Hauptmenü öffnen

Gregorio Conrado Álvarez Armelino

spaanscher Politiker

Gregorio Conrado Álvarez Armelino (* 26. November 1925 in Montevideo28. Dezember 2016) is en ehmalg urugayischer General un Politiker. Van 1981 bit 1985 weer he wiels de Militärdiktatur as Präsident Staatsböverhoopt un Regeerenschef vun Uruguay.

Siet sien Befördern to'n General 1971 hett Álvarez den Kamp gegen de linke Guerillabewegen Tupamaros leit. Nah de Övernahm vun de Regeeren dör dat Militär 1973 wurr en Nationaal Sekerheitsraat (Consejo de Seguridad Nacional) inführt un Álvarez weer as Generalsekretär Baas dorvan. In en Referendum 1980 wurr en vun de Militärs vörslahn Verfaatensreform, de hör noch mehr Macht bringen sull, aflehnt – un so de Will vun de Mehrheit vun de Bevölkerung för de Rückkehr to de Demokratie düütlich. Dat Militär hett denn en Programm vörbereit, um de Macht an en Zivilregeeren torüchtogeven.

De all siet veer Johr för 1981 in Utsicht stellt Wahlen funnen denn doch nich statt. Álvarez leet sück vun den „Raat vun de Natschoon“ as Nahfolger vun Aparicio Méndez mit Wirken van' 1. September 1981 to'n Präsidenten maaken. He gull eegentlich as (för de Verhältnisse in Uruguay to de Tiet) „liberal“ un as Marktwertschapler, führ aber de Militärdiktatur wieder. En beeten Nahgeven – as dat Weertolaaten vun Parteien 1982 – hulp nich: De wertschaplichen un sozialen Probleme vun Uruguay deen sück nich verbeetern. Dordör verlor Álvarez an Stütt, ok bi de Mehrheit vun de Militärs. Siet Midden 1983 geev dat immer weer Grootdemonstratschonen. In' Januar 1984 hebbt de Gewerkschapen to de bit dorhen gröttst Protestaktschoon gegen de Militärherrschap uproopen: en 24stündig Generalstreik. Álvarez hett tonächst mit Gewerkschapsverboten un Nahrichtenzensur reageert, stimm aber toletzt to, dat in' November 1984 to'n eersten Mal siet 1971 free Wahlen stattfinnen kunnen. Dorbi hett sück denn Julio María Sanguinetti Coirolo vun de Partido Colorado dörsett. Álvarez is an' 12. Februar 1985 torüchtreden; bit to'n Amtsanträe vun Sanguinetti an' 1. März weer de Präsident vun den Böversten Gerichtshoff, Rafael Addiego Bruno, Interimspräsident vun Uruguay. Mit de Amtsövernahm dör Sanguinetti gungen denn twalv Johr Militärdiktatur to Enn'.

In' August 2005 hebbt Afkaaten vun de uruguayisch Menschenrechtsorganisatschoonen ankünnigt, dat se versöken wullen, militärisch un zivil Verantwortliche vun de Militärdiktatur antoklagen. In' Zentrum vun den sull Ex-Präsident Álvarez stahn. De internatschonal anerkannt Straaftatbestand „Verbreken gegen de Minschlichkeit“ sull dorbi verhannelt wurrn.[1] In' Mai 2006 weer Álvarez en vun teihn ehmalgen Generalen, de offiziell „för de Taten, de hör Ünnergeven in de Tiet vun den Kamp gegen de Subversion begahn harrn“ de Verantwortung övernehmen. In en apen Breef hebbt de teihn dorup henwiest, dat „all Militärs up ehrn Befehl hen hannelt“ harrn un hebbt dissen „Kamp“ as „Erfüllung vun de Deenstplicht“ dorstellt.[2]

Vörgänger Amt Nafolger
Aparicio Méndez Präsident vun Uruguay
12. September 1981 – 12. Februar 1985
Rafael Addiego Bruno

WeblenkenÄnnern

Enkeld NahwiesenÄnnern