Glen Scotia

Glen Scotia is en Whisky-Brenneree in de Stadt un dat togliek egenstännige Whiskyrebeet Campbeltown op dat Halfeiland Kintyre in Schottland. De Hüüs vun de Brennereeanlaag sünd in de schottischen Denkmollisten in de Kategorie B inordent. De Naam bedüüt so veel as „Daal vun de Schotten“.

Glen Scotia
Brenneree Glen Scotia (Foto: J M Briscoe)
Land	Schottland
Region	Campbeltown
Tyyp	Malt
Status	aktiv
Besitter	Glen Catrine Bonded Warehouse
Grünnt	1832
Grünner	Stewart, Galbraith & Co.
Waterborn	Crosshills Loch
Washstill(s)	1 × 16.000 l
Spiritstill(s)	1 × 12.000 l
Produkschoonsvolumen	750.000 l
Websteed	www.glenscotia-distillery.co.uk

Historie

De Brenneree weer 1832 vun Steward, Galbraith & Co. ünner den Naam Scotia Distillery grünnt. In ehr wesselhafte Historie hett se faken ok Tieten hatt, in de se över Johren nich produzeert hett. As bi vele annere Destillen ok, lööp dat Gewarf mit den Whisky bit to’n Enn vun’t 19. Johrhunnert teemlich goot, so dat de Brenneree Glen Nevis Distillery dorto köfft worrn is, üm de grote Nafraag bedenen to künnen. 1919 is se denn an de West Highland Malt Distillers Ltd. (W.H.M.D.) övergeven worrn, de ok al annere Brennereen op dat Halfeiland Kintyre besitten de. En poor Johren later is de Firma aver bankrott gahn un all ehr Brennereen müssen dicht maakt warrn. En ehmolig Liddmaat vun de W.H.M.D, Dancun MacCallun, hett 1924 versöcht de Brenneree wedder to beleven. Man, al 1928 weer dat dormit wedder vörbi.

Acht Johren later hett de Bloch Brothers Limited dat Gewarf övernahmen, de ok al de Scapa-Brenneree besitten deen. Dorna keem en spoodrieke Tiet bit de Destille 1954 an Hiram Walker verköfft weer, de vör allen dör den Canadian Club bekannt worrn is. Blots een Johr later wessel se wedder den Besitter un keem na de Firma A. Gillier & Co, de sülvst 1970 wedder vun de Amalgamated Distillers Products Ltd. övernahmen weer. In de Johren 1979 bit 1982 is de Brenneree vun Grund op renoveert worrn. De Produkschoon weer aver 1984 wedder ünnerbroken un lööp ok eerst 1989 wedder an, as de Brenneree vun Gibson International köfft worrn is. Ok de Firma hett sik aver nich över Water hollen künnt un müss 1994 Insolvenz anmellen. De Konkursmasse – de Destille un de lagerte Whisky – güngen an den hüütigen Besitter Glen Catrine Bonded Warehouse. De Produkschoon füng aver eerst 2000 wedder an.

Glen Scotia, 12 Johr oolt

Produkschoon

Glen Scotia höört to dat schottische Whiskyrebeet Campbeltown un betütt ehr Water för de Produkschoon vun’n Crosshill Loch. In de Brenneree gifft dat en Meeschfatt un söss Gäärfatten to 17.000 l ut COR-TEN-Stahl. Brennt warrt in een wash still vun 16.000 l un een spirit still vun 12.000 l.

Kiek ok

List vun de schottischen Brennereen

Literatur

• Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London u. a. 2008, ISBN 978-0-7566-3349-3.
• Walter Schobert: Das Whiskylexikon. Fischer Taschenbuch Verlag, Frankfort an’n Main 2003, ISBN 3-596-15868-0.

Weblenken

Glen Scotia. Mehr Biller, Videos oder Audiodateien to’t Thema gifft dat bi Wikimedia Commons.