Good Stemmermöhlen
Dat Good Stemmermöhlen (hoochdüütsch Gut Stemmermühlen) weer en Eddelhoff in dat Dörp Stemmermöhlen (vondaag Deel von de Oortschop Karkwist in de Gemeen Beverst, Landkreis Cuxhoben, Neddersassen).
Historie
ännernDat Good Stemmermöhlen leeg an de Luun un harr ok en Watermöhl. Dorvon kummt ok de Naam Stemmermöhlen. Dat Good hett bet an dat Enn von dat 18. Johrhunnert de Familie von de Lieth tohöört. As Johann Arend von de Lieth 1780 doodbleven is, güng dat Good in Besitt von siene Dochter Gertrud Anna, de Claus Hinrich von Horn freet harr. He is al 1782 doodbleven un dat Good güng denn an de Dochter Juliane Magdalene, de mit Christian Arnold Diedrich von Zesterfleth verheiraadt weer. Von Zesterfleth wedder is 1820 doodbleven un dat Good güng an de Dochter Louise Caroline Johanne Elisabeth, de Wilhelm von Hodenberg freet harr. Later in dat 19. Johrhunnert is dat Good an de Koopmannsfamilie Rauch ut Bremen verköfft worrn.
Dat hüdige Goodshuus is 1901/1902 von’n Bremer Koopmann Gottlieb Rauch boot worrn. De Sockel is ut Tegel müürt, de Rest is en massiven Putzbo in’n Stil von de Neorenaissance mit Treppengevel un dubbelte Rund- un Spitzbagenfinstern. Dat Goodshuus is vondaag as Bodenkmaal schuult.
Goodsbesitter Gottlieb Rauch is an’n 13. Oktober 1930 doodbleven. Sien Söhn Werner kunn dat Good nich hollen un hett dat 1934 an de Hannöversche Siedlungssellschop verköfft. De hett utrekent, dat op dat 393 Hektar grote Good 18 Buurn jemehr Utkamen hebben kunnen, wenn dat Holtland von 120 Hektar afholt un in Ackerland ümwannelt warrt. Dat is 1935 denn daan worrn. De üm un bi 16 Hektar groten Hoffsteden hebbt 11.500 Rieksmark köst. Dor müssen 2.800 Rieksmark von glieks bor betahlt warrn, de Rest later.
Goodsbesitters
ännern- –1715: Jürgen von de Lieth
- 1715–: Christoph Jürgen von de Lieth
- Johann Eberhard von de Lieth
- –1780: Johann Arend von de Lieth
- 1780–1782: Claus Hinrich von Horn
- 1782–1820: Christian Arnold Diedrich von Zesterfleth
- 1820–: Wilhelm von Hodenberg
- –1930: Gottlieb Rauch
- 1930–1934: Werner Rauch
Verwaltungsgeschicht
ännernDat Good hett vör 1851 to de Huusvaagdie Beverst in dat Gericht Beverst tohöört un denn von 1851 bet 1859 to dat Amt Beverst. 1859 is de Oort mit dat ganze Kaspel Karkwist an dat Amt Bremervöör wesselt. 1885 is Stemmermöhlen Deel von’n Kreis Bremervöör worrn un 1932 von’n ne’en, grötteren Kreis Bremervöör.
Dat Good hett to de Gemeen Stemmermöhlen höört, de 1929 tohoop mit Horst Deel von de Gemeen Karkwist worrn is.
Inwahnertall
ännern| Johr | Inwahners |
|---|---|
| 1848[1] | 19 Lüüd, 1 Huus |
| 1. Dezember 1885[2] | 11 Lüüd, 1 Huus |
| 1. Dezember 1905[3] | 36 Lüüd, 6 Hüüs |
Religion
ännernDat Good weer evangeelsch-luthersch präägt un hett to dat Kaspel von de Johannes-de-Döper-Kark in Karkwist höört.
Literatur
ännern- Hans Mindermann: Stemmermühlen 1935–1985, Ein Rittergut im Wandel der Zeit. [as Manuskript], ahn Johr (1985)
Footnoten
ännern- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 149
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 187
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 24
Koordinaten:53° 25′ N, 8° 52′ O