Frenulum breve

As Frenulum breve warrt en Verkörten vun dat Vörhuutband (Frenulum praeputii) twüschen de binneren Vörhuut un de vördere Siet vun’n Pint betekent.

Dat Vörhuutband is to kort, wenn dat Torüchtehn vun de Vörhuut sworer geiht as normal oder gor nich mööglich is. Mitünner warrt de Ekel bi’t Torüchtehn vun de Vörhuut oder bi de Erekschoon vun’n Pint dör den tostannen kamen Tog na vörn afknickt (as op dat Bild).

Wenn en Frenulum breve mechaansch to dull belast warrt, kann dat afrieten. De Reet vun de in dat Frenulum praeputii verlopen Arteria frenularis kann dorbi to en lang anduern, starken Blöden föhrn. Dorüm warrt bi en Frenullum breve en Operatschoon anraat. Dat gifft dree Mööglichkeiten to’n opereeren:

de Frenulektomie, also dat Wegmaken vun’t Frenulum praeputii
de Frenulotomie, also dat Dörsnieden vun’t Frenulum
de Frenulumplastik, wat en Verlängern vun’t Frenulum mit Egenhuut is.

Dat Dörsnieden un dat Wegmaken sorgt in de Regl dorför, dat de Ekel wedder beweglich warrt. Bi de Verlängern vun’t Frenulum klappt dat nich jümmer. Vun’t Utsehn her bringt dat Wegmaken un de Verlängern de besten Resultaten.

Wenn dat Vörhuutband nich dull anreten is, heelt dat aver ok wedder. Dat Helen kann dör Behanneln mit Baden in lauwarm Kamillentee un mit Bepanthen ünnerstütt warrn. Man, in so en Fall schüll een tomindst 14 Daag lang Sex un Masturbatschoon nalaten, üm dat de wunne Steed nich mechaansch belast warrt. Disse Oort, en Reet sülvst to behanneln schall aver nich maakt warrn, wenn sik dat üm en echt Frenulum breve hannelt, bi dat en pienhaftig Inrieten wohrschienlich und en Ingriepen dör en Uroloog notwennig is.

In den Fall, dat gliektietig ok en Phimoos vörliggt, warrt en Zirkumzision maakt. En sünnern operativen Ingreep an’t Frenulum is dorbi nich mehr nödig, vun wegen dat de Vörhuutband mit in de Besnieden inslaten is. Dat Utmaat vun en Phimoos is faken eerst na en Behanneln vun’t Frenulum breve to sehn, so dat in’n Twievel toeerst dat Vörhuutband behanneln warrn schüll. En Zirkumzision bringt en grode Verännern mit sik und schüll dorum goot överleggt wesen. Man, op de annern Siet warrt op de Wies mööglicherwies noch en tweete Operatschoon nödig, so dat dat över’t Vörgahn gründlich nadacht warrn mutt. Mitünner kann ok beids in een Schritt na’nanner dörföhrt warrn.

Dat gifft ok Dokters, de allgemeen to’n Besnieden anraat, vun wegen dat dormit in de Kombinatschoon vun’t Dörsnieden oder Wegmaken vun’t Frenulum all möögliche Problemen mit de Vörhuut vörbi sünd.

De ünnerscheedlichen Operatschonen warrt normalerwies ambulant ünner öörtlich Bedööven maakt. Bit dat verheelt is, duert dat tomeist twee bit veer Weken. In disse Tiet mutt en mechaansch Belasten mööglichst hinnert warrn.

Websteden

Informatschonen to dat Thema (eng.)