Eilert
Eilert (ok Elert, Eler, Elard, Ehler un ostfr. Aeilt) is een plattdüütschen Vörnaam for Jungs.
Herkamen
ännernDe Naam kümmt vun den germaanschen Vörnaam Eilhard vun her. Düsse Naam wedder stammt vun de Form Eigilhard oder Egilhard af, de noch öller is. Dor steekt de beiden Wöör Egil (dat heet Sweert) un harti (dat heet hart oder stark) in. De Naams Egilhard un Eilhard bedüüt all overeen: De mit dat Sweert stark is.
De plattdüütsche Naam
ännernBi plattdüütsche Vörnaams is dat ganz begäng ween, dat se gegen de öllern Formen öber afkört wurrn sünd. Bi Naams, de tohopensett weeren mit dat Woort -hard an de tweede Stäe is bi den plattdüütschen Naam vun düt -hart jümmers man dat Anbacksel -ert öber bleven. So is dat bi Gevert (vun Gebhard), bi Evert (vun Eberhard), bi Eggert (vun Eckehard) un so is dat ok bi Eilert (vun Eilhard). De Naams Elert un Ehler sünd bloß anner Schrievwiesen vun düssen Naam. Bi Ehler is dat -t al afslepen vunwegen slurige Utspraak. De Naam Eilert warrt ok in Sweden bruukt. Dat kümmt woll ut de Tiet vun de Hanse her, as de nedderdüütschen Kooplüde mit Sweden Hannel dreben hefft.
De oostfreesche Naam Aeilt
ännernEen besunnere Form vun düssen Naam Eilert gifft dat in Oostfreesland. Dor is de hüdigendags noch ganz begäng. Ut Eilert is in Oostfreesland Aeilt wurrn. De Naam bedutt just datsülbige.
Tonaams
ännernVun düssen Vörnaam stammt ok de plattdüütschen Tonaams Ehlers, Ehlert, Eilers, Eilts, Eilert usw. af. De bedüüt soveel as: Ut Eilert sien Familie oder Vun Eilert sien Hoff