Highlander
Highlander (op Platt so veel as „De vun’t Hoochland“) is de Titel vun en Actionfilm ut dat Johr 1986, de in wieteren Sinn to dat Fantasy-Genre höört. De Hööftrull hett Christopher Lambert speelt. Mit de Johren hett sik Highlander to en richtigen Kultfilm maakt, un de Ünnertitel Dat kann blots een geven (orig.: There can be only one) is vundaag vun wegen de velen Parodien un dat Bruken in Filmen, Warf un Kummedie vele Minschen bekannt ok ahn den Film sehn to hebben.
| Filmdaten | |
|---|---|
| Plattdüütsch Titel: | — |
| Originaltitel: | Highlander |
| Düütsch Titel: | Highlander |
| Produkschoonsland: | USA/Grootbritannien |
| Johr vun’t Rutkamen: | 1986 |
| Läng: | 111 Minuten |
| Originalspraak: | Engelsch |
| Öllersfreegaav in Düütschland: | FSK 18 |
| Filmkru | |
| Speelbaas: | Russell Mulcahy |
| Dreihbook: | Gregory Widen Peter Bellwood Larry Ferguson |
| Produkschoon: | Peter S. Davis, William N. Panzer |
| Musik: | Michael Kamen Queen |
| Kamera: | Gerry Fisher |
| Snitt: | Peter Honess |
| Szenenbild: | Allan Cameron |
| Kledaasch: | James Acheson |
| Dorstellers | |
| |
Inholt
ännernDe Film nimmt sien Anfang in dat New York vun 1985. In de Deepgaraasch vun’t Madison Square Garden gaht twee Maanslüüd mit Swerten opeenanner daal. Een dorvu is Connar MacLeod, de winnt un Iman Fasil den Kopp afhaut. Kräft ströömt ut den Lief vun den Doden un gaht op Connar över un maakt dorbi en Deel vun de Deepgaraasch toschannen. MacLeod neiht ut, warrt aver vun de Polizei fastnahmen.
Över Torüchblennen warrt de Tokieker wies, wat dat mit MacLeod op sik hett: Boren in Schottland in’t Johr 1518 wasst he in de Highlands op, bit he 1536 in en Slacht vun den Clan MacLeod gegen den Clan vun de Fraser in en Tweekamp gegen en eerstmol unbekannten swarten Ridder op’n Dood verwunnt warrt – en beten later blifft he op de Borg dood. Aver, he blifft even nich dood, man steiht en Dag later wedder putzmunter op. Vun sien Lüüd ut den egen Clan un sogor vun sien Leefste warrt he verstött. Se glöövt, dat he en Bund mit den Düvel ingahn is un fallt över em her un wüllt em al Verbrennen. In’n letzten Oogenblick kann sien Verwandten Angus sien Lüüd dorvun afhollen, dat se em noch mehr doot, aver Connar mutt dat Dörp verlaten un warrt mit Schimp un Schannen wegjagt.
Afscheedt vun den Rest vun de Welt leeft Connar later mit sien Wief Heather in en Wahntoorn mitten in de Highlands. Wat he wirklich is, warrt he aver erst wies, as een Dag de spaansch Eddelmann Juan Sanchez Villa-Lobos Ramirez opduukt un em vertellt, dat ünner de Minschen Lüüd leeft, de nich dood blieven künnt. De eerste Dood freert sotoseggen dat Öller in un aktiveert bi disse Utwählten, dat se nicht mehr starven künnt. Dood maken kann man jem blots, wenn man jem den Kopp afsleiht. Dör en unbännig Kraft sünd disse Utwählten dwungen, gegeneenanner to kämpen, bit an’n Enn blots een vun jem över is. Un disse Een vereent all de Kräft vun all Unstarvlichen in sik un herrscht över de Welt.
Ramirez schickt sik an, Connar mit dat Swert uttobillen. De Grund is, dat ünner disse Utwählten en Minsch is, de Kurgan heten warrt, un de duuntomalen Connar as de Swarte Ridder ümbrocht harr. Wenn Kurgan de letzte vun de Utwählten blieven schüll, denn breekt düstere Tieten över de Minschen rin. Un dormit dat nich passeert, lehrt he Connar al sien Künnen. In’n Tweekamp warrt Ramirez ’n beten later vun Kurgan köppt. Connar lehrt in de TWüschentiet aver ok de slechten Sieten kennen dorvun, dat he nich öller warrt. Gegen de Raat vun Ramirez beslutt he, bi Heather to blieven un mutt an’n End tokieken, woans se öller warrt un opletzt ok in sien Arms dood blifft. As dat passeert, leggt he sien egen Swert af un nimmt de japaansch Katana vun Ramirez, de he för 500 Johren schenkt kregen harr. He kehrt Schottland den Rüch to un reist de nächten 430 Johren dör de Weltgeschicht. Mehrfach warrt dorbi torüchblennt un Episoden ut Connars Leven dorstellt.
Torüch in dat hüütige New York kann de Polizei em nix nawiesen. Vun dat Swert künnt blots Splitters funnen warrn, de aver de Pathologin Bernda Wyatt neeschierig maakt, wiel se sik för antike Swerten intressert un faststellt harr, dat dat Swert so oolt is, dat dat dit an sik gor nicht geven dröff, vun wegen dat de Japaners so wat to de Tiet noch gor nicht maakt harrn. Se blifft Connar op de Spoor un versocht mehr över ehm ruttofinnen. So kummt se an’n End dorachter, wat Connar verbargen deit un opletzt finnt de beiden toeenanner. In de Twüschentiet duukt ok Kurgan in New York op, wo he den letzten Utwählten neven Connar dood maken deit. Üm Connar to’n Kamp to dwingen, versleept he Brenda un Connar nimmt de Rutfoddern an. In den Tweekamp twüschen jem beiden behollt he opletzt de Överhand un haut Kurgan den Kopp af. As Pries kriggt Connar Inblick in de Gedanken vun all Minschen op de Welt – nu he kann wedder oolt warrn un starven.
In'n Achtergrund
ännern
De Vörlaag to'n Film is schreven worrn vun den Filmstudenten Gregory Widen. Sien Dreihboook is aver vör den Dreih vun Peter Bellwood un Larry Ferguson noch mol düchtig överarbeidt worrn. Toeerst weer de Geschicht un de Hööftrull veel düsterer anleggt un de Schaddensieten vun dat nich starven künnen stünnen veel wieter in'n Vöddergrund. Bi't Ümsetten is mehr Weert leggt worrn op de Actionelementen. Produzeert worrn is de Film vun Peter Davis un William Panzer, de ok vundaag noch de Rechten besitten doot.
De Spood vun den Film geiht nich blots op de fantastische Vertellen torüch, man ok op de Utwahl vun de Dreihöörd, de Snitt- un Kameratechnik un op de Filmmusik, wat allens tohopen en frische un ne'e Mischen weer. De Speelbaas Russell Mulcahy is dorvör sünners för sien Musikvideos bekannt wesen, wat een daen Film ok 'n beten anmarken kann vun wegen de kreativen Överblennen, den gauen Snitt un de Kameraföhren. Nee weer ok de Kamerafohrt över de Wrestlingarena to'n Anfang vun'n Film, wat vör de Tiet noch en groten Opwand un Kostenfakter wesen is.
Jüst ok de Filmmusik hett groten Influss op de Atmosphäär vun Highlander. Se entstünn ut en enge Tosamenarbeit twüschen den Komponist Michael Kamen in de Rockgrupp Queen. Queen harr dorvör al de Musik för den Science-Fiction-Film Flash Gordon maakt. Vörsehn weer, dat se blots en poor Leder bistüern schulln, man jem hett de Rohsnitt vun'n Film so good gefalen, dat Brian May angeevlich noch op de Torüchfohrt vun't Studio de Grundlaag to dat bekannte Leed Who Wants to Live Forever schreven hett. Vele annere Leder harrn ok direkten Betog to'n Film as t. B. A kind of magic (en Zitat vun Connar MacLeod) oder dat Titelleed Princes of the Universe. De Musik vun Kamen weer ok bannig good drapen. An vele Steden hett he de Themen vun de Queen-Leder opgrepen un orchestral wieterföhrt. As de Filmmusik nich op en Album publizeert worrn is, hebbt Queen jemehr Leder 1986 denn in licht afwannelte Form op jemehr twölft Studio-Album A Kind of Magic rutbrocht.
De Film is an verscheeden Steden in New York un Schottland dreiht worrn. De Binnen- un Studionopnahmen sünd tomeist in London maakt worrn. För den Film stünnen 16 Millionen US-Dollar praat. Wieldat Sean Connery blots manchmol mit den Film verbunnen warrt, is Connar MacLeod för Christopher Lambert de Rull, mit de he bit vundaag identifizeert warrt. He hett dorför 16 Weken lang Swertkamp öven müsst. Tosätzlich Öven müssen ansett warrn, dat de Arbeiden ahn Unfall vör sik güngen, vun wegen dat de kortsichtige Schauspeler keen Kontaktlinsen drägen kunn.
Wietere Delen
ännernDe Film un de Geschicht, de vertellt warrt is an sik afslaten, man vun wegen den groten Spood is beslaten worrn, wietere Delen to maken. Highlander II: The Quickening (dt.: Highlander II – Die Rückkehr) is 1991 in de Kinos kamen un hett sik düchtig wannelt in Richten Science-Fiction. Ok de Film harr weertschopplich Spood, hett de Fans aver nich toseggt un warrt sogor ok vun de Produzenten vundaag nich mehr as „offiziell Highlander-Tietlien“ ansehn.
Vun Bedüden is aver de Feernsehreeg Highlander, de 1992 mit Adrian Paul as Duncan MacLeod anfangen de. De Serie lööp över söss Staffeln un warrt ok hüüt noch vun vele Lüüd geern sehn. Tietgliek weer de drüdde Kinofilm Highlander III – The Sorcerer (dt.: Highlander III – Die Legende) produzeert, de 1994 weder mi Christopher Lambert in de Kinos keem un wedder torüch funnen hett to de Anfäng un sien Wörteln in't Fantasy-Genre. In’t Johr 2000 keem Highlander: Endgame achteran, in den denn beiden Highlanders tohopen op de Lienwand to sehn weern. De ne’este Film Highlander – The Source mit Adrian Paul is 2007 rutkamen un schall de Optakt vun en Trilogie wesen.
Butendem gifft dat bannig veel Saken rund üm dat Highlander-Universum, as to’n Bispeel de Tekentrickreeg Highlander: The Animated Series, Romanen, de kortlevige Afleggerserie Highlander: The Raven, en Kortenspeel usw.
Anners wat
ännern- Peter Diamond, de in'n eersten Kamp Iman Fasil speelt, weer ok de Stunt-Koordinater vun'n Film. He hett ü.a. ok Filmklassikers as Star Wars oder Raiders of the Lost Arc mitprägt. He weer ok in de Feernsehserie noch mol in een Episood dorbi. För de Swertchoreografie in'n Film weer aver Bob Anderson verantwoortlich.
- Queens Musikvideo to dat Leed Princes of the Universe weer ok vun Mulcahy produzeert un hett Filmszenen mit Opnahmen vun de Grupp verbunnen. Christopher Lambert duutk dorin as Connar op.
- Ünner annern weer ok de Musikgrupp Marillion för de Filmmusik utkeken worrn. De Grupp hett aver aflohnt, wieldat se to de Tiet Spood mit jemehr Album Misplaced Childhood harrn un op Tour weern.
- In de USA weer in de Kinos blots en sneden Version to sehn. So hebbt se dor den Rüchblick op'n Tweeten Weltkrieg weglaten. Annere Szenen sünd ok för d europääsche Version sneden worrn, dorünner ok en Kamp vun Kurgan mit en wieteren vu de Utwähltn. Vun de Szenen schall dat vele Fotos geven, man de Film sülvst is nich mehr dor. Dat heet, dat se bi en Füer in't Studio tonicht maakt weern.
- De Film is eerst af 18 Johren freegeven worrn, man in't Feernsehn lööpt he faken in en sneden Faten. Disse FSK-16-Faten is blots 23 Sekunnen körter. Rutsneden weern eenige dulle Gewaltszenen twüschen 1 un 10 Sekunnen. Sünners slecht maakt weer de Snitt in'n eersten Kamp, as Fasil vun Connar köppt warrt. Na hüütig Maat weer de Film wohrschienlich nich mehr as FSK 18 instoopt.
Kritiken
ännernLexikon vun’n internatschonalen Film: Ein mit großem Aufwand inszenierter, durchweg unterhaltsamer Fantasyfilm voller Aktion und Tempo. Die Klischees der Handlung werden durch ausgefeilte, nicht ohne Witz dargebotene Kino-Attraktionen, vor allem aber die formalen Mittel des Videoclips überspielt: ausgetüftelte Kamerafahrten, Lichteffekte, effektsichere Musik und vor allem die Montage schaffen einen schillernden filmischen Kosmos, der die Logik des Raum-Zeit-Gefüges reizvoll aufhebt.
Literatur
ännern- Hans Messias: Mehr oder weniger als ein Videoclip? Gedanken to „Highlander“ vun Russel Mulcahy. In: Film-Korrespondenz, Jg. 33, Nr. 19, 16. September 1986, S. 7–9.
Weblenken
ännern- Highlander in de Internet Movie Database (engelsch)
- Dreihöörd vun’n Film