Eilean Donan Castle
Eilean Donan Castle is en Borg in de westlichen schottischen Highlands. De Borg is de Stammseet vun den MacRae Clan. Se steiht op en lütt Eiland in’n Loch Duich in de Neeg vun den Oort Dornie un kann bi hogen Waterstand blots över en Steenbrüch begahn warrn. De Naam Eilean Donan is Schottsch Gäälsch un bedüüdt „Donans Eiland“, afleddt vun den keltischen Hilligen un Märtyrer Donnán of Eigg (St. Donan) ut de Düsteren Johrhunnerten.
De Borg weer 1220 ünner Alexander II. vun Schottland boot. Anfangs neem de Anlagen vun de Borg dat hele Eiland in, in de lateren Johrhunnerten is se aver mehrmols üm-, torüch- un utboot worrn. Vundaag nimmt se ruchweg twee Drüddel vun dat Eiland in. Dat heet, Eilean Donan Castle weer ok een vun de Fluchtborgen vun Robert the Bruce, as he vör de Englänners flüchten müss.
1719 is de Borg vun dree engelsche Fregatten tonicht maakt worrn, wiel se to de Tiet vun spaansch Truppen as Garnison nütt worrn is. Eerst 1932 weer de Borg wedder opboot. De Museumsföhrer bericht dorto de Historie vun’n Wedderopbo un vertellt vun en ole eenheemsche Fro, de dat noch sülvst beleevt harr un mit en Ogenplinkern teemlich gloovhaftig dorstellt, dat de dormolig Borgherr in’n Droom de Plään vun de ole Borg sehn harr un se vun de Architekten dorna wedder torechtmaken leet. Bi de eersten Utschachtarbeiden is in de Ruin en Truh funnen worrn, wo de Plään binnen weern un de jüst so weern, as he dat in’n Droom sehn harr. Bi de sünnere Atmosphäär vun de Borg künn man dat meist glöven.
Eilean Donan Castle is en vun de an’n fakensten fotografeerten Motiven in ganz Schottand un bekannt för romantische Hochtieten. Vundaag bargt de Borg en Museum, dat pädagogisch utermatig goot opboot is. Bi den Rundgang dör de Borg künnt vele Rüüm bekeken warrn. Dorünner is ok de Borgköök, woneem düchtig echt namaakte Figuren un Eten utstellt sünd. Dorto warrt Geräusche afspeelt, dat een den Indruck kriggt, dat dor jüst en festlich Mahl torechtmaakt warrt. An’t Över op de anneren Siet vun de Brüch steiht hüüt en Touristenzentrum
Vun wegen ehr indrucksvull Utsehn un de sünnere Atmosphäär is de Borg al faken as Kulisse för Film- un Feernsehprodukschonen bruukt worrn as t. B. in je een Folg vun Das blaue Palais vun Rainer Erler un The New Avengers oder in Filmen as Highlander, Braveheart, Tomorrow Never Dies, Rob Roy un Mio min Mio.
Weblenken ännern
Eilean Donan Castle. Mehr Biller, Videos oder Audiodateien to’t Thema gifft dat bi Wikimedia Commons.
- Websiet vun de Borg (engelsch)
- Webcam Eilean Donan Castle (engelsch)
Koordinaten:57° 16′ N, 5° 31′ W