Dumbarton (Brenneree)

Dumbarton weer en Whisky-Brenneree in Dumbarton, West Dunbartonshire, Schottland. Se hett tosamen mit de Brenneree Inverleven, de intwüschen ok afreten is, den Whisky-Kumplex vun Dumbarton billt.

Dumbarton
De Grain-Whiskykumplex vun Dumbarton
Land	Schottland
Region	Lowlands
Tyyp	Grain
Status	stillleggt (2002); afreten (2005)
Besitter
Grünnt	1938
Grünner	Hiram Walker & Sons
Waterborn	Loch Lomond
Spiritstill(s)	1 Coffey Still
Produkschoonsvolumen	3.000.000 l

Historie

Grünnt weer de Destille 1938 vun Hiram Walker & Sons an de Münnen vun den Stroom Leven in den Clyde in de Stadt Dumbarton. In de Brenneree weer Grain-Whisky herstellt. Üm dat Grundstück vun de Brenneree to schulen, sünd hunnert Göös köfft worrn, de as The Scotch Watch betekent weern. Na mehrere Firmen-Övernahmen is de Brenneree Deel vun den Pernod Ricard-Kunzern worrn. Produzeert hett de Destille bit 2002, ahn dat sik in de Tiet veel todragen harr. Denn is de Anlaag dicht maakt worrn un de Hüüs sünd 2005 afreten worrn.

Produkschoon

Dat Water för de Produkschoon stamm ut den Loch Lomond. De Destille stünn teemlich wiet in’n Süüden vun Schottland un tellt dorüm to dat Whiskyrebeet vun de Lowlands. Brennt weer in en Coffey Still. De Meesch is ut Mais mit ’n lütten Andeel vun Gassenmolt ansett worrn. De Brenneree tell to de gröttsten Anlagen vun ehr Oort in Schottland. De produzeerte Whisky is för Blends bruukt worrn. Originalaffüllen hett dat all de Johren nich geven, man dat geev Affüllen vun unafhangige Affüllers. Ünner annern weer de Dumbarton-Whisky Hööftbestanddeel vun den Ballantine’s.

Kiek ok

• List vun de schottischen Brennereen

Weblenken

• Biller vun de Brenneree vun de Royal Commission on the Acient and Historical Monuments of Scotland