Gros Ventre

De Gros Ventre (segg: grow VAHNT, franzöösch. ‘Fett Buuk’), ok Atsina nömmt, sünd en Indianer-Stamm vun de Algonkin-Spraakfamilie ut dat nöördlich Montana in den USA. De Naam Fett Buuk wurr hör vun de Franzosen geven, de hör Tekenspraak falsch düüd harrn.

Naam

De Gros Ventre hebbt sück sülvst A’ani, A’anini oder Ahahnelin (segg: ah-ha-NEE-nin), wat ‘Volk vun de witt Toon (Eerd)’ bedüüd. De Beteken Atsina stammt wohrschienlich vun de mit hör verbünd Blackfoot un bedüüd ‘Moodig Volk’, wiels se vun de mit hör verwandt Arapaho, de sück överleegen föhlen deen, verächtlich Hitunena - ‘Bettler’ bömmt wurrn. As de Gros Ventre gänzlich up de Plains trecken deen, wurrn se vun de Franzosen ok as Gens de Vache (Büffel-Volk) betekent.^[1] Se weern todem noch ünner folgend Naams bekannt: Fall Indians, Gros Ventre of the Prairie, Minnetarees of Fort de Prairie,^[2] Rapid Indians, White Clay People.

Levenswies

De Gros Ventre hörrn to de Kultur vun de Plains-Indianer un hör Hööftnehrensborn weer de Amerikaansch Bison. Noch Midden vun dat 19. Jorhunnert hemm up de Groot Ebenen vun Noordamerika an de 60 Million Deerten leevt. Bevör de Gros Ventre Peer harrn, hemm se up de Jagd en Büffelherde in Panik sett. De in wild Flucht wegg rönnen Deerten wurrn in en V-Form dwungen un to den Rand vun en Klippe dreeven, vun de se denn afstörten deen. An sückser Stäen keemen jeden Johr Dusende vun Büffel to Dood, faken so groot Mengen, dat de Gros Ventre dat völ Fleesch nich upbruken kunnen, ofschons en Deel dorvan dröögt un as Wintervörrat to Pemmikan verarbeit wurr. De Huuten hett man as Teltdecken för de Tipis un för Kleedasch bruukt. Nah de Adaptschoon vun dat Peerd un de Füerwappen reck de Plainskultur ehr Hööchpunkt. De gröttere Beweglichkeit dör dat Peerd hett allgemeen de Levensqualität verbetert. Nu kunnen gröttere Tipis baut un mehr Levensmittel transporteert wurrn.

Historie

De Arapaho un Gros Ventre weern eenst en eenzig Stamm un hebbt in dat Daal vun den Red River in dat nöördlich Minnesota un angrenzend Kanada leevt. In dat fröh 17. Johrhunnert hebbt sück de Gros Ventre afspalt un de Arapaho trucken nah Süüden. To Tiet vun den eersten Kuntakt mit de Europäers um 1754 hebbt de Gros Ventre in de kanaadsch Prärie an' Böverloop vun den Saskatchewan River un sien Nebenströöms. Se weern siet lang Tiet Feende vun de Assiniboine un Cree un mussen för de flüchten, wiel hör Feende Füerwappen vun de Hudson’s Bay Company kreegen harrn. Doruphen hebbt de Gros Ventre 1793 de Afdeelen vun de Hudson’s Bay Company in South Branch House an' South Saskatchewan River dicht bi de hüüdig Stadt St. Louis angreepen un hebbt de daalbrennt. Dornah truck de Stamm süüdwärts an den Milk River un hett sück mit de Blackfoot tosommen daan. Tegen 1870 is dat Bündnis mit den Blackfoot utnannergahn un de Gros Ventre muss bi hör eenstig Feenden, den süüdlichen Assiniboine, Schul söken.

Reservatschoon

Vun de US-Regeeren weer 1878 de Fort-Belknap-Reservatschoon inricht wurrn, de sück de Liddmaaten vun de Gros Ventre mit hör ehmalge Feenden, de Assiniboine, deelen mussen. 1888 hebbt de Blackfoot, Assiniboine un Gros Ventre hör Land afrtreden un sünd in de Reservatschonen trucken. Um 1904 geef dat blots noch 535 Stammesliddmaaten. 1900 tell de Gesamtbevölkerung vun Fort Belknap 1.200 Personen, vun de blots noch 111 hör Moderspraak snacken kunnen. De Volkstellen vun all Gros Ventre in dat Johr 2000 ergeev 2.881 Stammesliddmaaten. Hüüd leven de 3.682 Stammesangehörigen in de Fort-Belknap-Reservatschoon, de se sück wiederhen mit de Assiniboine deelen.

Kiek ok

List van Indianer up de noordamerikaansche Kontinent

Literatur

Raymond J. DeMallie (Hrsg.): Handbook of North American Indians. Volume 13: Plains. Smithsonian Institution Press, Washington 2001, ISBN 0-16-050400-7.
Alvin M. Josephy jr.: 500 Nations. Frederking & Thaler, München 1996, ISBN 3-89405-356-9.
Alvin M. Josephy jr.: Die Welt der Indianer. Frederking & Thaler, München 1994, ISBN 3-89405-331-3.
Colin Taylor u. a.: Indianer, Die Ureinwohner Nordamerikas. Bertelsmann, Gütersloh 1992.

Weblenken

Atsina. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen

↑ Heritage Databank Consulting
↑ de halfsesshaften Hidatsa wurrn faken as Gros Ventre oder Minnetarees betekent – dorum wurrn de Gros Ventre as Gros Ventre oder Minnetarees of the Prairie betekent

[1] Heritage Databank Consulting

[2] sesshaften Hidatsa wurrn faken as Gros Ventre oder Minnetarees betekent – dorum wurrn de Gros Ventre as Gros Ventre oder Minnetarees of the Prairie betekent

[1]

[2]