Edmond Castro
Edmond George Castro (* 23. April 1965[1]) is en Politiker ut Belize (UDP).
Bi de Parlamentswahl in Belize 2008 weer he för de UDP Kannedaat in’n Wahlkreis Belize-Land Noord un hett sik mit 63,99 % von de Stimmen gegen Earl Perez von de PUP dörsett.
Bi de Wahl 2012 weer he in’n sülven Wahlkreis Kannedaat un hett mit 55,92 % gegen Arthur Saldivar von de PUP wunnen. Ok bi de Wahl 2015 kunn he sik mit 53,02 % von de Stimmen wedder dörsetten, dütmaal gegen Lloyd Jones (PUP).
He is dormit siet 7. Februar 2008 Afornten in dat Repräsentantenhuus von Belize.
Ünner Premierminister Dean Barrow is he an’n 12. Februar 2008 Staatsminister in dat Ministerium för Apentliche Arbeiden, Verkehr un Katastrofenmanagement ünner de Ministers Anthony Martinez un Rene Jaime Montero worrn.
An’n 24. November 2010 hett Castro sien Posten as Staatsminister verloren, nadem dat Unregelmäßigkeiten bi en Landverkoop geven hett.[2] Na de Wahl 2012 hett Premierminister Barrow em aver an’n 9. März 2012 wedder as Staatsminister insett.
Bi de Wahl 2012 is Marco Pech nich wedder in dat Repräsentantenhuus intagen un kunn sien Amt as Viez-Spreker von dat Repräsentantenhuus nich mehr utöven. Dorüm is Castro sien Nafolger worrn.
An’n 24. Oktober 2016 is dat Ministerium opdeelt worrn: Rene Jaime Montero hett dat Rebeed Apentliche Arbeiden behollen un Castro is Minister för Verkehr un Katastrofenmanagement worrn.[3] Castro weer dormit Maat von dat Kabinett Barrow III. As Castro Minister worrn is, müss he dat Amt as Viez-Spreker von dat Repräsentantenhuus afgeven. Düt Amt hett in’n Dezember 2016 denn Omar Figueroa övernahmen.
He driggt den Ökelnaam „Clear the Land“.[3] Düssen Naam hett de Minister för sien drieste Oord kregen, in de he Projekte vörandrifft, to’n Bispeel as he 2008 den Bo von en Damm dör de Western Lagoon bi Crooked Tree ordert hett, ofschoonst dat Rebeed as Crooked Tree Wildlife Sanctuary schuult is un he keen Genehmigung harr[4] oder as he direkt na de Wahl in sien Wahlkreis in kuntroverse Form en Reeg Tiliapia-Farmen hett anleggen laten, üm Arbeidsplätz to schaffen.[5]
Footnoten
ännern- ↑ Belize Public Service Staff List 2014
- ↑ PM says ‘Clear the Land’ Castro fired because of land transaction, Channel 5 Belize an’n 26. November 2010
- ↑ a b “Clear The Land” Edmond Castro Elevated to Full Minister, Channel 5 Belize an’n 24. Oktober 2016
- ↑ It’s Castro versus the rule of law in Crooked Tree Channel 5 Belize an’n 16. April 2008
- ↑ Are tilapia’s causing a stench? Area Rep. and residents discuss issue, Channel 5 Belize an’n 6. Januar 2011