Good Abbenseet
Dat Good Abbenseet (hoochdüütsch Gut Abbenseth) weer en Eddelgood in dat Dörp Abbenseet (vondaag Gemeen Hollnseth (Samtgemeen Loomst) in’n Landkreis Cuxhoben, Neddersassen).
Historie
ännernDat Good Abbenseet hett de Familie von Marschalck tohöört. Dat de Familie Besitt in Abbenseet harr, lett sik al för dat 16. Johrhunnert nawiesen. De eerste Nawies, dat dat Good bestahn hett un dat de Marschalckens dat Good bewahnt hebbt, is von 1668. Dormaals hett Detlef von Marschalck op Good Abbenseet wahnt. Villicht weer he ok de eerste, de en Meierhoff in en Good ümwannelt hett. Detlef is later in Konkurs gahn.[1]
Bi de Gemeenheitsdelung in Abbenseet 1807 hett dat Good 285 Morgen Land ut de Gemeenheit kregen. Üm 1880 rüm harr dat Good 93,07 Hektar Land in Abbeseet un 1,25 Hektar in Alfs.[1]
1874 is dat Good Arvstammgood von de Familie von Marschalck worrn. As Engelbert von Marschalck dat Good 1911 verköpen wull, dröff he dat dorüm nich. De Ridderschop hett em dat verbaden. Dorüm hett Engelbert de Gebüüd denn op Afbrook verköfft. Dat Wahnhuus het 760 Mark inbrocht, de Schüün 135 Mark un de Swienskaven 42 Mark. Ok de Bööm op’n Hoff sünd op’n Stamm sett worrn un hebbt 234,50 Mark inbrocht. Engelbert hett denn dat Land in Parzellen indeelt un verpachten laten.[1]
As na’n Eersten Weltkrieg de Stammgöder oplööst worrn sünd, kunn Engelbert dat Good verköpen. Üm dat Good in de Familie Marschalck to hollen, hett denn 1922 Max Marschalck von Bachtenbrock op Hutloh un Geesthoff dat Good mit 95,05 Hektar köfft.[1]
Dat Land is later deelwies an de Hannöversche Siedlungssellschop oder an Buurn verköfft worrn, deelwies aver ok vondaag noch in Besitt von de Familie Marschalck von Bachtenbrock.[1]
Goodsherrn
ännern- ~1688–~1700: Detlef von Marschalck
- ~1700–1733: Jürgen Friedrich von Marschalck
- 1733–1754: Heinrich Christoph von Marschalck
- 1754–1794: Anton Diedrich von Marschalck
- 1794–1836: Benedikt Dietrich von Marschalck
- 1836–1845: Engelbert von Marschalck
- 1845–1874: Friedrich von Marschalck
- 1874–1911: Engelbert von Marschalck
Verwaltungsgeschicht
ännernDat Good hett vör 1859 to de Vaagdie Loomst in dat Amt Bremervöör tohöört un denn von 1859 bet 1885 to dat Amt Oosten. Na 1885 weer dat in’n Kreis Neehuus.
Inwahnertall
ännern| Johr | Inwahners |
|---|---|
| 1848[2] | 8 Lüüd, 2 Hüüs |
Religion
ännernDat Good Abbenseet is evangeelsch-luthersch präägt un höört to dat Kaspel von de Bartelmees-Kark in Loomst.
Footnoten
ännern- ↑ a b c d e Michael Schwieger: Abbensether Chronik. 2007, Sied 67ff
- ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 132: http://books.google.de/books?id=eOI-AAAAcAAJ&pg=PA132
