Gianni Bugno
Gianni Bugno (* 14. Februar 1964 in Brugg, Swiez) is en ehmalger italieensch Radrennfohrer, de in de eerst Hälft vun de 1990er Johren en vun de best Allrounder in‘ Straatenradsport weer. Nah sien aktiv Loopbahn wurr he Präsident vun den Radprofiverband Cyclistes Professionnels Associés.
Loopbahn as Radsportler ännern
Bugno wurr 1985 Profi. Lang Tiet stunn sien Swaakheit bi Affohrten grötteren Erfolgen entgegen. Nahdem en Binnenohrblockaad as Oorsaak för Gliekgewichtsstörungen faststellt un mit Ultraschall behannelt wurr, verbeeter he sück bi Affohrten. Buterdem heet dat, dat he bi Affohrten in‘ Training Mozart hörrn dee, um sien Angst to besiegen.[1]
Sien Dörbröök fier he in dat Johr 1990, as he tonächst den Fröhjohrsklassiker Mailand-Sanremo wunn, denn en Sieg bi den Giro d’Italia mit Führung vun de eerst bi to de letzt Deelstreck fiern kunn un sluutend de Rad-Weltcup-Gesamtwertung haalen dee. Dormit is Bugno bit hüüd de letzt Fohrer, de in dat sülvig Johr sowohl een vun de groot Landesrundfohrten, as ok bi de klassisch Eendagsrennen domineeren kunn.
1991 un 1992 wunn Bugno tweemal nahnanner de UCI Straatenrad-Weltmeesterschap, jewiels in‘ Sprint vör Miguel Induráin bzw. Laurent Jalabert.
Sien Hööftoogenmark legg Bugno af 1991 aber up de Tour de France. 1990 harr he dor all den 7. Platz beleggt un twee Deelstrecken (dorünner de Bargdeelstreck hooch nah L’Alpe d’Huez) wunnen. 1991 reck Bugno den tweeten Platz mit dreeenhalf Minüüt Rückstand up den neen Star, den schier nich to slahn Miguel Induráin, hett aber weer de Bargdeelstreck nah L’Alpe d’Huez haalt. 1992 wurr Bugno nochmal Dart, harr aber sien starkste Phase bi Deelstreckenrennen achter sück.
Sien letzt groot Erfolg weer sien Sieg bi de Flannern-Rundfohrt 1994. Dornah övernehm Bugno trotz sien groot Erfolge tonehmend weer en Rull as Waterdräger, bit he 1998 to’n Afsluss vun sien Laufbahn en Deelstreck bi de Vuelta a España wunn.
Doping ännern
1994 wurr Bugno bi de Coppa Agostinho positiv up Koffein test un wegen Doping för dree Maand spaart. 1999 wurr he wegen den Koop un den Besitt vun Amphetaminen to en söss Maand düern Haftstraaf up Bewährung veroordeelt.[2]
Nah de aktiv Karriere ännern
Nah sien Karriere as Radsportler hett Bugno en Utbillen as Helikopterpilot maakt. In disse Funktschoon is he ünner anner för dat staatlich italieensch Feernsehn RAI bi Radsportöverdragen tätig. He wurr Enn‘ 2009 to’n Präsidenten vun den Radprofiverband Cyclistes Professionnels Associés wählt.[3] 2010 hett he ahn Spood för de politische Linke bi en Regionalwahl kandideert.[1]
Utteknungen ännern
- Sportler vun dat Johr in Italien (La Gazzetta dello Sport): 1990, 1991
Enkeld Nahwiesen ännern
- ↑ a b Procycling (Düütsch Utgaav) Oktober 2013, S. 60: Gianni Bugno - Das Paradoxon
- ↑ Ralf Meutgens: Doping im Radsport, Bielefeld 2007, S. 265ff. ISBN 978-3-7688-5245-6
- ↑ [1] Gianni Bugno reelected as president of the Association of Professional Cyclists - VeloNews.com, Velonews, englisch, van‘ 30.11.2014, afropen an‘ 6. Mai 2015