Ernst Rudolf Schepp (* 5. Oktober 1857 in Wiesbaden; † 13. März 1901 in Bonn) weer en düütschen Verwaltungsbeamten.

Schepp is 1857 as Söhn von Mathilde, borene Krug, un Friedrich Wilhelm Schepp (1807–1874) boren. He weer op dat Gymnasium in Karlsruhe un hett 1876 sien Abitur maakt. He hett Juristeree an de Universitäten Marburg, Leipzig un Berlin studeert. 1880 is he Gerichtsreferendar worrn, 1883 Regerungsreferendar bi de Regerung in Kassel un 1886 Regerungsassesser in Sleswig un Trier.

He is 1889 as Nafolger von Friedrich von Loebell Landraad von’n Kreis Neehuus worrn un dat bet 1894 bleven. Sien Nafolger weer Otto Heidborn. He is denn na’n Landkreis Siegen versett worrn. Dor weer he Nafolger von Gustav Gottfried Keil. He weer bet to’n 9. November 1899 Landraad in Siegen un is denn Regerungsraad bi dat Böverpräsidium in Mönster worrn.

He weer verheiraadt mit Therese Weismann (* 1869-1927), en Dochter von August Weismann. Sien Söhn Helmuth Schepp (1894–1982) weer Bildhauer un Perfesser an de RWTH Aken.