Flegerunglück Germanwings 9525

Dat Flegerunglück Germanwings 9525 hett sik an’n 24. März 2015 in Süüdfrankriek afspeelt. De Germanwings-Floog 9525 (IATA-Code 4U9525, ICAO-Code GWI18G) weer en Lienenfloog vun de Fleger-Sellschop Germanwings. Dor scholl dat vun‘n Flegerhaben in Barcelona na Düsseldorp bi gahn. An‘n 24. März 2015 dunner de Airbus-A320 up düssen Törn in de Gemarken vun de Gemeen Prads-Haute-Bléone in dat Département Alpes-de-Haute-Provence in’n Süden vun Frankriek in de Barge. All 150 Lüde ut de Maschien sünd dor bi ümkamen. As de franzöösche Staatsanwaltschop bitherto rutfunnen hett, hett de Copilot Andreas Lubitz de Maschien mit Afsicht afsacken laten un mehr Tempo geven, ehr de Fleger togrunnen gung.

De Fleger, de an'n 24. März 2015 afstört is

De Fleger

Bi den Fleger hannel sik dat um en Airbus A320-211 mit dat Luftfohrtüüchkennteken D-AIPX. He weer 1990 boot wurrn un hett de Hersteller-Seriennummer 0147 harrt. Sien Jumfernfloog hett he an’n 29. November 1990 harrt. To de Tied vun den Unfall hett de Fleger al 46.700 Flöge up’n Buckel harrt un weer 58.300 Stunnen in de Luft ween

Wie dat Unglück aflopen is

De Fleger weer um 08:57 TME in Barcelona lannt. He weer ut Düsseldorp kamen un scholl Klock 09:35 wedder in’e Luft gahn un denn Klock 11:55 wedder in Düsseldorp ankamen. So stunn dat up’n Plaan. Man de Start weer denn eerst Klock 10:01. Toeerst kladder de Fleger up de Hööchde vun 38.000 Foot (um un bi 11.600 Meter) un keem dor Klock 10:27 an. In düsse Hööchde scholl de Reis vor sik gahn. Klock 10:30 TME hett de Mannschop in dat Cockpit per Funk Kuntakt harrt mit de Floogkuntrull. Um düsse Tied rum hett de Kaptein den Copiloten dat Stüer overlaten un is ut dat Cockpit rutgahn. So, as dat later ut de Maschien ehren ADS-Transponder rutlesen weern konn, is de Autopilot vun den Fleger in en Reeg vun Schreden up en Slusshööchde vun 100 Foot instellt wurrn Um un bi 9 Sekunnen later hett dat Flight Management System den Fleger dalsacken laten. Vunwegen, datt düsse Daalfloog bi de Flegerkuntrull nich bekannt maakt wurrn weer, mell sik de Flegerkuntrull un versoch, mit de Mannschop to snacken. Toeerst versoch se dat up de normole Frequenz, un denn up de Nootfrequenz 121,5 MHz, de in all Flegers anschalt is. As dat nich klappt hett, hett de Flegerkuntrull Klock 10:35 de Luftnootlage (Distress Phase) verklaart un de Stellen, de dor in Frankriek for tostännig sünd, Bescheed seggt. Vun den Fleger keem keen Anwoort un ok en Nootsignal is nich afsett wurrn. En Kampffleger vun den Typ Mirage 2000 is denn losstüürt wurrn un scholl kieken, wat mit den Airbus los weer, man he is to laat kamen. Na de Daten vun Flightradar24 is de Fleger binnen tein Minuten up unner 2.000 Meter Hööchde dalsackt, ohn dat de Kurs na de Alpen to ännert wurrn weer. Denn is dat Signal afreten. De leste bekannte Positschoon vun den Fleger leeg twuschen Digne-les-Bains un Barcelonnette. Dor nich wiet vun af slöög de Fleger mit en Snelligkeit vun um un bi 700 km/h gegen Klock 10:41 in de Trois-Évêchés-Barge in.

Mannschop un Passagere

An’n Bord weern sess Maten vun de Mannschop un 144 Passagere, dormank sesstein Schölers un Schölersche ut de 10. Klass un twee Lehrersche vun dat Joseph-König-Gymnasium in Haltern am See. Se flögen torüch vun en Schöler-Uttuusch mit dat Institut Giola Llinars del Vallès in Katalonien. Bi dat Unglück sünd ok de Bassbariton Oleg Bryjak un de Alt-Singersche Maria Radner ümkamen. Se weern in Barcelona in en Wagner-Oper upträen. De Mannschop bestunn ut twee Piloten un veer Stewards un Stewardessen. De Kaptein harr al mehr as 6.000 Floogstunnen achter sik. De Copilot Andreas Lubitz stunn bi um un bi 630 Floogstunnen. He weer utbillt wurrn an de Verkehrsflegerschool vun de Lufthansa in Bremen un weer vun September 2013 af an bi Germanwings.

Wat achterher rutkamen is

Den Fleger sien Stimmrekorder (CVR) weer noch an’n Namiddag vun den Unfalldag seker stellt wurrn. He wurr versegelt un na Paris stüürt. Dor konn he heel un deel utlesen weern. De Staatsanwaltschop vun Marseille gung bi un unnersöch de Saak up „lichtfardigen Doodslag“. De franzöösche Staatsanwalt hett seggt, de Grund weer, dat sik na en eerste Analyse vun den Stimmrekorder de Saak so verhool, datt de Copilot dat Dalsacken vun de Maschien in de lesten acht Minuten mit Afsicht instellt harr. De Kaptein harr sik in düsse Tied buten dat Cockpit upholen un vergeevs ropen, de Copilot scholl em wedder rinlaten. Tolest weer dat to hören ween, wie gegen de Panzerdöör vun dat Cockpit bollert un träen wurrn weer. Man dor weer nix bi rutkamen. Nich up de Funkspröök vun de Flegerkuntrull, un ok nich up dat Bollern un Träen gegen de Cockpit-Döör weer en Antwoort to hören ween, man bloß de regelmotige Aten vun den Copiloten, de weer to hören ween. De Vörsitter vun den Vorstand vun de Lufthansa, Carsten Spohr, hett bi en Pressekunferenz an’n 26. März 2015 seggt: „Wi sünd dalslahn un mütt begriepen, dat de Fleger mit Afsicht to’n Afstörten brocht wurrn is.“ De Fleger-Datenschriever is later, an’n 2. April, funnen wurrn. Ut siene Daten is rutfunnen wurrn, datt de Copilot den Autopiloten bruukt hett, um den Fleger afsacken to laten. Bovento hett he bi dat Dalsacken en poor Mol Gas geven un den Fleger gauer maakt.

Wat bi Unnersöken in Düütschland rutsuert is

As den Copiloten siene Wohnungen in Düsseldorp un Rhienland-Palz unnersocht wurrn sünd, sünd allerhand Saken seker stellt wurrn, de later as Bewies denen schöllt. En Breef to’n Afscheed oder en „Bekennerschrieven“, dat he en Anslag vor harrt hett, sünd dor nich bi funnen wurrn. Rutkamen is, dat de Copilot mit sien Tablet-PC in dat Internet Informatschonen rutsocht harr over Cockpit-Dören un over Sülvstmoord. Den Dokter siene Akten seggt dor nix over, datt he krank weer. Ehr, datt he sien Pilotenschien kregen harr, hett he sik avers bi en Psychotherapeuten behanneln laten up Grund vun „Gefohr vun Sülvstmoord“ (Suizidalität). Ok bi annere Fack-Dokters weer he krank schreven wurrn, man dor weer nix vun to sehn ween, dat he sik ok laterhen noch umbringen woll oder dat he dull weer up annere Lüde.

Weblenken

• Informationen zum Germanwings-Flug 9525 up de offizielle Websteed vun Germanwings
• Wat dat Bureau d’Enquêtes et d’Analyses pour la sécurité de l’Aviation civile seggt hett in franzöösch un engelsch
• Törn un Daten vun Floog 9525 up Flightradar24 (engelsch)