Gabriela Koukalová

Gabriela Koukalová (* 1. November 1989 in Jablonec nad Nisou as Gabriela Soukalová) is en tschechisch Biathletin. Siet de Saison 2012/13 hörrt se to de Weltbesten in disse Wintersportaart.

Sportlich Loopbahn ännern

Eerste Erfolge (bit 2012) ännern

Gabriela Soukalová jun. geiht för Jiskra Josefův Důl un den SKP Kornspitz Jablonec an den Start. Siet hör Kindheit wurrd se vun hör Öllern Gabriela Svobodová (spoodriek ehmalge Skilanglöperin un Winnerin vun en olympisch Sülvermedaille) un Karel Soukal traineert. 2008 is se eerstmals internatschonal antreeden. Bi de Junioren-Weltmeesterschapen in Ruhpolding belegg se Rang 36 in' Eenzel, 37 in' Sprint un 22 in de Verfolgung. Beter leepen de för hör de Junioren-Weltmeesterschapen 2009 in Canmore, wo Soukalová 8. in' Eenzel wurr, 15. in Sprint un Verfolgung un mit Veronika Vítková un Veronika Zvařičová den Titel in' Staffelwettbewarf wunn. In Ufa weer bi de Junioren-EM en 7. Rang in' Eenzel dat best Ergevnis. Ok bi de Junioren-WM 2010 in Torsby keem se mit de Staffel up Platz 8 un in de Verfolgung as best Ergevnis up Platz 10.

In' Leistungsberiek trett Soukalová siet 2009 an. In Nové Město na Moravě kunn se bi hör Debüt in' IBU-Cup Platz 47 in' Sprint recken. In Obertilliach reck se 2010 mit Rang 6 in en Sprint hör bit dorhen best Ergevnis. Noch in dat sülvig Johr is se in Hochfilzen eerstmals in' Biathlon-Weltcup antreeden un keem in dat Sprintrennen up Platz 99. In Ruhpolding leep se gemeensam mit Veronika Vítková, Magda Rezlerová un Zdeňka Vejnarová in dat Staffelrennen up den sössten Platz. To'n bitherigen Hööchtpunkt vun hör Loopbahn wurr de Deelnahm an de Olympisch Winterspelen 2010 in Vancouver, wo Soukalová 60. in dat Eenzel wurr, in dat Staffelrennen mit Vítková, Rezlerová un Vejnarová ok blots up Platz 16 keemen. Nah de Spelen reck se an' Holmenkollen in Oslo den 52. Rang in' Sprint, to dat Saisonfinale in Chanty-Mansijsk bi de Mixed-Staffelweltmeesterschap mit Barbora Tomešová, Michal Šlesingr un Jaroslav Soukup Platz 7. Bi de Weltmeesterschapen 2011 in Chanty-Mansijsk reck Soukalová mit de Rängen 47 in' Eenzel, 25 in' Sprint, 22 in de Verfolgung un 11 mit de Staffel good Ergevnisse.

Internatschonaler Dörbröök (2012 bit 2015) ännern

De Biathlon-Weltcup Saison 2012/13 broch Soukalová den internatschonalen Dörbröök in de Weltspitze. All to Anfang vun de Saison wies sück de gesamte tschechisch Mannschap in good Form un seker sück in dat eerst Rennen vun de Saison, de Mixed-Staffel in dat sweedsch Östersund den darten Platz. Nah mehreren Platzeerungen ünner de best 20 wunn Soukalová bi den Sprint in Pokljuka nah en fehlerfree Scheeten hör eerst Weltcuprennen. In de ansluuten Verfolgung bleev se weer ahn Scheetfehler, muss sück aber de as immer düchtig loopstark Miriam Gössner slahn geeven, de trotz twee Sekunnen Rückstand ut den Sprint un fiev Scheetfehlern Soukalová knapp up den tweeten Platz verwies. An' Folgedag reck Soukalová mit twee Scheetfehlern achter Tora Berger un Miriam Gössner den darten Platz in' Massenstart. De Wettkämpe in Oberhof muss se wegen Krankheit utfallen laaten un keem dornah in Ruhpolding in' Sprint ahn Scheetfehler up den 11. Platz, in' Massenstart nah söss Scheetfehler aber ok blots up den letzten Platz. Bi hör Heim-Weltmeesterschap in Nové Město na Moravě reck se gemeensam mit Veronika Vítková, Jaroslav Soukup un Ondřej Moravec achter de Staffeln ut Norwegen un Frankriek den darten Platz. Ok in de Eenzelrennen reck se dörweg good Resultate un keem immer ünner de best 20. In' Eenzel belegg se den 12. Platz, wurr 14. in' Sprint, 20. in de Verfolgung, 18. in dat Massenstartrennens un mit de Staffel keem se up den teihnten Platz. To dat Saisonfinale in Chanty-Mansijsk kunn se all dree Weltcuprennen (Sprint, Verfolgung un Massenstart) up hör Naam schrieven. In den Gesamt-Weltcup keem se up den 7. Platz.

In de Saison 2013/14 leep dat ähnlich good wieder. Tonächst wunn se unverwacht mit Veronika Vítková, Zdeněk Vítek un Ondřej Moravec den Saisonuptakt mit de Mixed-Staffel, wenig later ok dat eerste Eenzel vun de Saison. Dornah droog se as Führende in' Gesamtweltcup dörgahns dat geel Trikot bit to de Wettkämpe in Oberhof. In Ruhpolding seker se sück mit hör tweeten Sieg bi den tweeten un letzten Eenzelwettkamp vun de Saison den Gesamtweltcup in disse Disziplin. Bi dat letzt Weltcuprennen vör de Olympisch Spelen in Antholz brook hör bi dat eerste Scheeten in' Sprint en Deel vun den Versluss vun dat Gewehr. As se bi dat tweet Scheeten de Sekerheitsregeln an den Scheetstand verletzte, wiel se sück dat Ersatzgewehr nah dat wiesen vun en Problem dör Handteeken nich vun en Offiziellen to de Scheetmatt bringen leet, sonnern de Gewehren sülvst uttuuschen dee, wurr se disqualifizeert un kunn somit den Verfolger ok nich bestrieden. Bi de Olympisch Winterspelen 2014 in Sotschi wunn se in' Massenstart achter Darja Domratschawa de Sülvermedaille – 30 Johr un twee Daag nahdem hör Moder (dormals noch ünner ehrn Deernsnaam Gabriela Svobodová) bi de Olympisch Winterspelen 1984 de Sülvermedaille mit de Langloopstaffel wunn. Gemeensam mit Veronika Vítková, Jaroslav Soukup un Ondřej Moravec wunn se twee Daag later noch de Sülvermedaille mit de Mixed-Staffel. Hör good Platzeeren in' Gesamt-Weltcup verlor se nah de Olympisch Spelen endgültig, nahdem se an de Wettkämpe in dat sloweensch Pokljuka wegen Krankheit nich deelnehmen kunn. Bi den letzt Rennen vun disse Saison kunn se nich mehr in den Kamp um den Gesamtweltcup ingriepen, en dart Platz in Kontiolahti weer nah de Olympisch Spelen hör best Platzeeren in en Weltcuprennen. An' Enn' belegg se den veerten Rang in de Gesamtwertung achter Kaisa Mäkäräinen, Tora Berger un Darja Domratschawa.

In de Saison 2014/15 reck se bi den Sprint in Pokljuka hör eenzigen Eenzelsieg, keem aber in de ansluuten Verfolgung blots up den 20. Platz. An dat Enn vun de Saison leeg se in den Gesamtweltcup up Rang 6.

Bi de Weltmeesterschapen 2015 in dat finnisch Kontiolahti wunn se tosommen mit Veronika Vítková, Ondřej Moravec un Michal Šlesingr de Goldmedaille in de Mixed-Staffel. In' Eenzelwettbewarf wunn se buterdem de Sülvermedaille achter Jekaterina Wiktorowsna Jurlowa aber vör Kaisa Mäkäräinen.

Siegerin in den Gesamtweltcup (siet 2015) ännern

Nahdem Darja Domratschawa, de Siegerin vun den Gesamtweltcup vun dat Vörjohr, de gesamte Saison 2015/16 en Paus maakt hett, gull Soukalová neben de Tweetplatzeerte Kaisa Mäkäräinen as ok de bi de Weltmeesterschapen 2015 so spoodriek Marie Dorin-Habert as en vun de Mitfavoritinnen in disse Wertung. Nah en Sieg vun Dorothea Wierer in dat eerst Rennen in dat sweedsch Östersund wunn se dat Sprintrennen un övernehm dormit dat geel Trikot vun de Führenden in' Gesamtweltcup. De muss se nah en tweeten Platz vun Dorin-Habert bi de Verfolgung in Pokljuka för een Rennen an hör franzöösch Konkurrentin afgeeven. Mit den tweeten Platz in dat Massenstartrennen hett se dat weer umdreiht un hett de Führung in de Weltcupgesamtwertung bit to dat Enn' vun de Saison hollen kunnt. In dat vörletzt Rennen vun den Winter, dat Verfolgungsrennen in Chanty-Mansijsk, kunn se de Gesamtwertung vun den Winter un de Verfolgungswertung för sück entscheeden. Bit to dit Rennen weer de elfte Platz in de Verfolgung bi de Weltmeesterschapen 2016 hör schlechts Ergevnis in den Winter togliek hör eenzig Ergevnis buterhalv vun de Top-10. Trotz disse Konstanz, de se sowohl in de Loopleistungen as ok an' Scheetstand wies, kunn se bi de Weltmeesterschapen in Oslo nich een Medaille winnen. Bi den letzten Weltcup in de Saison in Chanty-Mansijsk seker se sück neben den Sprint- ok den Verfolgungsweltcup. Nahdem dat Massenstartrennen wegen stark Windböen afseggt wurrn muss, wurr se ok Gesamtsiegerin vun de Massenstartwertung.

Privates ännern

An' 16. Mai 2016 hett se den tschechischen Badmintonspeler Petr Koukal heiraadt un nehm sien Nahnaam an.[1]

Weblenken ännern

  Gabriela Koukalová. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen ännern

  1. Gabriela Soukalová hat geheiratet - und heißt nun Koukalová, Prag aktuell, 13. Mai 2016