Ernst Drewes

Ernst Drewes (* 21. März 1903 in Kumbarg; † 28. April 1991 in Mascheroe) weer en düütschen Verwaltungsbeamten.

Drewes is 1903 as Söhn von’n Pastoor Wilhelm Ernst Drewes in Kumbarg boren. He hett toeerst Privaatünnerricht tohuus kregen un is von 1918 bet 1920 op dat Martino-Katharineum in Bruunswiek gahn. He hett toeerst Theologie studeert, denn aver Juristeree an de Universitäten Erlangen, Göttingen un München. An’n 8. Februar 1926 füng he as Gerichtsreferendar bi dat Amtsgericht Hannover an.

Twüschen 1926 un 1935 weer he Regerungsassesser bi de Landraadsämter Genthin, Flatow un Nauen un bi dat Binnenministerium in Berlin. Toletzt weer he Regerungsassesser bi de Regerung in Merseburg. He is in’n Mai 1935 as Nafolger von Ernst Dreykluft vertredungswies Landraad von’n Mansfeller Seekreis worrn, in’n März 1936 richtigen Landraad worrn un dat bet 1939 bleven. Sien Nafolger weer Horst Hacker. He is denn 1939 as Landkommissar in’n Kreis Rybnik kamen. De Kreis Rybnik weer jüt nee billt worrn, nadem dat Düütsche Riek in’n Tweten Weltkrieg Polen innahmen harr. Drewes is an’n 2. September 1939 vertredungswies Landraad von dissen Kreis worrn. An’n 30. Juni 1940 hett he dat Amt wedder afgeven un em hett Wilhelm Dübner aflööst. Drewes müss denn Deenst bi de Wehrmacht doon. He weer Leutnant. He is 1940 as Nafolger von Armin von Lossow Landraad von’n Landkreis Rodenborg worrn. Dat weer aver en rein formale Saak, denn Drewes weer wieder bi de Wehrmacht. He schull to’n 1. Juni 1943 in’n Landkreis Gifhorn versett warrn, aver dor is denn doch nix von worrn un he is formal bet 1945 Landraad in Rodenborg bleven.

Drewes weer wieder Soldaat un keem in Kriegsfungenschop. Na de Fungenschop weer Drewes toeerst Hülpsarbeider op’t Land un hett denn in en Metallworenfabrik arbeidt. Later kunn he aver bi dat Regerungspräsidium Lümborg anfangen. An’n 1. April 1952 is he Oberregerungsraad worrn un twee Johr later Regerungsdirekter. He weer von’n 14. Oktober 1955 af an Regerungsviezpräsident von’n Verwaltungsbezirk Bruunswiek. Dor is he to’n 31. März 1968 in Rohstand gahn. 1968 hett he ok dat Bundsverdeenstkrüüz 1. Klass kregen.

Üm 1935 rüm hett Drewes Herta Forchmann freet. De beiden hebbt een Söhn (* 1941) un een Dochter (* 1949) hatt. He hett toletzt in Mascheroe leevt.