Good Will Hunting
Good Will Hunting (op plattdüütsch so veel as „De go’e Will Hunting“) is de Titel vun en US-amerikaansch Filmdrama ut dat Johr 1997. Speelbaas weer Gus Van Sant. De Hööftrull speelt Matt Damon, de ok tosamen mit Ben Affleck dat Dreihbook to den Film schreven hett.
| Filmdaten | |
|---|---|
| Plattdüütsch Titel: | — |
| Originaltitel: | Good Will Hunting |
| Düütsch Titel: | Good Will Hunting |
| Produkschoonsland: | USA |
| Johr vun’t Rutkamen: | 1997 |
| Läng: | 122 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Gus Van Sant |
| Dreihbook: | Ben Affleck Matt Damon |
| Produkschoon: | Lawrence Bender |
| Musik: | Danny Elfman |
| Kamera: | Jean-Yves Escoffier |
| Snitt: | Pietro Scalia |
| Szenenbild: | Missy Stewart |
| Kledaasch: | Beatrix Aruna Pasztor |
| Dorstellers | |
| |
Inholt
ännernWill Hunting is twintig Johr oolt un wahnt in en rünnerkamen Gegend vun South Boston. Sien Freetiet bringt he mit sien Frünnen Chuckie, Billy un Morgan mit Baseball un mit veel Alkohol in Bars to. Butendem sleiht he sik ok geern mol. So kummt dat, dat he al mehrere Vörstrafen hett – vun Autoroov bit hen to Körperverletzung. Sien Ünnerholt verdeent he mit Uthülpsarbeiten, as to Tiet as Putzkraft an’t renommeerte Massachusetts Institute of Technology in Cambridge. As he dor den Floor wischen deit, sütt he an en Tafel kumplizeerte mathemaatsche Opgaven, de för de Studenten dacht sünd. He kann jem aver ahn grote Möh lösen un tütt so de Acht vun Professer Gerald Lambeau op sik, de in em en unbekannt mathemaatsch Genie kennen deit.
As Will aver wedder mol en Haueree anfangen deit, mutt he vör Gericht un warrt wegen sien velen Vörstrafen in’t Gefängnis steken. Prof. Lambeau eenigt sik aver mit den Richter, dat de Will ünner Beobachten vun Lambeau ut dat Gefängnis wedder rutlett, wenn he sik an twee Bedingen hollt: he mutt sik eenmol in de Week mit den Profresser drapen un en Therapeuten besöken. Gau hett Will al den föfften Therapeuten dorto bröcht, de Arbeit mit em optogeven, so dat Lambeau blots noch een Utweg sütt, neemlich den Psycholoog Sean Maguire vun’t Bunker Hill Community College in Charlestown. Maguire kennt he ut suien Studientiet noch un weet, dat he in de glieken Arbeitergegend vun Boston opwassen is as Will. Mit Möh finnt he na un na Togang to Will un bringt em dorto, sik mit dat Leven un sien Lasten ut’nanner to setten statt jem ut’n Weg to gahn.
In en Bar dröpt Will de Studentsche Skylar, de em ehr Telefonnummer dorlett. Se draapt sik un verkiekt sik in’nanner. Man, dat hollt nich lang vör. Eerst lüggt he ehr wat vör wat sien verleden Leven un sien Afkummst angeiht un denn vertellt he ehr na en poor Drapens, dat he ehr nich leev hett un lett ehr fallen. De egentliche Grund is aver, dat Will bang is.
Lambeau dorgegen hett blots in’n Sinn, Will mööglichst gau in en go'e Arbeit to bringen in de Forschung oder in de Industrie to bringen. Will will aver nix vun en börgerlich Leven ansteed vun dat rünnerkamen Leven as Hülpsarbeiter weten, dat he mit sien Kumpel Chuckie deelt. Dat versteiht aver de Professer nich, un de Kuntakt twüschen jem brickt af.
Intwüschen warrt Maguire ut Gerichtsakten gewohr, dat Will in Pleegfamilien opwassen is, in de he misshannelt weer. So fangt he an, beter to verstahn, worüm mit em so swoor uttokamen is. As se sik wedder drapen doot, vertellt he em mehrmols, dat he nix dorför künn. Opletzt brickt Will in Tranen ut un kann sien Pien nu endlich rutlaten. Ok Sean is as Kind vun sien alkoholkranken Vadder slahn worrn un hett ruchweg dat glieke dörmaakt. Dör sien gemeensomen Uttuusch mit Will ännert ok de Therapeut sien Leven: As sien Fro storven weer, hett he sik vun all ne’e Saken wegholen. Nu aver will he eenige Maanden dör de Welt reisen.
Den starksten un letzten Impuls kriggt Will aver dör sien Fründ Chuckie, de em vertellt, dat he bannig froh weer, wenn Will sien Mööglichkeit nütten de, ut sien Leven uttobreken un mehr ut sik to maken. So maakt sik Will wohrhaftig op’n Weg na Kalifornien, woneem Skylar hentogen weer, üm Medizin to studeren. Wat he Skylar en’t Enn torüch winnen kann, blifft apen.
Kritik
ännern- In’t Lexikon vun’n internatschonalen Film weer Good Will Hunting as filmischen Entwicklungsroman betekent, de vun’n Dialog leven un sik in Grootopnahmen op de Gesichter vun de rutragen Schauspeler kunzentreren de. Man, de Leistungen vun de Dorstellers un enige bannig intensive Momenten künnen de visuellen Defiziten vun den Film as ok de Klischees in de Geschicht nich vergeten laten.
- Op Kino.de weer sünners dat eernsthafte Speel vun Robin Williams loovt, de dat Psychogramm över eenige Klischees vun’t Dreihbook weghülpen de. Dat de Film de Tokiekers antehn deit, ofschoonst eeinge Dialogen teemlich snippsch sünd, warrt de konventschonellen Regie vun Speelbaas Gus Van Sant toschreven, de nich sümen deit, sien fein Geföhl för junge Butensieters un en Hööchstmaat an Wohrhaftigkeit jümmer meist physisch föhlbor to maken.[1]
Utteken
ännernDe Film hett groten Spood hatt. Alltohopen weer he för 57 Filmpriesen vörslahn, dorünner in 9 negen Kategorien vun’n Oscar. Uttekent weer de Film mit twintig Priesen, so as:
- 1998: den Oscar in de Kategorie Best Originaldreihbook för Matt Damon un Ben Affleck
- 1998: den Oscar in de Kategorie Best Nevendorsteller för Robin Williams
- 1998: den Golden Globe in de Kategorie Best Filmdreihbook för Matt Damon un Ben Affleck
- 1998: den BMI Film Music Award för Danyn Elfman
- 1998: den Sülvern Boor vun de Berlinale in de Kategorie Rutragen Enkeltleistung för Matt Damon
- 1998: den ALFS Award in de Kategorie Britishe Nevendorstellersche vun’t Johr för Minnie Driver
- 1998: den Golden Satellite Award in de Kategorie Best Originaldreibook för Matt Damon un Ben Affleck
Anners wat
ännern- Will vertellt in’n Film bi sien eerst Drapen mit Sean vun dat Book A People’s History of the United States' vun Howard Zinn. Matt Damon hett in sien Kindheit in de Naverschop vun Zinn leevt. In’t Johr 2007 weer Damon Spreker vun en Höörbookfaten vun dat Book.
- Robin Williams hett en lütte Replik vun sien Oscar, den he för de Rull kregen hett, an Peer Augustinski schickt tosamen mit de Naricht, dat he em danken wull, dat Augustinski em in Düütschland beropen maakt harr. Augustinski weer sien Synchroonspreker in de düütschen Faten.
- De Rull Skylar weer na Damons sien dormolige Fründin Skylar Satenstein nöömöt, de em aver noch vör den Anfang vun de Dreiharbeiten wegen den Slagtüüchspeler Lars Ulrich vun de Grupp Metallica verlaten hett. Se hebbt 1997 heiraat, man de Eh hett blots bit 2004 holen. Damon un Minnie Driver, de in den Film Skylar speelt hett, hebbt dorgegen wiel de Filmprodukschoon wat mit’nanner anfungen.
- De Vörnaams vun Will sien vörgeevliche Bröder (Marky, Ricky, Danny, Terry, Mikey, Davey, Timmy, Tommy, Joey, Robby, Johnny un Brian) sünd de Vörnaams vun Ben Affleck sien leevste Speelbasen Marc Rocco, Richard Attenborough, Danny Boyle, Terry Gilliam, Mikael Salomon, David Fincher, Tim Burton, Tom Hanks, Joel Schumacher, Robert Redford, John Woo un Brian De Palma.[2]
- Mathemaatsch Berader för den Film weer Daniel Kleitman, de ok en Cameo-Optritt hett.[3]
- In den Kinofilm Jay and Silent Bob Strike Back ut dat Johr 2001 speelt Damon un Affleck in een Szeen jemehr Rullen ut Good Will Hunting un parodeert den Film in en fiktive Foortsetten „Good Will Hunting II: Hunting Season“. Gus Van Sant is dorin as nich intresseerten Speelbaas to sehn.
Borns
ännern- ↑ Kritik to Good Will Hunting op Kino.de
- ↑ Interview mit Ben Affleck in de Süddeutsche Zeitung, 19. November 2007
- ↑ Review vun Good Will Hunting dör Mark Saul, Notices AMS, Nr.4, 1998, pdf, mit en Afsnitt vun Kleitman My career in the movies.
Weblenken
ännern- Good Will Hunting in de Internet Movie Database (engelsch)
- Kritiken to’n Film op Rotten Tomatoes
- Vergliek vun de Snittfaten Vox namiddags – FSK 12 op Schnittberichte.com