Eduardo Juan
Eduardo Juan (ok fakener Edwardo Juan schreven) is en Politiker ut Belize (UDP).
Juan leevt in San Ignacio. He weer bi de Parlamentswahl in Belize 1984 Kannedaat för de UDP in’n Wahlkreis Cayo Zentraal un hett de Wahl mit 49,4 % von de Stimmen gegen Assad Shoman von de PUP wunnen. Bi de Wahl 1989 weer he in’n sülven Wahlkreis wedder Kannedaat un hett dütmaal aver mit 46,2 % von de Stimmen gegen Daniel Silva von de PUP verloren. Juan weer dormit von 1984 bet 1989 Afornten in dat Repräsentantenhuus von Belize. In düsse Tied weer he von 1984 bet 1989 ünner Premierminister Manuel Esquivel Minister för Hannel, Industrie, Fischeree un Kooperativen in dat Kabinett Esquivel I. An’n 4. Juni 1986 hett he tosätzlich as Minister dat Themenfeld Tourismus övernahmen.
Bi de Wahl 1993 is he nochmaal Kannedaat in’n Wahlkreis Cayo Zentraal ween. He hett 51,5 % von de Stimmen haalt un sik gegen Daniel Silva dörsett. Dormit weer he von 1993 bet 1998 en tweet Maal Afornten in’t Repräsentantenhuus. He weer bet 1998 ok Minister för Natürliche Ressourcen. Bi de Wahl 1998 harr denn wedder Silva de Bavenhand. Juan is mit siene 44,87 % nich in dat Repräsentantenhuus intagen. Ok bi de Wahl 2003 is Juan wedder antreden, nu aver as unafhängigen Kannedaat. He hett blots 1,30 % von de Stimmen kregen un keem wied achter Mario Castellanos von de PUP un Rene Jaime Montero von de UDP op’n drüdden Platz.
1984–1986: Derek Aikman | 1986–1989: Eduardo Juan | 1989–1993: Glenn Godfrey | 1993–1998: Henry Young | 1998–2004: Mark Espat | 2004–2008: Godfrey Smith | 2008–: Manuel Heredia
