Flannern-Rundfohrt

De Flannern-Rundfohrt („De ronde van Vlaanderen“, "vlaanderens mooiste") is dat populärst Eendagsrennen in Belgien un neben Paris-Roubaix seker ok dat populärst Eendagsrennen vun de Welt un wurrd to de Klassiker un to de fiev Monumente vun den Radsport tellt.

De „Ronde“ find jedes Johr Anfang April statt, genau een Week vör Paris-Roubaix. Dat Rennen weer Deel vun de nah de Saison 2004 afschafft Rad-Weltcup un hörr tüschen 2005 un 2010 to de UCI ProTour, en nee inführt Serie vun de wichtigst Radrennen vun een Johr, un siet 2011 to de Nahfolgeserie UCI World Tour.

Historie

Da hüüd vun’ Grote Markt in Brügge ut dör den radsportverrückten fläämsch Deel vun Belgien führend Rennen wurr eerstmals 1913 fohren. Eerst Winner weer de Belgier Paul Deman. To’n Anfang man wenig spoodriek un dör den Eersten Weltkrieg ünnerbraken, wurr dat Rennen in de 1920er und 1930er Johren populärer. Bit in de 1950er Johren bestunn de Streck upgrund vun untorekend Straatenutbau ut nich asplateert Weeg. Hüüd besteiht ehder dat Problem överhoopt noch Koppsteenplaasterstrecken to finnen. De „Ronde“ is dat wichtigst Radrennen in Flannern un tosommen mit Lüttich-Bastogne-Lüttich un den Flèche Wallonne dat wichtigst in Belgien.

Ökelnaam vun dat Rennen is Vlaanderens mooiste (dat Muiste vun Flannern). De tallloos fläämsch Fans maken de Ronde jedes Johr weer to dat gröttste Volksfest in Belgien. In Oudenaarde gifft dat en Museum to de Historie vun de Rundfohrt.

Streck

Roger De Vlaeminck an’ Koppenberg

De Streckenführung vun de Flannern-Rundfohrt ännert sück vun Johr to Johr man blots wenig. Nahdem de eerst rund 150 km up flaak Streck absolveert wurrn, führt de tweete Deel vun dat rund 250 km lang Rennens dör hügelig Gegend de so nömmt „fläämsch Ardennen“, faken up eng Weeg un över kört, steil Anstieg. Dordör gellt dit Rennen as düütlich stuurder as Paris-Roubaix. Dat Ziel liggt siet 1973 up den Halsesteenweg in Meerbeke. De Verdrag mit Meerbeke as Zielstadt löppt nah 2011 ut, kann aber för 10 Johr verlängert wurrn.

„Hellingen“

Entscheedend för den Utgang vun dat Rennen sünd de dort anfohrend tallriek Hellingen, köer un giftig Anstieg vun meest nich mehr as 2 km Längt un 60–100 m Hööchünnerscheed, aber bit över 20 Perzent Steigung, de todem to’n grooten Deel nich aspalteert sünd. An’ berühmtesten un gefürchtetsten sünd de Oude Kwaremont, de Koppenberg un kört vör Enn’ vun dat Rennen de Müer vun Geraardsbergen mit Steigungen vun bit to 20 %. In de letzten Johren weern bi de Ronde söbenteihn Hellingen to överqueren. Dat letzt Hinnernis vör dat Ziel is de Bosberg, rund teihn Kilometer vör dat Ziel.

Völ „Hellingen“ wurrd all vör de Flannern-Rundfohrt in tallriek fläämsch Fröhjohrsklassiker anfohren, so bispeelswies bi den Scheldepries, den E3-Pries, den Dree Daag vun De Panne oder den Omloop Het Nieuwsblad.

„Kasseien“

De „Kasseien“ (fläämsch för Koppsteenplaaster) fallen bi de Ronde regelmatig mit de Hellingen tosommen, wat de Anstieg umso stuurder makt. Utnahmen dorvan sünd blots de Paddestraat un Mater, jeweils över twee Kilometer lang flaak Passagen up Koppsteenplaaster.

De Koppenberg wurr van 1988 bit 2003 ut dat Programm nommen, wiel de Radrennfohrer Jesper Skibby up dat rutschig Koppsteenplaaster utrutscht un binah vun dat Jury-Auto överfohren wurrn weer. Man hett den Straatenbelag vun de Anstieg intüschen gründlich överhaalt un de Barg weer in de Saison 2006 weer Deel vun de Streck.

Anfang November 2006 hebbt de Organisatoren vun dat fläämsch „Monument“ bi en Pressekonferenz bekannt geven, dat de Koppenberg bi de folgend Utgaav an’ 8. April 2007 nich anfohren wurrn sull. Man wull dormit en „Fiasko“ as bi dat letzt Mal verhinnern. Bi de 90. Flannern-Rundfohrt in’ Fröhjohr 2006 harrn tallriek Fohrer an den Koppenberg all Siegchancen verloren. Blots teihn Fohrer kunnen den Anstieg mit dat Rad absolveeren, de annern mussen to Foot gahn, as dat as so faken Stürze an den „Karkhoff vun de Ambitschoonen“ de Straat blockeeren deen.

Sieger

Jeweils dree Mal hemm de Italiener Fiorenzo Magni as ok de Belgier Achiel Buysse, Eric Leman, Johan Museeuw un Tom Boonen un de Swiezer Fabian Cancellara dat Rennen wunnen. Eenzig düütsch Winner sünd Rudi Altig 1964 un Steffen Wesemann 2004.

Siet 2004 gifft dat ok en Fruenkonkurrenz. De Fruen fohrt vun Oudenaarde ut de sülvig Streck as de Mannlüüd, fangen aber eenig Stünn vörher an. Eerst Winnerin weer de Russin Sulfija Chassanowna Sabirowa, de hüüd för Kasachstan fohrt.

An Dag vör dat Profirennen gifft dat en Jedermann-Version, bi de neben Deelstrecken över 75 oder 150 km ok de komplette original Streck över ca. 250 km absolveert wurrn kann.