Get Shorty (Film)
Get Shorty (op Platt so vell as Kriegt Shorty to faten, dt. Titel: Schnappt Shorty) is de Titel vun en Filmkummedie ut dat Johr 1995. Dorbi hannelt sik dat üm en Verfilmen vun den Roman Get Shorty vun den Schriever Elmore Leonard. De Hööftrullen weern vun John Travolta un Danny DeVito speelt.
| Filmdaten | |
|---|---|
| Plattdüütsch Titel: | — |
| Originaltitel: | Get Shorty |
| Düütsch Titel: | Schnappt Shorty |
| Produkschoonsland: | USA |
| Johr vun’t Rutkamen: | 1995 |
| Läng: | 105 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Barry Sonnenfeld |
| Dreihbook: | Scott Frank Vörlaag: Elmore Leonard |
| Produkschoon: | Danny DeVito Graham Place Susan Ringo Michael Shamberg Stacey Sher Barry Sonnenfeld |
| Musik: | John Lurie |
| Kamera: | Donald Peterman |
| Snitt: | Jim Miller |
| Dorstellers | |
| |
Inholt
ännernChili Palmer arbeit as Kredithai in Miami. Sien Baas, de Mafiabaas „Momo“ blift een Dag an en Hartinfarkt dood un Chilis ollen Feend Ray „Bones“ Barboni övernimmt dat Arv vun Momo, för den he nu arbeiten mutt. As eerst sett he Chili op Leo Devoe an, de Bones noch Geld schullt. Man, Leo schall bi en Flegerunglück afstört wesen, worophen sien Fro en Affinnen vun de Flegesellschop kriggt. In Wohrheit aver is Leo gor nich an Boord wesen, as de Fleger afstört is, un is mit dat Geld na Las Vegas dörbrennt. Chili reist also na Vegas un höört dor vun den Casino-Besitter Dick Allen, dat Leo in de Twüschentiet na Los Angeles utneiht is. Dick fraagt Chili bi de Gelegenheit na, wat he nich in Los Angeles den Filmproduzenten Harry Zimm besöken künn, de nich veel Spood, dorför aver noch Schullen bi dat Casino hett.
In Los Angeles finnt Chili Zimm in’t Huus vun de Schauspelersche Karen Flores. As se sik wegen de Schullen eenig warrt, hett Zimm noch en Anliggen bi en grötteret Problem: Zimm hett ok noch 300.000 US-Dollar Schullen bi Bo Catlett, de he in en Filmprojekt investeert hett. Catlett un sien Mackers Ronnie Wingate un Bear – de fröher Stuntman weer – hebbt jemehr Fingers nich blots in Filmgewarf man ik in de Drogenszeen. Chili seggt to, Zimm to helpen.
Nu is chili aver en groten Filmfründ un kummt nu op de Idee, sülvst en Film to produzeeren. He vertellt Zimm sien eersten Ideen to dat Dreihbook, neemlich de Geschicht vun Leo Devoe, de dörbrennt is. Gau markt Chili, dat de Ünnerscheden twüschen dat Filmgewarf un dat Mafiagewarf nich sünners groot sünd un finnt sik teemlich gau dorin torecht. He maakt sik an den Schauspeler Martin Weir ran un kann em dorto bringen, an’t Filmprojekt mittoarbeiten. Jüst so kummt he ok Karen Flores neger un fangt mit ehr wat an. Op disse Wies maakt he sik gau en Naam in dat Showbusiness vun Hollywood.
Catlett kriggt Wind vun dat plaante Filmprojekt un will mitmaken. Chili seggt em mehrmnols, dat he sik dor ruthollen schall, man Catlett versöcht Chili uttoschalten. He vertellt Zimm vun 500.000 US-Dollar, de in en Sluutfach an’n Flaaghaven leegt. Chili schall dat Geld afhollen. In Wohrheit stammt dat Geld ut’n Drogenhannel mit Yayo Portillo, en Brodersöhn vun den süüdamerikaanschen Drogenbaron Escobar. Dat Sluutfach warrt aver vun de Drogenbehöörd överwacht, un Catlett haapt, dat Chili fastnahmken warrt, wenn Chili dat Geld afhollt. De kann aver de Drogenploizei övertügen, dat he nix mit Drogen in’n Sinn hett. Catlett kriggt gliektietig bannig Arger vun Escobar wegen dat Geld un ok wegen Yayo, den Catlett twüschendör an de Siet maakt hett. Catlett brukkt nu gau dat Geld ut Harrys Film wedder torüch.
In de Twüschentiet röpt Zimm, de jümmer noch en ne’en Geldgever för den Film söcht, besopen bi Ray „Bones“ Barboni an un vertellt em vun Leo Devoe. An’n nächsten Dag kiekt Ray denn in Zimms Büro vörbi, sleiht em tosamen un schüüt ok noch Ronnie Winsgate doot, üm Zimm den Moord antohangen. Gliektietig kummt dat Filmprojekt nu in’t Rullen un Chili hett in de Twüschentiet ok al Leo Devoe funnen un em dat Geld afnahmen, dat he sik mopst harr.
Catlett steiht wieter ünner groten Druck vun Escobar un roovt nu Karen Flores, üm dat Geld vun’t Filmprojekt to erpressen. Chili söcht dorophen de Villa vun Catlett op, hollt Karen dor rut un slutt mit Bear Fründschop, ofschoonst he mit em en Slägeree hett. Mit Bear sien Help kann he opletzt Catlett duersom ut’n Weg rümen, as se em vun sien egen Balkon rünnerstööt, den Catlett egentlich för Chili präpareert harr.
Korte Tiet later stööt Chili mit Bones tohopen, de Chili den Slötel vun’t Sluttfach an’n Flaaghaven afnimmt. Bones glöövt, dat Chili dor dat Geld vun Devoe lagert hett. As Bones denn na’n Flaaghaven geiht, üm dat Fach apen to maken, warrt he vun de Polizei as de vermodte Drogendealer fastnahmen.
Nipp un nau disse Szeen warrt later in’t Studio mit Harvey Keitel, de Ray Bones speelt, nastellt. De Film, mit Martin Weir in de Hööftrull, kriggt opletzt den Titel „Get Shorty“ un warrt vun Chili Palmer un Harry Zimm produzeert un wiest opletzt nix anners as Chilis egen Levensgeschicht. Finanzeert warrt de Film vun dat Geld vun Leo Devoe, de de hele Geschicht överhaupt eerst in’t Rullen bröcht hett.
Kritiken
ännernDe Tietschrift Cinema hett den Film as „swart, komisch un grootordig speelt“ beshreven un betekent em as „en intelligente Satire op de Droomfabrik“. De Film ünnermuer den „Kult-Status“ vun John Travolta.[1]
Na Movieman is de Film en „köstliche Kummedie“, de „afsluut sehensweert“ is, vun weden dat se „bit in de lüttste Nevenrulle perfekt besett“ is un dorüm „grandios ünnerhollen“ deit.[2]
Utteken
ännernDe Film weer för 15 Filmpriesen vörslahn un hett söss dorvun wunnen:
- 1996: den American Comedy Award in de Kategorie Lustigst Hööftdorsteller in en Speelfilm för John Travolta
- 1996: den American Comedy Award in de Kategorie Lustigst Nevendorsteller in en Speelfilm för Dennis Farina
- 1996: den American Comedy Award in de Kategorie Lustigste Nevendrostellersche in en Speelfilm för Bette Midler
- 1996: den Golden Globe in de Kategorie Golden Globe Award/Best Hööftdorsteller – Kummedie oder Musical för John Travolta
- 1996: den SEFCA Award in de Kategorie Beste Schauspeler för John Travolta
- 1996: den ASCAP Award in de Kategorie Top Box Office Films för John Lurie
Achtergrund
ännernDe Film is in de USA an’n 20. Oktober 1995 anlopen, in Düütschland keem he an’n 29. Februar 1996 in de Kinos. In ’t Johr 2005 is de Geschicht mit den Film Be Cool wietermaakt worrn, de ok mit John Travolta un Danny DeVito dreiht worrn is.
Travolta hett de Hööftrull toeerst nich hebben wullt, hett sik dat denn överleggt, as he vun Quentin Tarantino anropen worrn is. De hett em seggt, dat he nich blots dat Dreihbook, man ok den Roman lesen schüll. Dorbi hett he markt, dat vele vun de beteren Szenen för dat Dreihbook ümschreven worrn sünd. Dorophen hett he de Dreihbookschrievers opfoddert, disse go’en Steden wedder in jemehr fröheren Form intofögen. As dat passeert weer, hett he de Hööftrull annahmen.
De echte Ernest „Chili“ Palmer speelt een vun Barbonis Mackers in de Szen an’n Anfang vun’n Film, as Ray Barboone över den Naam „Chili“ hertütt. He is de rechte vun de beiden, de iroonscherwies Ray ok noch to sien feinen Spaaß gratuleert.
De Film harr en Budget vun 30 Mio. US-Dollar un hett in de USA al an’t eerste Wekenenn 13 Mio. US-Dollar inspeelt. Weltwiet sünd mehr as 100 Mio. US-Dollar tosamenkamen.
Borns
ännern- ↑ Cinema, afropen an’n 7. Januar 2008
- ↑ Kritik vun Markus Oehlschläger op movieman.de
Weblenken
ännern- Get Shorty (Film) in de Internet Movie Database (engelsch)
- Kritiken to’n Film op Rotten Tomatoes