Friedhelm Helberg
Friedhelm Helberg (* 17. August 1938 in Narbn) is en düütschen Politiker von de SPD.
Helberg is 1938 as Söhn von den Buur Heinrich Helberg un siene Fro Katharina in Narbn boren.[1] De Vader is in’n Tweten Weltkrieg in’n Februar 1945 fullen.[1] Na de Volksschool in Narbn (August 1944 bet April 1953) hett he op’n Hoff von de Öllern arbeidt un em von 1962 bet 1965 övernahmen.[1] Helberg weer von 1963 bet 1965 op de Avendmiddelschool in Bremen un hett 1967 in Hilmssen sien Abitur maakt.[1] Na dat Abitur hett he an de Universitäten Berlin un Hamborg Juristeree studeert.[1] Von Juli 1972 bet Februar 1975 weer he Rechtsreferendar in Bremen un hett dat twete Staatsexamen in Hamborg maakt.[1] He weer denn von Juni 1975 af an Richter, ünner annern an dat Amtsgericht Rodenborg, dat Landgericht Veern un dat Oberlandsgericht Celle.[1] Von 1987 bet 2002, as he in’n Landdag von Neddersassen inrückt is, weer he Direkter von dat Amtsgericht Oosterholt-Scharmbeek. Helberg is siet 1980 mit siene Fro Hilke verheiraadt un hett twee Kinner.[1]
Politik ännern
Helberg is 1978 Maat von de SPD worrn. 1981 is he as Raadsherr in’n Gemeenraad von de Gemeen Jeem wählt worrn un hett dor in’n November 1991 dat Amt as Börgermeester övernahmen, wat he bet November 2013 bleven is. Von 1986 bet 2013 weer he ok Raadsherr in de Samtgemeen Zeven un dor siet 1991 Vörsitter von de SPD-Frakschoon. Maat in’n Kreisdag von’n Landkreis Rodenborg is he von 1991 bet Oktober 2016 ween. An’n 13. Februar 2002 is Helberg in’n Neddersassischen Landdag narückt, nadem de Afornte Wolf Weber sien Mandaat dalleggt harr. Bi de Landdagswahl 2003 weer Helberg Kannedaat för den Wahlkreis Bremervöör un hett 28,9 % von de Eerststimmen kregen, kunn sik aver nich gegen Hans-Heinrich Ehlen von de CDU (62,8 %) dörsetten. Liekers is he över de Landslist von de SPD in’n Landdag intagen. Bi de Landdagswahl 2008 is he nich mehr wedder in’n Landdag intagen.