Fängnis Bremervöör

Dat Fängnis Bremervöör is en Fängnis (Justizvollzugsanstalt) in Bremervöör. Dat liggt in dat Gewarvrebeed in’n Noordwesten von Bremervöör in de Straat An’n Steenbarg 75. Utleggt is dat för 300 Fungene (blots vullwussene Mannslüüd; 180 Plätz in de Straafhaft, 90 Plätz Ünnersökungshaft, 30 Plätz Apen Vollzug) op en Bruttogrundfläch von 23.246 m². Üm un bi 150 Anstellte kümmert sik üm de Fungenen. De Sekerheitslevel is 3. Dat bedüüdt, dat dor Fungene inhafteert warrt, de nich mehr as fiev Johr Haft afsitten mööt.

Luftbild von dat Fängnis 2013

Dat Fängnis hett in’n Januar 2013 apenmaakt un liggt op dat Gelänn von de vörherige Vörde-Kasern. Dat Fängnis is deelwies privat finanzeert worrn von de BAM Immobilien-Dienstleistungen GmbH, de to de Royal BAM Group tohöört. Dat weer dat eerste Maal, dat en Fängnis in Neddersassen nich kumplett von’n Staat finanzeert worrn is. Dat Land Neddersassen hett mit dat private Ünnernehmen en Reeg Verdrääg maakt. Dat Ünnernehmen is för de Planung, den Bo, de Finanzerung un Delen von’n Bedriev tostännig. Dat Land Neddersassen blifft aver kumplett för de Sekerheit tostännig. De Verdrääg loopt von Januar 2013 bet Dezember 2037 un hebbt en Volumen von 286 Milljonen Euro. Von de 150 Lüüd, de dor arbeiden doot, sünd so bi 60 anstellt bi Subünnernehmens von de BAM Immobilien-Dienstleistungen GmbH.

De Grundsteen is in’n Juni 2011 leggt worrn un an’n 1. März 2012 weer Richtfest. An’n 31. Dezember 2012 is de Anlaag denn an dat Land Neddersassen övergeven worrn. An’n 10. Januar 2013 hebbt se Eröffnung fiert un de eersten Fungenen sünd an’n 31. Januar 2013 intagen.

Dat Fängnis is tostännig för Fungene ut de Bezirke von disse Amtsgerichten (Stand: 1. Mai 2013):

• för de Straafhaft: Achem, Braak, Bremervöör, Buxthu, Cuxhoben, Demost, Langen, Nordenham, Oosterholt-Scharmbeek, Oterndörp, Rodenborg, Stood, Syke, Veern un Zeven
• för de U-Haft: Bremervöör, Buxthu, Cuxhoben, Demost, Langen, Nordenham, Oosterholt-Scharmbeek, Oterndörp, Rodenborg, Stood un Zeven
• för den apen Vollzug: Achem, Bremervöör, Cuxhoben, Langen, Oosterholt-Scharmbeek, Oterndörp, Rodenborg, Stood un Zeven

Baaslüüd

• Juli 2012-: Arne Wieben

Weblenken

Fängnis Bremervöör. Mehr Biller, Videos oder Audiodateien to’t Thema gifft dat bi Wikimedia Commons.

• Websteed to dat Fängnis (hoochdüütsch)