockrodt: Das Geld kam im Zug. In: Lok Magazin. 11/2001, Verlag GeraNova, S. 50–51
  • Michael Hehl: Die Gentlemen bitten zur Kasse. In: Eisenbahn Kurier. 5/1989, Eisenbahnkurier Verlag, S. 30–33
  • Die Gentlemen baten zwischen Soest und Northeim zur Kasse. In: Der Patriot. Lippstädter Zeitung, 19. Juli 2006.

Borns ännern

  1. Filmkritik op kino.de, afropen anhttp://www.kino.de/kinofilm/die-gentlemen-bitten-zur-kasse/20694n 22. Februar 2013

Weblenken ännern