Georgi Timofejewitsch Dobrowolski

Georgi Timofejewitsch Dobrowolski (russisch:Георгий Тимофеевич Добровольский; * 1. Juni 1928 in Odessa, Ukrainische SSR; † 30. Juni 1971 bi Karaganda, Kasachische SSR) weer en sowjeetsch Kosmonaut, de an de Sojus-11-Mission deelnehm un dör en Druckaffall in de Kabien to Dood keem.

Leven ännern

Tweete Weltkrieg un Luftstrietkräfte ännern

Van 1941 bit 1944 weer de Heimatstadt vun Dobrowolski, Odessa, vun rumäänsch un düütsch Truppen besett. Ias he 15 Johr olt weer, wurr Dobrowolski wegen illegal Wappenbesitt to 25 Johren Dwangsarbeit veroordeelt. He kunn aber ut dat Gefängnis flüchten un hett sück denn so lang verstaaken, bit Odessa vun de Root Armee torücherobert wurr.

Nah den Krieg gung Dobrowolski up verscheeden Militärscholen un is in' November 1950 as Pilot in de Luftstriekräfte vun de Sowjetunion intreeden. Tietwies weer he in de DDR statschoneert. In' Juli 1961 hett he de Militärakademie vun de Luftstrietkräfte in Monino afslooten.

Utbillen to'n Kosmonauten ännern

In dat Johr 1962 hett Dobrowolski dat Utwahlverfohren för Kosmonauten dörloopen un wurr in' Januar 1963 in de tweete militärische Kosmonautengrupp upnommen. Sien Grundutbillen gung an' 15. Januar 1965 mit de Afslussprüfung to Enn', bi de Dobrowolski dat schlechteste Ergevnis vun de 15 Anwärter harr, aber noch bestunn.

Dornah wurr Dobrowolski en Kosmonautengrupp todeelt, de ünner de Leiden vun German Titow as Besatten för den plaanten Ruumgleiter Spiral traineeren dee. In' September 1966 wessel Dobrowolski in dat sowjeetsch Maandprogramm un traineer för en bemannt Maandumrunnen, later wurr he tietwies för de Almaz-Ruumstatschoon utbildt.

Af August 1968 traineer he för dat Kommando vun Kopplungsmission in de Eerdumloopbahn. As Bordingenieure wurrn hüm nahnanner Pjotr Kolodin, Oleg Makarow un Witali Sewastjanow todeelt. Dobrowolski weer darte Wahl för de Positschoon vun den Kommandanten vun dat Ruumschipp Sojus 4. Disse Mission funn in' Januar 1969 statt, wobi eerstmals en Umstieg vun Ruumfohrers in den Weltruum vörnommen wurr.

Af September 1970 traineer he för en Insatz in de Ruumstatschoon Saljut 1. Toeerst wurr he in en Mannschap mit Sewastjanow un Anatoli Woronow indeelt, in' Februar 1971 wurrn hüm denn Wladislaw Wolkow un Wiktor Pazajew todeelt. As Funkroopteken hett Dobrowolski „Jantar“ (Barnsteen) wählt.

Dobrowolski, Wolkow un Pazajew sullen de dart Besatten vun Saljut 1 billen, fall de Statschoon so lang in' Orbit bleev. De eerste Mannschap ünner dat Kommando vun Wladimir Schatalow kunn aber mit Sojus 10 in' April 1971 nich vullständig an de Raumstatschoon ankoppeln un muss weer to de Eer torüchkehren

Een tweet Versöök weer mit Sojus 11 ünner dat Kommando vun Alexei Leonow plaant. Eenig Daag vör den Start wurr bi den Bordingenieur vun Leonow, Waleri Kubassow Tuberkuloseverdacht faststellt. Dat harr to Folg, dat de kumplette Mannschap uttuuscht wurr, womit Dobrowolski, Wolkow un Pazajew nu to de eerst Besatten vun de Ruumstatschoon wurr.

Dood bi de Lannen vun Sojus 11 ännern

De Start vun Sojus 11 weer an' 6. Juni 1971. De Kopplung an de Ruumstation passeer vullautomatisch ahn Infloot dör de Kosmonauten. 23 Daag un 18 Stünn hemm de Kosmonauten in de Ruumstatschoon verbrocht, wat en nee Langtietrekord in de Ruumfohrt weer.

Nah en normalen Wedderinträe in de Eerdatmosphäre wurr de Landekapsel apen maakt un de Crew dood upfunnen. As Doodsoorsaak wurr en apen Ventil faststellt, dör dat de Kapselatmosphäär entwieken kunn, wat to'n Dood dör Sticken vun de Besatten führt harr. An een vun Pazajew sien Hann'n wurr faststellt, dat de besehrt weer, wat mögelkerwies entstahn is, as he versöcht hett, dat Ventil vun Hand to sluuten, bevör he dat Bewusstween verlor.

De Urnen vun de dree Besattenlidmaaten vun Sojus 11 wurrn an de Kremlmüer in Moskau bisett.

Dobrowolski hett sien Fru un twee Döchter achterlaaten. Nah den Afstört vun Sojus 1 weer dat de tweet tödliche Unfall bi en Ruumfloog.

Ehrungen ännern

Dobrowolski wurr 30. Juni 1971 postum to'n Held der Sowjetunion un to'n Dräger vun den Leninorden maakt. Nah hüm wurrn Straaten un Scholen nömmt. Dorneben dragen dat Kommunikatschoonsschipp Kosmonaut Georgi Dobrowolski, de Maandkrater Dobrovol'skiy un de Asteroid (1789) Dobrovolsky sien Naam.

Weblenken ännern

  Georgy Dobrovolsky. Mehr Biller, Videos oder Audiodateien to’t Thema gifft dat bi Wikimedia Commons.