Georg Ferdinand Duckwitz
Georg Ferdinand Duckwitz (* 29. September 1904 in Bremen; † 16. Februar 1973 in Bremen) weer een Bremer Koopmann un düütschen Staatssekretär un Vertreder in't Utland.
Leben ännern
In Bremen hett he sien Abitur maakt un later een Lehr as Koopmann anslaten. Dornah güng he nah Bonn un Freiburg in'n Breisgau un studeer Juristeree un Volksweertschopslehr. 1928 weer he as Vertreder vun Kaffee HAG in Kopenhagen. 1933 hett he de Nazis ehr Griepen nah de Macht toeerst goot funnen un füng in dat Butenamt an. 1934 güng he aber al wedder weg un is bi de Hamborg-Amerika-Linie anstellt wurrn. Dor is he denn later Prokurist wurrn. He keem in Kontakt mit den konservativen Wedderstand gegen Hitler üm Ulrich von Hassel rüm. 1939 is he Kunnigen (Sachverständiger) vun de Schipperee bi de düütsche Botschup in Kopenhagen wurrn.
As 1943 plant weer, Jöden vun Däänmark wegtoföhren nah de KZs, hett he dat tohopen mit däänsche un sweedsche Stäen möglich maakt, dat Dusende nah Sweden utbüxen konnen.
Nah den Krieg bleev Duckwitz toeerst in Däänmark. Denn stünn he vörne an, as de düütschen Hannelskammern in de Britsche Zoon vertreden weeren mössen. 1950 is he in dat düütsche Butenamt intreden, 1953 weer he Konsul, vun 1955 af an Düütsche Vertreder in Kopenhagen. 1958 hett Duckwitz den Vörsitt vun de Oostafdeelung vun dat düütsche Butenamt öbernahmen un is Ministerialdirektor wurrn. Bi dat Verhanneln vun de Veer Mächt 1959 hett he eenen groden Andeel harrt.
Vun 1961 bit 1965 weer he de düütsche Vertreder in Indien. Dornah hett he Bott geben un is in'n Rohstand gahn. 1967 hett he denn aber doch bi dat Verhanneln mit de USA un Grootbritannien öber de Devisen mitmaakt un in'n Oktober 1967 is he denn Sekretär vun den Staat in dat Butenamt wurrn. 1969 funn dat düütsch-poolsche Verhanneln ünner sienen Vörsitt statt. Dornah hett he sik denn endgüllig to Roh sett. 1971 is he vun de Regeerung vun Israel ünner De Gerechten mank de Völker upnahmen wurrn.
Böker öber Duckwitz ännern
- Johannes Dose: Georg Ferdinand Duckwitz in Dänemark 1943 - 1945, Bonn 1992.
- Königlich Däänsch Ministerium för Butenlannsche Saken (Rutgever): Oktober 1943. Die dänischen Juden - Rettung vor der Vernichtung, Kopenhagen 1993.
- Therkel Straede: Die Menschenmauer. Dänemark im Oktober 1943: Die Rettung der Juden vor der Vernichtung, Kopenhagen 1997.
- Butenamt (Rutgever): Biographisches Handbuch des deutschen Auswärtigen Dienstes 1871 - 1945, Band 1 A-F, Patterbuorn 2000
- Butenamt (Rutgever): Zum Gedenken an Georg Ferdinand Duckwitz 1904 –1973, ISBN 3-937570-15-2 (PDF-Download)
Upsätz ännern
- Friedrich Duensing: Ich weiß, was ich zu tun habe, Die Rettung der dänischen Juden 1943 und der Bremer Diplomat Georg Ferdinand Duckwitz, in: Mitteilungen des Vereins für Niedersächsisches Volkstum, Heft 139, 74.Jg., Winter 1998
Up Platt is nix öber Georg Ferdinand Duckwitz rutkamen.
Weblenken ännern
Georg Ferdinand Duckwitz. Mehr Biller, Videos oder Audiodateien to’t Thema gifft dat bi Wikimedia Commons.