Kreis Rodenborg

Wapen	Koort

Grunddaten
Bestandstietruum:	1885–1977
Regeerensbezirk:	Stood
Kreisstadt:	Rodenborg
Flach:	851 km²
Inwahners:	25.425 (1910)
Inwahnerdicht:	30 Inwahners/km² (1910)
Updeelen:	68 Gemenen (1910), 64 Gemenen (1970)

De Kreis Rodenborg weer von 1885 bet 1977 en Landkreis mit Seet in Rodenborg. He leeg bet 1946 in de prüüßsche Provinz Hannover, denn in Neddersassen.

Geografie

In’n Noorden leeg vör 1932 de Kreis Zeven un in’n Noordoosten de Kreis Horborg. In’n Oosten weer de Kreis Soltau un in’n Süüden de Kreis Fambossel. In’n Süüdwesten leeg de Kreis Veern un in’n Westen de Kreis Achem.

Stand 1977 leeg in’n Noorden de Landkreis Bremervöör un in’n Noordoosten de Landkreis Horborg. In’n Oosten weer de Landkreis Soltau, in’n Süüden de Landkreis Fambossel un in’n Süüdwesten leeg de Landkreis Veern.

Geschicht

De Kreis Rodenborg is an’n 1. April 1885 ut dat Amt Rodenborg un de Gemeen Fintel ut dat Amt Soltau billt worrn.

Bi de Kreisreform to’n 1. Oktober 1932 is de Kreis denn meist unverännert bleven un hett bloot de Gemeen Lauenbrüch ut’n Kreis Horborg tokregen.

Na’n Tweten Weltkrieg hett de Landkreis an’n 25. Januar 1955 en Patenschop för den Landkreis Angerborg övernahmen, de vondaag to Polen höört un ut den de düütschen Bewahners verdreven worrn sünd.

An’n 1. März 1974 is de Gemeen Kettenborg, de vörher to’n Landkreis Fambossel höört hett, Deel von de Gemeen Visselhöövd in’n Landkreis Rodenborg worrn.

Bi de Kreisreform 1977 sünd denn de Landkreis Rodenborg un de Landkreis Bremervöör to’n ne’en Landkreis Rodenborg tohoopleggt worrn.

Naam

Mit de Drüdde Verordnung över den Neeopbo von dat Riek von’n 28. November 1938 sünd de Utdrück för de Verwaltungsbezirke in dat Düütsche Riek eenheitlich maakt worrn. Dorüm hett sik to’n 1. Januar 1939 de Naam von Kreis Rodenborg op Landkreis Rodenborg ännert.

De Kreis hett över de Tied verscheden Naamstosätz hatt, üm em von’n Landkreis Rotenburg (Fulda) to ünnerscheden, de op Hoochdüütsch ans den sülven Naam harr. Bet 1938 hett he dorüm Kreis Rotenburg (Hann.) un denn bet 18. Juni 1969 Landkreis Rotenburg in Hannover heten. Düsse Tosätz kemen dorvon, dat de Landkreis in de Provinz Hannover liggen dee. De Landkreis Rotenburg (Fulda) dee in de Provinz Hessen-Nassau liggen un hett dorüm fröher Landkreis Rotenburg in Hessen-Nassau heten. Na’n Tweten Weltkrieg hett dat Preußen un de Provinzen nich mehr geven un dorüm is de Naam 1969 ännert worrn un hett sik nu op den wichtigsten Stroom in’n Landkreis betagen.

Landrääd

Tied	Naam	Partei
1. April 1885–1887	Theodor Lueder
1887–1888	Franz Heidmann (kommissarsch)
1888–1901	Franz Heidmann
1901–1902	Friedrich von Mettenheim (kommissarsch)
1902–1916	Friedrich von Mettenheim
1916–1917	Heinrich von Müller (kommissarsch)
1917–1920	Heinrich von Müller
1920–1921	Armin von Lossow (kommissarsch)
1921–Oktober 1939	Armin von Lossow*
1940–1945	Ernst Drewes*
1946	Adolf Rinck
–1949	Hans Isernhagen	DP
1949–1968	Hinrich Brunckhorst	DP
1968–1975	Helmut Tietje	CDU
1975–1977	Kurt Vajen	CDU

* Nadem von Lossow dat Amt as Landraad in’n Oktober 1939 afgeven hett, hett de Landraad von’n Landkreis Veern, Karl Weber, kommissarsch dat Leid över den Landkreis Rodenborg övernahmen. Drewes weer von 1940 af an formal Landraad, weer aver in’n Kriegsdeenst. Weber hett dorüm noch bet 1943 de Verwaltung von’n Landkreis mit övernahmen.

Böverkreisdirekters

Tied	Naam
1946-1951	Adolf Rinck
8. Juni 1951-31. Dezember 1976	Helmut Janßen

Auto-Kennteken

As an’n 1. Juli 1956 de hüdigen Auto-Kenntekens inföhrt worrn sünd, hett de Landkreis dat Teken ROH kregen. An’n 15. Oktober 1970 is dat ne’e Teken ROW inföhrt worrn un ROH is nich mehr nee vergeven worrn.

Dat letzte Kennteken mit ROH is an’n 12. Mai 1995 intagen worrn. Dat Teken ROH is sietdem nich mehr in de Anlaag 1 von de Straßenverkehrs-Zulassungs-Ordnung (StVZO) oplist.

Inwahnertall

Tied	1890	1900	1910	1925	30. Juni 1975
Inwahners	19.642	21.128	25.425	29.171	59.615

Kultur

1955 hett de Landkreis en Patenschop för den Kreis Angerborg in Oostprüßen övernahmen. Dat heet, dat de Landkreis sik insett för dat Wohren von de Kultur un Geschicht von de Lüüd, de na’n Tweten Weltkrieg ut’n Kreis Angerborg flücht un verdreven worrn sünd un sik in de Kreisgemeenschop Angerborg tohoopslaten hebbt. As de Landkreis Rodenborg 1977 mit’n Landkreis Bremervöör tohoopleggt worrn is, hett de ne’e Landkreis Rodenborg disse Patenschop övernahmen.

Gemenen

De Gemenen von’n Kreis Rodenborg (Stand 1. Dezember 1910):

Gemeen	Inwahners	Gemeen	Inwahners	Gemeen	Inwahners	Gemeen	Inwahners
Abbendörp	131	Ahusen	430	Badlsdörp	306	Bleckwedel	214
Boitzen	273	Bookholt	195	Bootel	466	Borchel	337
Brookel	382	Clüversbossel	167	Dreßel	93	Drögenbossel	86
Ebersen	181	Evernhusen	42	Fintel	1.111	Groot Söttmer	745
Hassel	79	Hassendörp	403	Hast	86	Heemsbünnen	121
Hellweeg	432	Helsch	444	Hemslingen	516	Hetzweeg	180
Hiddingen	435	Höperhöben	225	Horß	313	Jeddingen	514
Jeersdörp	219	Karkwals	585	Lürken	91	Lütt Söttmer	250
Moordörp	58	Mulmshoorn	167	Nindörp	458	Oddingen	239
Oostervees	499	Reeßen	288	Riekenbossel	113	Rodenborg	3.760
Roosbrook	101	Scheeßl	1.556	Schwitschen	461	Sleßel	109
Söhlingen	244	Sootel	100	Stapel	122	Stemmen	493
Stuckenbossel	196	Süderwals	284	Taaken	279	Trochel, Goodsbezirk	33
Ünnerst	257	Vahl	313	Veers, Goodsbezirk	73	Visselhöövd	2.225
Waaschen	379	Wehnsen	64	Wensbrook	117	Westeresch	193
Westerholt	337	Westervees	436	Westerwals	123	Winkeldörp	171
Wittkopsbossel	206	Wittörp	638	Wohlsdörp	231	Worth	50

Kreisen un Stadtkreisen in de ole prüüßsche Provinz Hannover (Stand 1905)